Nitai ehvaig 15 - Intas Etipup

Nuarin-tas alupas 15.

¹ KIS ecetai nitai asjaaicnaig is ethi is eche ainyak an nohatag, is alupas um esjilid, nikavaig, ilpu agelo is seven is amen ehele ra niji itai ohocred vaig apitac is seven; uhpu idim ago ehni nedemda u Atua irai itai iji eigki.

² Kis lep ecetai inhat ehled ainyak is idivaig injop ahula is asjeuc naged cop iran: eris aiji u unjop iyehki ara sji ehki eris esjilid ara irai nitai aleg iyehki, im nalmun, im nitai asjaaicnaig o un, im numera an nidan, eris lep apos niji harp u Atua ara.

³ Era acesaces nohranitai u Moses naheca u Atua ara, im nohranitai u Lam, um ika, Ak Natimarid Atua emda acen, et esjilid nauritai unyum, er imyiali vaig; ak natimarid irai up urai iji pece, et atoh nedo unyum aiek, um inivaijec:

⁴ ak Natimarid, inyi ti imtitaig euc a di? um eti imyiahpas nidam? na idim upene ache aiek; erupu idim apam nup urai iji pece asega, um alaigaheni vai euc; na mun aru nedo o atimi aiek an nuhup u atimi asega.

⁵ Is wat ti pan itac nitai iji eigki, kis almoi ainyak, um ecetai neom ahlap an nimnim an tas asuptecnaig an nohatag eris asalgei:

⁶ eris ahes an neom ahlap a ilpu agelo is seven, is amen ehele ra niji itai ohocred vaig is seven, eris aso ra ira apelumai yilyil um adicinadicin, um ahi, eris arore nijihgara ara irai itai ahid colt.

⁷ Is apan tah is ethi irai iji itai umumoh is for iji ehki, um alupai ilpu agelo is seven nipjicolt is seven, is ohua iran nedemda u Atua ineig etpu umoh aien irai iji mesese.

⁸ Is ohua neom ahlap va nadaran natimi alupas u Atua, im nemda o un; is ehka vaig tah napanvaig anliin neom ahlap um uhum pan naopan nago ehni niji itai ohocred vaig is seven u ilpu agelo is seven.