Nitai ehvaig 11 - Intas Etipup

Nuarin-tas alupas 11.

¹ ERIS alupai nyak nauanieg is ethi, is idivaig niseuc: is aiji a nagelo, um ika, Atidai aiek, um asjaaicnaig an neom ahlap u Atua, im nefata, im lep ra era alaigaheni iran ara.

² Jam ude nimnim u neom ahlap, um jim asjaaicnaig iran: eris atceijaig imi nup urai iji taka pece: erupu auhi inuarin-pece itaup ara irai mohoc inyi forte tu.

³ Ekpu ati ohwat atimi asuptecnaig nyak et ero ainyak, mika eru ahidan tas arau ira adiat inyi twelv huntret im sikste, um aso rau ira apelumai ucai:

⁴ erau cai oliv et ero arau, im lep lamp et ero, erau aiji arau an nuhup u Atua ineig et o un nobohtan:

⁵ el et ika tah yi auahas rau, el et ahes an nipjineucserau incop, um auahas ilpu atimi tak atimi ira rau: maiya, el et ika tah yi auahas rau, eris idim ika uhpu atgei yin inyi ucce:

⁶ erau emda ahwat raigki natapanesvaig nohatag, vai yi jim ehe ira adiat iji ehki eraupu asuptecnaig intas iran arau: erau esjilid irai ofowai arau par ika yi ja; um lep auahas nobohtan irai iji itai has asega, erau wit merit arau.

⁷ Erau wit asuptecnaig ehni intas urau arau, etpu ati nedoa vai rau a nitai aleg ineig et ahes an nehpanitai ineig et eti ecetin nehni o un, um ahau rau, um atgei rau.

⁸ Etpu amen nohurau emesmas an nefalaig an nuarin-pece alupas ineig, er anvi nidan an tas ecsipece par ika Sotom im Ijipt, eris lep atgei Natimarid uja an nauincai atgeig eahki.

⁹ Erupu almoi nohurau ira adiat inyi eseij im nahaijin nadiat inyi ethi nahaiji ra ira atimi, im nup urai iji pece, im ilpu atimi auoh taka tas, im nup urai iji elcau, um acaiji atimi, mika eri jim atelmoi nohurau irai ehpaiitai.

¹⁰ Erupu imyiacitak vai rau ara era amen an nobohtan ara, um cediaig, um alupaig jipe ra niji itai tup ahtai; va nitai ineig, nikavaig, erus auoh ohocred ra eris amen an nobohtan ara ahwat aprofeta erahki.

¹¹ Is wat ti pan itac nadiat is eseij im nahajiu nadiat is ethi, is ati nesgarau an nohurau a Atua, mika eru nusjai; erus atidai arau, um aiji; eris imtitaig alupas atimi iji ehki eris alum rau ara.

¹² Erus atahaijeg nohran alupas an nohatag arau, is ika ehele rau, Aridji pam aijaurau igcaki. Erus aridjai arau an nepeig, um yetpan an nohatag; eris alum rau a ilpu atimi tak atimi ira rau.

¹³ An nuarin-nadiat iyehki is eteuc nomoi alupas, is eropse inuarin is ethi irai uarin is ten an nuarin-pece iyehki, eris atgei atimi is seven dausant an nomoi: eris imtitaig alupas natimi iji ehki eris aled ara, um imyiahpas Atua an nohatag.

¹⁴ Is ti pan itac nohocred is ero; ja etpu idim auroauro um yetpam nohocred inyi eche.

¹⁵ Is ahlai intoho o un a nagelo seven, is ahes an nohatag nohrai itai esjilid, um ika, Et elcau u Natimarid uja, im lep Kristo o un, niji elcau an nobohtan ineigki; etpu atimarid aien irai iji mesese.

¹⁶ Eris eropropse an nesganimtara a ilpu atimi tas alep is twente for iji ehki, eris ateuc irai itai ateuc ura ara an nuhup u Atua; eris alaigaheni vai Atua ara,

¹⁷ um ika, Ak Natimarid Atua emda acen, as upyi eteuc aiek, um lep eteuc an naopan ineig, jai napu lep eteuc aiek; ecra naurineig vai euc aijama, va nitai ineig, nikavaig, na mun leh nemda alupas unyum aiek, um atimarid:

¹⁸ eris edemda nup urai iji pece, et mun yetpam intavaitap unyum, im nadiat u ilpu atimi emesmas, mika an almaijidjid nedo ura aiek, um aru nedo upene u ilpu profeta iji eig eris aheca unyum ara, im lep ilpu atimi upene, im lep ra era imtitaig nidam ara, tup atimi im ilpu atimi alupas; um auahas ra era auahas nobohtan ara.

¹⁹ ERIS asalgei neom ahlap u Atua an nohatag, eris ecetai anliin neom ahlap o un nelcau an tas-etipup o un: is eteuc nawainapit, im nohrai itai, im inmunuka, im nomoi, im incaupda hat alupas.