Nihemaia 9 - Intas Etipup

Nuarin tas alupas 9.

1 Nadiat atwakam inveijec, era adumoij an liinmopora natimi. 4 Ara alaigaheni a ilpu mapoi Livai, um asuptecnaig upene nedo aiheuc u Atua vai ra im nedo has ura.

¹ ERIS asjapicnaig a nup Isreel an nadiat twente ford an mohoc, inigki, um atwakam, um aso ra ira apelumai uucai, um ehrinma irai idjinira.

² Eris amen eche a nup Isreel irai up urai pece, um aiji um asuptecnaig nedo has ura, im nedo has u ilpu retpora.

³ Eris atidai ara an nuarin ura, um esvi an nitaasviitai an tas alep u Ihova Atua ura, um ahes an nadiat meto um yetpan an nadiatadiat; eris lep asuptecnaig nedo has ura ara, um ahes an nadiatadiat um yetpan an jupki, eris lep imiahpas: Ihova Atua ura ara.

⁴ Eris aiji irai efalaig irai ilpu mapoi Livai ara sji igki; nan, Josua, im Benai, im Katmiel, im Sebanaia, im Bunnai, im Serebaia, im Benai, im Kenanai, um ahlaig vai Ihova Atua ura an nohrara ijinies.

⁵ Eris tas a ilpu mapoi Livai iji igki; nan, Josua, im Katmiel, im Benai, im Hasabnaia, im Serebaia, im Hotaija, im Sebanaia, im Pedahaia, um ika, Atidai aijaua um imiahpas Ihova Atua unyimia irai iji mesese: eris lep ika ara, Ak Atua, naaurinig va nidam esjilid, et esjilid acen irai tas acis yi alwai asega im nimiahpas.

⁶ Nai idim Ihova aiek ache; as ago nohatag aiek, nohatag ijinies acen, im niji itai asega iran, im nobohtan, im niji itai asega iran, im injap, im niji itai asega iran, na lep aminjinaig nitai iji igki asega i aiek; era lep imiahpas euc a ilpu agelo an nohatag.

⁷ Nai idim Ihova aiek Atua unyima, as ehtai Ebram aiek, um atipagki yin an pece Ur u nup u Kaltia, um anvi nidan par ika, Ebraham;

⁸ um lep ato mika is inveijec inliinmopon an nuhup unyum, um asan tas etipup unyum ehelen mika an alupai yin inpece u nup u Kenan, im nup u Hed, im nup Emor, im nup u Piris, im nup u Jibus, im nup u Circas, um alupai ilpu mapon; as ehneijid intas unyum aiek; nai idim inveijec aiek:

⁹ um lep almoi nohocred u ilpu retpoma an pece Ijipt, um atahaijeg intaig ura u injap cap;

¹⁰ um ehvaig niji itai asjaaicnaig, im nedo imiali irai Fero, im lep irai ilpu aheca o un, im lep ira atimi asega an pece o un: as ato aiek mika eris ago nedo ijinies ara vai ra. Eris imiahpas nidam, et idivaig an nopan inig.

¹¹ As atiakoai injap aiek an nuhup ura, eris lep atga an niblan jap ara an nobohtan mese; as lep erekhaigse ilpu atimi ehcerucai ra aiek irai uarin ubo, et idivaig inhat an tup ahuahau.

¹² As lep atau ira ra aiek an nadiat an nalucupahas; im lep an nepig an nalaume u incap, mika yi lah vai ra an nefalaig eri atga iran ara.

¹³ As lep asuol an nedoon Saine aiek, um tas ehele ra an nohatag, um ikni ehele ra nedo atoh, im intas alep inveijec, im intas aktit upene, im intas eris asaig:

¹⁴ um asuptecnaig ehele ra nadiat atumop upene unyum, um asaig ehele ra intas eris asaig, im intas aktit, im intas alep, an nikmai Moses naheca unyum:

¹⁵ um alaa ra nitai caig an nohatag va numlaig ura, um imiaridjai inwai an hehteuc lumara, um asan tas upyi asaig un-yum ehele ra, mika erupu apan ara an pece iyehki as asan tas aktit unyum vaig ehele ra.

¹⁶ Ja eris ago nedo ijinies ara im ilpu retpoma, um imipalea, um eti atahaijeg intas alep unyum,

¹⁷ um eti imiaiji, eris lep eti aktaktai nedo imiali unyum ara as ago aiek ehele ra; ja eris imipalea ara, um ati natimi alupas imi ra an liinmopora ahnag mika eri adumoij ara u nauanaheca ura: ja na Atua iknipagki nedo has aiek, um aiheuc va atimi, um eti eriss ira ra, um eti fi atavaitap, um esjilid naiheuc unyum, um eti udei ra.

¹⁸ Maiya, eris ago inhakli kurimatau irai colt ara, um ika, Atua unyimia nigki is iknipagki caua an pece Ijipt aien, um ago nedo auahas inliinmopom esjilid ara;

¹⁹ ja as eti udei ra aiek an namasacen an nedo aiheuc esjilid unyum: is eti udei ra nalucupahas an nadiat, par asjaaicnaig an nefalaig imi ra; im lep nalaume u incap an nepig, mika yi lah an nefalaig erupu atga iran ara.

