Nihemaia 3 - Intas Etipup

Nuarin tas alupas 3.

Niji idam im natah ira ra era actaig nathatahau ara.

¹ IS atidai a Elaiasib natimi esjilid an nahlap im ilpu etwan ilpu atimi ahlap, um auritai an neucse nathatahau vai siip; eris ago upene ara, um ikni intapnes iran; um imiitap um yetpan an neom ehlad Mia, um lep yetpan an neom ehlad Hananiil.

² Eris lep actaig jisei yin a nup u Jeriko. Is lep actaig jisei ra a Sakkur inhal u Imrai.

³ Ja eris ago neucse nathatahau vai mu a ilpu hal u Hasenea, um ikni nauicai atgeig iran, um aduwi intapnes iran, um ati lok iran, um ati naui aiurn iran.

⁴ Is lep actaig jisei ra a Meri-mod inhal u Uraija, inhal u Kos. Is lep actaig jisei ra a Misullam inhal u Berekaia, inhal u Misesabiil. Is lep actaig jisei ra a Setok inhal u Beana.

⁵ Eris lep actaig jisei ra a nup u Tekoa; ja eris eti atau an nauritai u Natimarid ura a ilpu atimi alupas ura.

⁶ Erus lep ehteduo neucse nathatahau itu a Jehoiata inhal u Pasia, im Misullam inhal u Besotiya; um ikni nauicai atgeig iran, um aduwi intapnes iran, um ati lok iran, um ati naui aiurn iran.

⁷ Eris lep actaig jisei rau a Melataia nup u Cibeon, im Jeton nup u Meronod, im nup u Cibeon, im nup u Mispa, um yetpan an nuarin inig is ohuun a natimi alupas an nahaijin nofowai igcapam.

⁸ Is lep actaig jisei yin a Ussiel inhal u Harhaia, irai ilpu atimi auritai irai colt. Is lep jisei yin a Hananaia inhal o un tah natimi ago nitai auanipin upene, eris actaig nathatahau Jerusalem ara um yetpan u nathatahau alupas.

⁹ Is lep actaig jisei ra a Refeaia inhal u Hur, natimi alupas an nahaijin maliyum Jerusalem.

¹⁰ Is lep actaig jisei ra a Jiteya, inhal u Harumaf, an nuhup u neom o un. Is lep actaig jisei yiu a Hattus inhal u Hasabnaia.

¹¹ Erus lep actaig nuarin is eche a Malkaija inhal u Herim, im Hesub inhal u Pehad-moab, im lep neom ehlad u nehpai uum.

¹² Is lep actaig jisei yin a Sallum inhal u Halohes, natimi alupas an nahaijin maliyum Jerusalem, aien im ilpu halav atahig o un.

¹³ Is lep ehteduo neucse nathatahau an niskanse a Henun, im lep nup u Sanoa; eris ago ara, um aduwi intapnes iran, um ati lok iran, um ati naui aiurn iran, um actaig nathatahau is kubit is wun dausant (1,000), um yetpan u neucse nathatahau vai ohok.

¹⁴ Ja is ago upene neucse nathatahau vai ohok a Malkaia inhal u Rikab, natimi alupas an nahaijin maliyum Bed-hakserem; is ago aien, um aduwi intapnes iran, um ati lok iran, um ati naui aiurn iran.

¹⁵ Is lep ago upene neucse nathatahau u nimtanwai a Sallum inhal u Kol-hose, natimi alupas an nahaijin maliyum Mispa; is ago aien, um adahpoi, um aduwi intapnes iran, um ati lok iran, um ati naui aiurn iran, is lep actaig nathatahau u netpenwai u Siloa aien u nahapol u natimarid, um yetpan u nefalaig et ahes an maliyum u Tevit um asuol.

¹⁶ Is lep actaig jisei yin a Nihemaia inhal u Asbuk, natimi alupas an nahaijin maliyum Bedsur, um yetpan an nuhup irai etheso o Tevit, im lep netpenwai eris ago, um yetpan an neom u ilpu atimi emda.

¹⁷ Eris lep actaig jisei yin a ilpu mapoi Livai, im Rihum inhal u Benai. Is lep actaig jisei yin a Hasabaia, natimi alupas an nahaijin maliyum Kila, an nuarin o un.

¹⁸ Eris lep actaig jisei yin a ilpu etwara, im Baveai inhal u Henatat, natimi alupas an nahaijin maliyum Kila.

¹⁹ Is lep actaig jisei yin a Iser inhal u Josua, natimi alupas Mispa, um actaig nuarin is ethi u nefalaig aridjai an neom ikni nij va atimi iran an nesvi va nathatahau.

²⁰ Is lep jisei yin a Beruk inhal u Sabe, um actaig emda nuarin is ethi, um ahes an nesvi va nathatahau um yetpan an neucse neom u Elaiasib natimi esjilid an nahlap.

²¹ Is lep jisei yin a Meremod inhal u Uraija, inhal u Kos, um actaig nuarin is ethi, um ahes an neucse neom u Elaiasib, um yetpan an nilpun neom u Elaiasib.

²² Eris lep actaig jisei yin a ilpu atimi ahlap, nup an nuarin marara Jortan.

²³ Erus lep actaig jisei ra a Benjamin im Hesub, an nuhup u neom urau. Is lep actaig jisei rau a Asaraia inhal u Measiya, inhal u Ananaia, u neom o un.

²⁴ Is lep jisei yin a Binnuai inhal u Henatat, um actaig nuarin is ethi, um ahes an neom u Asaraia, um atga an nidji nathatahau, um yetpan an nesvi vaig.

²⁵ Is lep actaig a Pelal inhal u Usseai, u nesvi va nathatahau, im neom ehlad an nahaijin neom ijinies u natimarid itac, ubutpotet pan an nokoro u neom ipjin, Is jisei yin a Piteya inhal u Peros.

²⁶ Eris lep amen Ofel a ilpu aheca u ilpu mapoi Livai, um yetpan an nuhup u neucse nathatahau vai inwai an ridjai o un, u neom ehlad itac.

²⁷ Eris lep jisei ra a nup u Tekoa, um actaig nuarin is ethi, an nuhup u neom ehlad alupas itac, um yetpan u nathatahau Ofel.

²⁸ Eris lep actaig a ilpu atimi ahlap, an nuhup u niji eom ura asega an nahaijin neucse nathatahau vai hors ijinies.

²⁹ Is jisei ra a Setok inhal u Immer, um actaig an nuhup u neom o un. Is lep jisei yin a Semeaia inhal u Sekanaia, natimi aminjinaig neucse nathatahau an ridjai o un.

³⁰ Erus lep jisei yin a Hananaia inhal u Selemaia, im Henun inhalav atamaig u Selaf siksd, um actaig nuarin is ethi. Is lep jisei yin a Misullam inhal u Berekaia, um actaig nuarin is ethi an nuhup u nuarin neom o un.

³¹ Is lep actaig jisei yin a Malkaia inhal u natimi auritai irai colt, um yetpan an nuarin amen u ilpu aheca u ilpu mapoi Livai, im ilpu atimi ahtai itai, an nuhup u neucse nathatahau Mifkat, um lep apan an nesvi vaig.

³² Eris lep actaig a ilpu atimi auritai irai colt, im ilpu atimi ahtai itai, an niblan nuarin aridjai im nesvi vaig an nathatahau, um yetpan an neucse nathatahau vai siip.