Nihemaia 4 - Intas Etipup

Nuarin tas alupas 4.

1 Era wat imiafakahcil a ilpu atimi tak atimi iran, et alaigaheni a Nihemaia, um ago nauritai. 7 Et wat ato nedemda im intas alwai u ilpu atimi tak atimi iran aien, et ikni ilpu atimi aminjinaig itai aien. 13 Et alupai ilpu atimi ago nauritai nij va atimi aien, 19 um asan tas alep an nedoa.

¹ JA is wat atahaijeg a Sanballat, nikavaig, ecris ehteduo nathatahau aijama, is atavaitap aien, um edemda alupas, um imiafakahcil nup u Juta.

² Is tas aien an nuhup a ilpu etwan im ilpu eucsupo Sameria, um ika, Era ago inhe a nup u Juta auatialidi iji igki? era ago nitai imiatamai ra ara, ka? erupu lep ati nitai ahlap ara, ka? erupu ago ehni ara an nadiat yi ethi, ka? erupu lucsei hat ara irai iji irai hat oplecoplec iji igki eris atnamud, ka?

³ Is amen ehelen a Tobaia nup Amon, um ika, El et aridjai kuri aleg an nuarin inig eris actaig ara, echedeliekse nathatahau ura.

⁴ Ak Atua, atahaijeg aiek; er idim amcel vai cama: namu imiadumoij pan ira ra intas has ura aiek; um atcijai ra mika eri lucsei pan ra irai iji pece:

⁵ um jim adahpoi nedo has ura, um jim ohpodohpod nedo has ura an nuhup unyum: eris auahas inliinmopom ara an nuhup u ilpu atimi actaig nathatahau.

⁶ Ecris idim actaig nathatahau aijama, um ahtadgai iran asega an nahaijin: eris auritai natimi an liinmopora emda.

⁷ Eris wat atahaijeg a Sanballat, im Tobaia, im nup Arebia, im nup Amon, im nup Astot, mika eris ehteduo nathatahau Jerusalem, um atapnes niji uarin atiteuc, eris edemda alupas ara,

⁸ um ehrahti mika eri apan ara asega um ago nedoa vai Jerusalem, um atapnes nauritai.

⁹ Ja ecris ago nalaigaheni aijama vai Atua unyima, um ikni ilpu atimi ehlad irai iji adiat im niji epig vai ra.

¹⁰ Eris ika a nup u Juta, Et mun tiih nemda u ilpu atimi apos itai, et lep ahinag nohok; et ehka vai cama nagovaig nathatahau.

¹¹ Eris lep ika a ilpu atimi tak atimi irama, Eri eti ato ara, um eti almoi, ja ecrupu apan aijama irai iblara, um atgei ra, um atapnes nauritai.

¹² Eris ham a nup u Juta eris amen ehele ra ara, um ecahinag asaig ehelema, um ika, Erupu ahes irai iji uarin amen ura ara um apam, um aat irama.

¹³ Va nitai inigki kis ikni atimi ainyak an yipin nathatahau irai iji uarin ubo, im lep irai iji uarin ijinies, kis idim ikni ra ainyak is idivaig neteuc ira ra, is amen ehele ra nauitoga ura, im inmopul ura, im inceen nefana ura.

¹⁴ Kis eas ainyak, um atidai, um tas ehele atimi esjilid, im ilpu atimi alupas, im natimi asega, um ika, Jim imtitai ra aijaua: aktaktai Ihova et esjilid aien, er lep imtitai yin, um imiaras ilpu etwamia, im ilpu halav atamaig unyimia, im ilpu halav atahig unyimia, im ilpu ehgamia, im nup an nimnim unyimia.

¹⁵ Eris wat atahaijeg a ilpu atimi tak atimi irama, mika ecris ato aijama, mika is lep auahas naktaktai ura a Atua, ecris adumoij pan aijama asega u nauritai an nathatahau.

¹⁶ Eris ago nauritai nahaiji ilpu aheca unyak an nopan iyehki um imihum pam an nopan ehneijai, eris lep apos inmopul, im niji itai ahtaipup, im inceen nefana, im niji cetpoi nauinwara nahaijira; eris lep amen a ilpu atimi alupas ehele nup u Juta asega.

¹⁷ Eris auritai an nahaijin nikmara is ethi, jam apos nij va atimi an nahaijin nikmara is ethi, a ilpu atimi actaig nathatahau, im ilpu atimi apos itai, im ilpu atimi ikni jai itai.

¹⁸ Is amen nauitoga u ilpu atimi actaig nathatahau an nahaijira an nauritai vaig ura. Is lep amen ehelek a natimi ahlai toho.

¹⁹ Kis ika ainyak ehele ilpu atimi esjilid im ilpu atimi alupas, im natimi asega, Et esjilid um alupas nauritai inig, inta lep amen itac acen jipe vai caija akaija an nathatahau.

²⁰ Aku wit atahaijeg nohran toho an tah anuarin aijaua, akumu asjapicnaig pam aijaua ehelema: Etpu imiaras caija a Atua uja.

²¹ Ecris auritai aijama: eris lep apos niji mopul ura naihaijira an nuhialeg um yetpan an jupura.

²² Kis lep ika ainyak ehele atimi, Erumu amen Jerusalem natimi asega im ilpu aheca ura, va erupu aminjinaig caija ara an nepig, um auritai an nadiat.

²³ Kis eti adi napelumai unvak ainyak, im ilpu etwak, im ilpu aheca unyak, im ilpu atimi ehlad eris apitac nyak ara, ecris adi na pelumai unyima aijama vai inyiri vaig ache.