Nihemaia 8 - Intas Etipup

Nuarin tas alupas 8.

1 Era esvi intas alep u Atua ara um atahaijeg, um ecen vaig. 9 Era ago eropse inliinmopoi atimi ara. 13 Era merit alupas natimi par atahaijeg um leh nesege imi ra. 16 Era apos nasjapicnaig u niyum uriicai ara.

¹ ERIS asjapicnaig natimi asega et idivaig natimi et ethi an nefalaig an nuhup u neucse nathatahau vai wai; eris asaig ehele Esra natimi aged tas ara, mika yi imiapam nitaasviitai an tas alep u Moses, is asaig a Ihova ehele nup Isreel.

² Is imiapam intas alep a Esra natimi ahlap an nuhup u atimi asega, ilpu atamaig im ilpu takata, im lep ra asega is eteuc lelra par ato itai, an nadiat uhup au mohoc sevend.

³ Is esvi iran aien u nefalaig au nuhup u neucse nathatahau vai wai, um atupun an nuhialeg um yetpan an nadiatadiat, an nuhup u ilpu atamaig im ilpu takata, im lep ra is eteuc lelra par ato itai; eris atahaijeg upene intas an nitaasviitai an tas alep natimi asega.

⁴ Is aiji a Esra natimi aged tas an nefata, eris ago ara mika yi aiji iran; eris aiji an matau a Matidaia, im Sima, im Aseaia, im Uraija, im Hilkaia, im Measiya; eris lep aiji an mauun a Piteya, im Miseel, im Malkaia, im Hesum, im Hasbatena, im Sekaraia, im Misullam.

⁵ Is algei nitaasviitai a Esra an nuhup u atimi asega; (is ijinies aien ira atimi asega;) is wat algei aien eris atidai natimi asega:

⁶ Is naaurinig a Esra vai Ihova, Atua esjilid: eris lep ika natimi asega, Emen, Emen, um adaigjai nikmara: um atpuse u nobohtan, um imiahpas Atua.

⁷ Eris aihi yi opdicraig intas alep ehele atimi a Josua, im Benai, im Serebaia, im Jemin, im Akkub, im Sabbede,im Hotaija,im Measiya, im Kelita, im Asaraia, im Josabat, im Henan, im Peleaia, im lep ilpu mapoi Livai: eris lep aiji natimi au nuarin ura.

⁸ Eris esvi upene ara an nitaasviitai an tas alep u Atua, um asuptecnaig nesgantas, um aihi yi updicraig intas eris esvi.

⁹ Eris tas ehele atimi asega a Nihemaia natimi alupas, im Esra natimi ahlap im natimi aged tas, im ilpu mapoi Livai eris esege imi atimi ara, um ika, Et itap nadiat inigki vai Ihova Atua unyimia; jim ohocred, um jim taig. Eris idim taig natimi asega, eris wat atahaijeg intas an tas alep ara.

¹⁰ Is ika ehele ra aien, Apan aijaua, um hag niji itai upene, um umnyi niji itai aiyu, um ahtai nahaijin imi ra eris eti imiyecrei itai vai ra: et itap nadiat inigki vai Natimarid uja: jim ohocred aijaua; imiacitak Ihova va akupu emda aijaua.

¹¹ Eris acaiji atimi asega a ilpu mapoi Livai, um ika, Akumu atinau aijaua, et itap nadiat inigki; um jim ohocred.

¹² Eris atga ura natimi asega, um apan, um hag, um umwig, um ahtai nahaijin imi atimi, um imiacitak alupas, va nitai inigki, nikavaig, eris ato intas ara eris asaig ehele ra.

¹³ Eris asjapicnaig pan ehele Esra natimi aged tas an nadiat sekunt a ilpu atimi alupas esjilid ira atimi asega, im ilpu atimi ahlap, im ilpu mapoi Livai, mika eri ato intas an tas alep ara.

¹⁴ Eris ecetai ara mika eris aged an tas alep is asaig a Ihova irai Moses, mika eri amen a uup Isreel irai eom araho an nasjapicnaig an mohoc sevend:

¹⁵ um tas um asaig irai iji maliyum ura, im lep Jerusalem, um ika, Apan aijaua an nedoon, um lucsei inrai oliv, im inrai eijiv, im inrai mirtel, im neri eaig, im inrai cai alupas, um ago neom araho iran, et idivaig eris aged.

¹⁶ Eris apan natimi, um lucsei, um ago eom araho ijinies irai iji lola eom ura asega, athi um athi ehni; im lep irai imnim ura, im lep anliin nokoro an neom u Atua, im lep an nefalaig u neucse nathatahau vai wai, im lep au nefalaig u neucse nathatahau Ifreem.

¹⁷ Eris ago neom araho natimi asega eris lucsei pan ra ja eris lep adumoij ara, um ateuc irai eom araho ura: eris eti ago nitai inigki a nup Isreel an nopan umoh u Josua inhal u Nun um uhum pam. Is esjilid acen nimiacitak u atimi.

¹⁸ Is esvi an nitaasviitai an tas alep u Atua aien irai iji adiat, um atupun an nadiat uhup, um yetpan an nadiat apitac. Eris aminjinaig nasjapicnaig iyehki ara ira adiat is seven; is lep itap nasjapicnaig an nadiat eetd, is idivaig eris asaig.