²⁰ As lep alupai ra Nesgam Upene aiek par esege imi ra, um eti imiaaij manna incara, um alumara inwai.

²¹ As idim aminjinai ra aiek irai mesese is forte an namasacen, eris eti ilikin natimi ara an tah nitai; is eti mohtan napelumai ura, is lep eti atop neduora.

²² As lep alupai ra niji elcau aiek im niji pece, um akaro ira ra: eris ohuun inpece u Saihon ara, natimarid Hesbon, im inpece u Oc natimarid Besan.

²³ As lep ika aiek eri ahinag a ilpu hal ura et idivaig inmoijeuv an nohatag, um imiapan ra an pece iyehki, as upyi tas vaig aiek ehele ilpu retpora, mika erupu apan ara um ohuun.

²⁴ Eris apan um ohuun inpece a ilpu mapora, as lep imiasuol an nuhup ura nup uran pece aiek, nup u Kenan, um ikni ra irai ikmara, im ilpu atimarid ura, im nup uran pece, mika eri ago ira ra ara is idivaig inmerit ura.

²⁵ Eris atoraliak niji maliyum ipjin ara, im inpece upene, um ohuun niji eom is ohua inpadiaig asega iran, im niji ehpaiwai eris ucji, is lep ahinag nokoro vaine, im nokoro oliv, im nauicai oho: eris hag ara, um geije, eris amen upene ara, um imiacitak nedo upene esjilid unyum.

²⁶ Ja eris imipalea ara, um ahnag an nuhup unyum, um ethaig pan itac intas alep unyum, um atgei ilpu profeta unyum, eris ated ra ara mika eri imiadumoij pam ra ehelum; eris lep ago nedo auahas inliinmopom esjilid ara.

²⁷ Va nitai inigki as ikni ra aiek irai ikmai ilpu atimi tak atimi ira ra, eris ehcerucai ra: ja eris wat ahlaig vai euc ara an nopan ohocred ura, as atahaijeg intas ura aiek an nohatag; as lep ikni ilpu atimi imiatamai ra aiek an naiheuc esjilid unyum, eris imiatamai ra ara vai ilpu atimi tak atimi ira ra.

²⁸ Ja eris wat atumop ara, eris lep ago nedo has ara an nuhup unyum: va nitai inigki as udei ra aiek irai ikmai ilpu atimi tak atimi ira ra, mika eri esjilid ira ra ara: ja eris wat adumoij ara, um ahlaig vai euc, as atahaijeg intas ura aiek an nohatag; um ecahinag imiatamai ra va naiheuc unyum;

²⁹ um ated ra, mika eri lep adumoij pam u intas alep unyum ara: ja eris ago nedo ijinies ara, um eti atahaijeg intas alep unyum, jam ago nedo has vai nedo unyum, (el et ago tah natimi, etpu umoh vaig aien;) um eti imiaiji, um ago ipjin inliinmopora, um eti atahaijeg.

³⁰ Ja as eti auatiemda aiek vai ra irai mesese is ahinag, um ated ra an Nesgam Upene irai ilpu profeta; ja eris eti atahaijeg ara: va nitai inigki as ikni ra aiek irai ikmai nup urai pece.

³¹ Ja as eti auahas ehni ra aiek, um eti udei ra, va naiheuc esjilid unyum; na Atua aiheuc va atimi aiek, um eti eriss ira ra.

³² Ak Atua unyima, na esjilid aiek, um emda, er lep imtitai euc, na apos intas etipup aiheuc aiek, etmu jim idivaig nitai haklin an nuhup unyum nohocred asega inigki is yetpam irama, im ilpu atimarid unyima, im ilpu atimi alupas unyima, im ilpu atimi ahlap unyima, im ilpu profeta unyima, im ilpu retpoma, im natimi asega unyum, ahes an nopan u ilpu atimarid Asiria um imihum pam an nopan inig.

³³ Ja et atoh nedo unyum irai iji itai asega is yetpam irama; et upene nedo unyum, ja ecris ago nedo has aijama:

³⁴ eris lep eti apos intas alep unyum, um eti atahaijeg intas as asaig aiek, im nedo unyum as ated ra vaig, a ilpu atimarid unyima, im ilpu atimi alupas unyima, im ilpu atimi ahlap unyima, im ilpu retpoma.

³⁵ Eris eti aheca unyum ara an nelcau ura, as alupai ra aiek an naiheuc esjilid unyum, im lep an pece alupas um upene as ati an nuhup ura aiek, um eti udei niji auritai has ura.

³⁶ Ecra idim ilpu aheca aijama an nadiat inigki, an pece inig as alupai ilpu retpoma aiek mika eri caig nohwai itai iran ara im niji itai upene, ecra ilpu aheca iran aijama:

³⁷ et lep ohwai itai upene vai ilpu atimarid as iknijai ra aiek irama va nedo has unyima: era esjilid irai ohuma ara, im niji itai eklim edo irai pece unyima, et idivaig inmerit u inliinmopora, ecra lep ohocred aijama.

³⁸ Va nitai iji igki asega ecra asan tas etipup ipjin aijama, um aged; era lep ati nitai asjaaicnaig iran a ilpu atimi alupas unyima, im ilpu mapoi Livai, im ilpu atimi ahlap.