Nitai ehvaig 12 - Intas Etipup

Nuarin-tas alupas 12.

¹ ERIS ecetai nitai asjaaicnaig alupas is ethi an nohatag, nikavaig, intakata is ethi, is ataluopni yin nagesega, is eteuc ithan neduon inmohoc, eris adgaig imi yin inmoijeuv is twelv is idivaig korona:

² is opouc aien, um aunyauwaig, um ahka, um ohocred an naposvaig inhal o un.

³ Eris lep ecetai nitai asjaaicnaig is eche an nohatag, nikavaig, nimyiv is ethi is alupas um cop, is seven nidjinin, um ten nepat o un, is amen irai idjinin korona is seven.

⁴ Is acause pam nahaijin is ethi an nahaijin is eseij irai moijeuv an nohatag an nilauun aien, um erekhaigse an nobohtan: is aiji nimyiv an nuhup u intakata iyehki, is ubutpotet u naposvaig inhal o un aien, mika, yu wit apos inhal o un, yi caig yin.

⁵ Is apos inhalav atamaig aien, eris ati yin mika yi esjilid aien irai iji pece asega an mopul hat: eris imyiaridjai inhal o un ehele Atua im dorona o un.

⁶ Is aha pan an namasacen a intakata iyehki, is imyecrei inuarin imi yin eahki a Atua, mika eri alaan nitai caig eahki ara ira adiat inyi twelv huntret im sikste.

⁷ Eris ati nedoa an nohatag: is ago nedoa vai nimyiv a Maikel im ilpu agelo o un; is lep ago nedoa vai Maikel a nimyiv im ilpu agelo o un;

⁸ ja eris eti emda ara; is lep ti inuarin ura an nohatag.

⁹ Eris ethaig pan itac nimyiv alupas, is amen aien um itu, nidan Tiapolo, im Satana, aien aigki et efaifa aien va atimi asega an nobohtan: eris ethaig pan itac yin an nobohtan, eris lep erekhaig pan itac ilpu agelo o un ehelen.

¹⁰ Kis atahaijeg nohran alupas ainyak an nohatag, is ika, Et mun yetpam nitai imyiatamaig caija, im nemda, im nelcau o Atua uja, im natimi alupas u Kristo o un: eris idim ethaigse natimi atijai itai irai ilpu etoaija, is atijai itai ira ra aien an nuhup u Atua uja irai iji adiat im niji epeig:

¹¹ eris esjilid iran ara an ja irai Lam, im intas an nasuptecnaig ura; eris eti imyicoho ra ara, jam emesmas:

¹² va nitai ineigki namu cediaig aiek, ak nohatag, im lep aijaua eka amen iran aijaua: kaiheuc vai caua eka amen an nobohtan aijaua im lep an jop! et mun asuol sepam ehelemia a Tiapolo, et alupas intavaitap o un, va nitai ineig, nikavaig, et ato aien mika et ipjidipjid naopan o un.

¹³ Is wat ecetai a nimyiv, nikavaig, eris ethaigse yin an nobohtan, is atmas vai intakata iyehki aien, is apos inhalav atamaig o un aien.

¹⁴ Eris lep alupai intakata iyehki nehpan meijcop alupas is ero, mika yi ae pan aieu va nimyiv an namasacen an nuarin o un, eri alaan nitai caig iran an mesese inyi ethi, im lep niji mesese, im lep nahaijin mesese.

¹⁵ Is aoh an wai vai intakata a nimyiv, is idivaig nofowai, mika yi leh yin inwai.

¹⁶ Is atau imi intakata nobohtan; is asalgei nipjineucsen nobohtan, um umnyi inwai incig is aoh iran a nimyiv.

¹⁷ Is edemda vai intakata a nimyiv, um apan mika yi ati nedoa va nahaiji ilpu hal o un is aled, era imyiaiji intas alep o Atua ara, um apol an nasuptecnaig u Iesu Kristo.