Nitai ehvaig 10 - Intas Etipup

Nuarin-tas alupas 10.

¹ KIS ecet nagelo emda is ethi is eche ainyak, is ahes an nohatag aien um asuol, is ataluopni yin nepeig: is isjis an nidjinin inhuterau, um idivaig nagesega nesganimtan, um lep idivaig noboatau cop neduon ero:

² is apos inhaklin nitasvitai an nikman aien eris algei: is ati neduon inmatan an jop aien, im neduon inmoon an nobohtan.

³ Is ahlaig ijinies aien is idivaig naunyauwaig u laion: is wat ahlaig aien, is ehceseven atceteuc inmunuka, um tas.

⁴ Is wat ehceseven atceteuc inmunuka um tas, kis ika ainyak ki aged: kis atahaijeg nohran tah is ethi ainyak is ahes an nohatag, um ika ehelek, Adenaig nitai iji eigki aiek is asaig inmunuka is seven iji eigki, um jim aged.

⁵ Is adaigjai nikman an nohatag a nagelo iyehki kis ecet yin ainyak naijivaig an jop, im lep an nobohtan,

⁶ is asig yi aktit intas aien vai yin et umoh aien irai iji mesese, is ago nohatag aien, im niji itai amen iran, im nobohtan im niji itai amen iran, im injop im niji itai amen iran, um ika, Etpu ti amen naopan ineig:

⁷ ja an naopan iyehki an nohran nagelo seven, et wit ahlai intoho o un aien, uhpu ehneijid nitai incig is adenaig a Atua, is idivaig is asuptecnaig ehele ilpu profeta aien, eris aheca o un ara.

⁸ Is lep tas ehelek nohran iyehki kis atahaijeg ainyak an nohatag, um ika, Apan aiek, um leh inhaklin nitasvitai eris algei an nikma nagelo ineig et aiji an jop aien im lep an nobohtan.

⁹ Kis apan ehele nagelo ainyak, um ika ehelen, Alupai nyak inhaklin nitasvitai inaico aiek. Is ika ehelek aien, Leh aiek, um caig ehni; etpu has nipjinetgam aiek vaig, ja etpu aiyu, um idivaig hune, an nipjineucsum.

¹⁰ Kis leh inhaklin nitasvitai iyehki ainyak an nikmai nagelo, um caig ehni; is aiyu an nipjineucsek, um idivaig hune: ja kis wat caig ainyak, is has nipjinetgak.

¹¹ Is ika aien, Eris idim ika napu lep asuptecnaig intas o Atua aiek va nup urai iji pece inyi ahinag, im nup urai iji elcau, im ilpu atimi auoh taka tas, im ilpu atimarid.