Nihemaia 6 - Intas Etipup

Nuarin tas alupas 6.

1 El ika a Sanballat yi imiimtacimtac Nihemaia an nedo efaifa, im ilpu atimi hos tas, im ilpu profeta era leh nimtan o un ara. 15 Era ago ehni nauritai ara, ja era imtitaig alupas vaig a ilpu atimi tak atimi ira ra. 17 Era tas jipe jam adenaig a ilpu atimi tak atimi ira ra im ilpu atimi alupas u nup u Juta.

¹ ERIS wat atahaijeg a Sanballat, im Tobaia, im Cisem nup Arebia, im lep ra asega, eris edemda ara vai cama, nikavaig, kis ehteduo nathatahau ainyak, um tiih nuarin atiteuc iran; (ja kis eti fi aduwi niji tapnes iran ainyak an nopan iyehki;)

² Erus imiapam intas ura ehelek a Sanballat im Cisem, um ika. Apam aiek, taijpu asjapicnaig akataij an tah maliyum an nuarin marara Ono. Ja erus aktaktai arau mika eru ago tah nedo has vai nyak arau.

³ Kis abraig pan atimi ehele rau ainyak, um ika, Ek par ago nauritai esjilid ainyak, et elika vai nyak napan vaig: inki a uri ainyak nudei vaig nauritai, um apan ehelemirau?

⁴ Ja eris ecefor imiapam intas urau ehelek is idivaig inigki; kis lep tas ehele rau ainyak is idivaig iyehki.

⁵ Is lep ecefaiv abraig pam ehelek naheca o un a Sanballat, is apos an nikman nitaasviitai eris eti atapnes;

⁶ eris aged iran, nikavaig. Era ika a nup urai pece, et lep ika a Cisem, na aktaktai aiek im nup u Juta, mika aki imipalea aijaua: va nitai inigki na ehteduo nathatahau aiek, va apu atimarid ura aiek, et idivaig intas iji igki.

⁷ As lep ikni ilpu profeta aiek par tas vai euc Jerusalem, um ika, Et eteuc a natimarid an pece Juta: uhpu asaig ehele natimarid inyi idivaig intas iji igki. Apam aiek, intupu tastas jipe akaijau.

⁸ Kis imiapan intas unyak ehelen ainyak, nikavaig, Et eti ago nitai iji igki na asaig aiek, et tup ehlohos nitai iji igki an liinmopom.

⁹ Eris imiimtacimtac cama ara asega, um ika, Etpu auatialidi nikmara u nauritai, va eri jim ago. Ak Atua, namu ago emda nikmak aiek.

¹⁰ Kis apitac ainyak um apan an neom u Semeaia inhal a Teleaia inhal u Mihetabel, is atapnes iran aien; is ika aien, Intumu ehtet anliin neom u Atua akaijau, anliin neom ahlap, um atapnes intapnes an neom ahlap: erupu ham ara um atgei euc; erupu idim ham ara an nepig um atgei euc.

¹¹ Ja kis ika ainyak, Et eti upene vai natimi et idivaig nyak naha vaig, di nigki, et idivai nyak, etpu apan aien anliin neom ahlap um imiatamaig yin? Inki eti apan ainyak anliin neom itap.

¹² Kis idim ato ainyak mika is eti abrai yin a Atua; ja is asan tas inigki aien vai nyak: va nitai inigki, nikavaig, erus alupai yin nimtan a Tobaia im Sanballat.

¹³ Eris idim alupai yin nimtan, mika ki imtitaig ainyak, um ago nitai inigki, um ago nedo has, va etpu eteuc tah nitai eri tas has vaig, mika eri tas has vai nyak ara.

¹⁴ Ak Atua unyak, namu aktaktai Tobaia im Sanballat aiek et idivaig niji auritai urau, im lep naprofeta takata Noataia, im lep hal ilpu profeta, eris ika ara eri imiimtacimtac nyak ara.

¹⁵ Eris ago ehni nathatahau an nadiat twente fiftd an mohoc Hul, ira adiat is fifte tu.

¹⁶ Eris wat atahaijeg a ilpu atimi tak atimi irama, eris wat lep almoi a nup urai pece asega arehed irama, is auatialidi inliinmopora ara: eris idim ato ara mika is ago nauritai inigki a Atua.

¹⁷ Eris lep imiapan nitaasviitai is ahinag imi Tobaia a ilpu atimi alupas u nup u Juta an nopan iyehki, eris lep lucsei niji itaasviitai u Tobaia ara.

¹⁸ Eris idim asan tas aktit ura ehelen natimi is ahinag u nup u Juta, is ohanig u Sekanaia aien inhal u Era; is lep leh inhalav atahig u Misullam inhal u Berekaia a Johenan inhal o un.

¹⁹ Eris lep asaig ehelek niji auritai upene o un ara, um asuptecnaig ehelen intas unyak. Is imiapam niji itaasviitai ehelek a Tobaia par imiimtacimtac nyak.