Nihemaia 5 - Intas Etipup

Nuarin tas alupas 5.

1 Era asan tas ehti a nup u Juta, um ika et ehka vai ra par aru mune inig eris leh, eris ahtai nobohtan ura ara, era aheca ara. 6 Et acaiji ilpu atimi ahtai itai a Nihemaia, um ika eri asan tas etipup ara, mika eri imiadumoij itai. 14 Et atcijaig nimtan o un aien, um alaa atimi et ahinag.

¹ ERIS tastas alupas natimi, im ehgara, vai ilpu etwara nup u Juta.

² Maiya, eris ika hal ra, Ecra ahinag aijama, im ilpu halav atamaig unyima, im ilpu halav atahig unyima: va nitai inigki ecra lucsei korn aijama incama, mika ecri caig aijama um umumoh.

³ Eris lep ika hal ra, Ecris ahtai umama aijama, im nokoro vaine unyima, im neom unyima, mika ecri auanimtai korn aijama, va numlaig has inigki.

⁴ Eris lep ika hal ra, Ecris ugyi mune aijama par lep aru va nakwanaham imi natimarid, irai umama im nokoro vaine unyima.

⁵ Ja et tup ethi ache nago irama im lep irai ilpu etwama, era lep idivaig ilpu hal ura a ilpu hal unyima: ja ecra ahtai ilpu halav atamaig unyima im ilpu halav atahig unyima, mika eri ilpu aheca ara, er idim ohuun hal irai ilpu halav atahig unyima: et lep ehka vai cama nauarimta ra vaig; era idim ohuun umama im nokoro vaine unyima a ilpu atimi et eche.

⁶ Kis edemda alupas ainyak, kis wat atahaijeg nahlaig ura ainyak, im intas iji igki.

⁷ Kis aktaktai an liinmopok ainyak, kis lep acaiji ilpu atimi esjilid ainyak, im ilpu atimi alupas, um ika ehele ra, Eka lucsei nimtan ehele ilpu etwamia aijaua asega, athi um athi ehni. Kis lep asjapicnaig natimi is ahinag ainyak vai ra.

⁸ Kis ika ehele ra ainyak. Et idivaig nemda unyima, ecris auanimtai ilpu etwaija nup u Juta aijama, eris ahtai ra imi ilpu atimi apat; akupu lep ahtai ilpu etwamia aijaua, ka? uhpu lep ahtai ra imi caija, ka? Ja eris eti tas ara, is tiih intas ura.

⁹ Kis lep ika ainyak, Et eti upene nitai inig eka ago aijaua: akumu imtitai Atua uja aijaua, vai intas has u nup urai pece ilpu atimi tak atimi iraija.

¹⁰ Is eti elika vai nyak, im ilpu etwak, im ilpu aheca unyak, in-lucsei vaig mune im korn ura: ek ugyi caua ainyak, mika aki jim lucsei nimtan esjilid aijaua.

¹¹ Akumu imiadumoij pan ehele ra aijaua, an nadiat inigki, umara, im nokoro vaine ura, im nokoro oliv ura, im neom ura, im lep na-haijin mune, im korn, im nide vaine, im narakei oliv, eka lucsei ehele ra aijaua.

¹² Eris ika ara, Ecrupu idim imiadumoij pan ehele ra aijama, um eti ahilek tah nitai ehele ra; ecrupu idim ago aijama et idivaig na mun asaig aiek. Kis ahlaig ainyak vai ilpu atimi ahlap, um leh intas aktit ura, nikavaig, erupu ago ara et idivaig intas upyi asaig inigki.

¹³ Kis lep eucjeucjaig napelumai unyak ainyak, um ika, Etmu eucjeucjaig natimi asega et uce a Atua irai iji eom ura, im lep ira auritai ura, era eti ehneijid intas upyi asaig inigki ara, uhmu eucjeucjaig ra et uce mika eri ihki atimi ara. Eris ika natimi asega, Emen, um imiahpas Ihova. Eris ago natimi is idivaig intas upyi asaig inigki.

¹⁴ Kis idim eti caig nitai caig u natimi alupas ainyak im ilpu etwak, an nopan iyehki eris ati nyak mika ki atimi alupas ura ainyak an pece Juta um imihum pam an nopan inig, um ahes an mesese twentied um yetpan an mesese dirte sekunt irai Artakserkses, nikavaig, inmesese is twelv.

¹⁵ Ja eris ehtipidai atimi a ilpu atimi alupas eris upyi hup irak ara, um lucsei nitai caig ura im nide vaine ura, im lep sikel irai silver is forte; eris lep tastas alep vai nup uran pece a ilpu aheca ura; ja kis idim imtitaig Atua ainyak, um eti ago nedo inigki.

¹⁶ Kis lep ecen an nauritai an nathatahau inigki ainyak, ecris lep eti auanimtan tah nuarin nobohtan aijama: eris lep asjapicnaig pam u nauritai a ilpu aheca asega unyak.

¹⁷ Im lep inig, eris lep hag ehelek a nup u Juta im ilpu atimi alupas is wun huntret im fifte (150), im lep nup urai pece arehed irama eris ham ehelema ara.

¹⁸ Eris imiyecrei kurimatau is ethi im siip upene is siks incama irai iji adiat; eris lep imiyecrei niji jaa incama, im lep niji obotpot nide vaine alupas irai iji adiat tend: ja kis eti lucsei nitai caig u natimi alupas ainyak, vaig inig nikavaig, is opoc nauritai u natimi iji igki.

¹⁹ Aktaktai nyak, ak Atua unyak, um acis yi alwai nyak, et idivaig nitai iji igki asega kis ago ainyak va natimi iji igki.