Nitai ehvaig 1 - Intas Etipup

Nuarin-tas alupas 1.

¹ NITAI ehvaig u Iesu Kristo, is alupai yin a Atua, mika yi asuptecnaig aien ehele ilpu aheca o un nitai iji eigki eris idim ika inyi ti laulau um yetpam; is lep abrai nagelo o un aien, mika yi asuptecnaig aien ehele Joanes naheca o un:

² aien aigki is tas aien vai intas o Atua, im lep va nasuptecnai Iesu Kristo, im lep va niji itai asega is ecetai aien.

³ Et mun ahesmoij natimi ineig et esvi intas iji eigki eris upyi asuptecnaig aien, im lep ra era atahaijeg, um aminjinaig nitai iji eigki er aged iran: et mun ubutpotet u naopan iyehki.

⁴ AK nup urai ekalasia an nuarin-pece et seven an pece Esya, ek aiheuc vai caua ainyak Joanes: Etmu amen ehelemia naiheuc im neigpa ineig et ahes ehelen, is upyi eteuc aien, um lep eteuc an naopan ineig, ja etpu lep eteuc aien; im lep ehele Nesgan et seven era amen ara an nuhup u dorona o un;

⁵ im lep ehele Iesu Kristo, natimi asuptec naiginivaijec, um metto irai ilpu atimi anusjai vai inmas ura, um esjilid irai ilpu atimarid an nobohtan. Aien aigki is aiyu inliinmopon aien vai caija, um yiri caija vai edo has uja an ja iran,

⁶ um ikni caija, mika ti ilpu atimarid akaija, um ilpu atimi ahlap u Atua Etman; etpu esjilid aien, um lep atimarid, irai iji mesese. Emen.

⁷ ¶ Etpu idim ham aien irai epeig; erupu ecet yin atimi asega, im lep ra eris ahcai yin ara: erupu aunyauwaig vai yin nup urai iji pece asega an nobohtan. Maiya, Emen.

⁸ Ek Alfa ainyak um lep Omeca, natupun u itai um lep nehni u itai, et ika a Natimarid ineig, is upyi eteuc aien, um lep eteuc, an naopan ineig, ja etpu lep eteuc aien; et idim emda acen aien.

⁹ Ek Joanes ainyak etoamia, ek lep apah vai caua ainyak an nohocred uja, im lep an nelcau u Iesu Kristo, im nedo eti auatiemda o un, kis amen ainyak an haklin-pece iyehki, nidan Patmos, vai intas o Atua, im lep va nasuptecnai Iesu Kristo.

¹⁰ Kis ahuumtidec ainyak an nadiat u Natimarid, um atahaijeg nohran esjilid an nidjik, is idivaig intoho,

¹¹ is ika, Ek Alfa ainyak um Omeca, natimi uhup um lep natimi apitac: Namu aged aiek an nitasvitai nitai iji eigki na mun ecetai aiek, um imyiapan ehele ekalasia an nuarin-pece et seven an pece Esya, nikavaig, Efesus, im Smirna, im Percamos, im Daiataira, im Sartis, im Filatelfea, im Leotesia.

¹² Kis ahidai nyak ainyak, mika ki ato nohoan iyehki is tas ehelek. Kis wat ahidai nyak ainyak, um ecetai lamp colt is seven;

¹³ im lep tah is ethi juju an niblai lamp is seven, et idivaig Inhal o natimi, is amen iran napelumai um ahlause u neduon, im lep nitai ahid colt an nijihgan.

¹⁴ Is ahi numri nidjinin, um idivaig numri siip ahi, is idivai sno nidjinin; um idivaig incopre nesganimtan;

¹⁵ is idivaig bras naunau neduon, eh wat ahen an cop; is idivaig inmotjan jop alupas nohran;

¹⁶ is amen an matan inmoijeuv is seven; is ahes an nipjineucsen nauitoga is arig nahaijin im nahaijin: is idivaig nagesega nesganimtan an nememina alupas o un.

¹⁷ Kis wat ecet yin ainyak, kis eropse u neduon ainyak, um idivaig natimi mas. Is atijai inmatan aien irak, um ika ehelek, Jim imtitaig aiek; ek atimi uhup ainyak, um lep atimi apitac:

¹⁸ ek atimi umoh ainyak; kis mas ainyak; ja ekpu idim umoh ainyak irai iji mesese. Emen. Et lep amen ehelek kii urin umatmas im inmas.

¹⁹ Aged nitai iji eigki aiek na mun ecetai aiek, im nitai iji eigki et eteuc, im nitai iji eigki etpu eteuc an ti pan itac vaig nitai iji eigki;

²⁰ nikavaig, nitai adenaig vai moijeuv et seven, na mun ecetai aiek an matak, im lep lamp colt et seven. Era ilpu agelo irai ekalasia an nuarin-pece et seven inmoijeuv et seven; et lep ekalasia an nuarin-pece et seven lamp et seven, na mun ecetai aiek.