Nitai ehvaig 14 - Intas Etipup

Nuarin-tas alupas 14.

¹ KIS almoi ainyak um ecet Lam, is aiji aien an nedoon Saion, eris amen ehelen natimi is wun huntret im forte for dausant, eris aged nidai Etman irai ipjiimtara.

² Kis atahaijeg nohran tah an nohatag ainyak is idivaig inmotjan jop alupas, um lep idivaig inmotjan natceteuc alupas u unmunuka: kis lep atahaijeg nohrai ilpu atimi atcei harp ainyak, eris atcei harp ura ara:

³ eris acesaces nohranitai ara, is idivaig nohranitai mat, an nuhup u dorona, im lep an nuhup u niji itai umumoh is for iji ehki, im ilpu atimi tas alep: is ehka vaig tah nesegevaig nohranitai iyehki, ilpu atimi wun huntret im forte for dausant ache, eris imyiatamaig ra an nobohtan.

⁴ Ara aigki eris eti auahas ra irai ilpu takata; era ilpu atimi upene ara. Era apitac Lam ara irai iji uarin asega et apan iran aien. Eris imyiatamaig ra sji eigki ehele atimi, eris hupnan ara imi Atua im lep Lam.

⁵ Is eti eteuc nefaifa irai ipjieucsera: um lep ti nedo has ura an nuhup u dorona u Atua.

⁶ Kis lep ecet nagelo is eche ainyak, is ae aien an nauanohatag, is amen ehelen intas-upene ineig inyi ti lep ti, par asuptecnaig ehele atimi an nobohtan, im lep ehele ilpu atimi auoh taka tas, um amen irai iji pece, im niji elcau, im niji imnim;

⁷ is efehtas aien, um ika, Akumu imtitai Atua aijaua, um imyiahpas yin; et mun yetpam inuarin-nadiat ineig etpu asuptecnaig nimtan imi atimi aien; um alaigaheni vai yin is ago nohatag aien, im nobohtan, im injop, im lep nimtaiwai.

⁸ Is epitpitac iran a nagelo is ethi is eche, um ika, Et mun asuol Babelon, et mun idim asuol inuarin-pece alupas iyehki; va nitai ineig, nikavaig, is alumai nup urai iji pece asega waina an gaijid o un aien, uhpu ohocred vaig.

⁹ Is epitpitac ira rau a nagelo is ethi is eche, um efehtas, um ika, El et alaigaheni va nitai aleg iyehki im lep nalmun tah natimi, um leh nitai asjaaicnaig o un an nipjinimtan, ka nikman,

¹⁰ etpu idim umnyi waina an tavaitap u Atua aien, er atladwi an nipjinitai an nedemda alupas o un, jam eti asjan ivai iran; etpu ohocred aien an cop im narekwas an nuhup u ilpu agelo upene, im lep an nuhup u Lam.

¹¹ Et lep aridjai nadaran cop an nohocred ura irai iji mesese: era eti atumop irai iji adiat im niji epeig ara sji eigki, era alaigaheni ara va nitai aleg im nalmun, im lep ra era leh nitai asjaaicnaig va nidan ara.

¹² Nedo eti auatiemda u ilpu atimi upene neigki: era imyiaiji intas alep u Atua ara sji eigki, um asgeig irai Iesu.

¹³ Kis lep atahaijeg nohran tah an nohatag ainyak, is ika ehelek, Namu aged aiek, ika, Era mun ahesmoij a ilpu atimi emesmas, era emesmas ehele Natimarid ara, um uhum pan itu: Maiya, et ika a Nesgan Upene, eri atumop ara va niji auritai ura; etpu lep apitac ra niji itai ura eris ago.

¹⁴ Kis almoi ainyak um ecetai nepeig ahi, is ateuc an nepeig iyehki tah is idivaig Inhal o natimi, eris adgaig imi yin korona colt, is apos nauitoga arig an nikman aien.

¹⁵ Is lep ahes an neom ahlap a nagelo is ethi is eche, um ahlaig ijinies vai yin is ateuc an nepeig iyehki aien, um ika, Ati nauitoga unyum aiek, um eucsei itai: et mun yetpam naopan ineig an neucsei itai iran aiek; et mun metto nohoai itai an nobohtan.

¹⁶ Is ati nauitoga o un aien an nobohtan, is ateuc aien an nepeig iyehki, um eucsei nohoai itai an nobohtan.

¹⁷ Is lep ahes an neom ahlap an nohatag a nagelo is ethi is eclic, is lep apos nauitoga arig aien.

¹⁸ Is lep ahes an nefata a nagelo is ethi is eche, is aminjinaig incop aien, um ahlaig ijinies vai yin is apos nauitoga arig aien, um ika, Ati nauitoga arig unyum aiek, um asjapicnaig nohoai vaine an nobohtan, et mun metto upenc nohoan.

¹⁹ Is ati nauitoga o un an nobohtan a nagelo iyehki, um asjapicnaig nohoai vaine an nobohtan, um ikni an nitai ahtaijiraig vaine alupas an nedemda u Atua:

²⁰ eris auhi nohoai vaine an nitai ahtaijiraig alupas an yipin nuarin-pece itac, is ahes inja an nitai ahtaijiraig vaine iyehki, um ahga um yetpan u braitil irai hors, um yah a mail is tu huntret.