Nihemaia 2 - Intas Etipup

Nuarin tas alupas 2.

1 Et wat ato nohuun nohocred u Nihemaia a Artakserkses, et alupai yin itaasviitai im intas alep aien, um abraig pan yin Jerusalem. 9 Et yetpam Jerusalem a Nihemaia, era ohocred vaig a ilpu atimi tak atimi iran. 12 Et almaijidjid niji athatahau atiteuc aien, jam eti asaig. 17 Et ahugni nup u Juta aien mika eri actaig um eti imtitaig ilpu atimi tak atimi ira ra.

¹ IS amen nide vaine an nuhup u Artakserkses an mohoc Naisan, an mesese twentied an natimarid vaig o un: kis leh nide vaine ainyak, um alupai natimarid. Ja kis eti upyi ohocred jak ainyak an nuhup o un.

² Va nitai inigki is tas ehelek a natimarid, um ika, Et akrai nesganimtam aiek vanhe, na eti emehe aiek? nohocred u inliinmopom nigki. Kis imtitaig alupas ainyak,

³ um ika ehele natimarid, Etmu umoh a natimarid irai iji mesese: ek a uri ainyak par eti akrai nesganimtak, et wat umaruma inmaliyum et amen iran netheso irai ilpu retpok, eh lep ecescas ehni intapnes an neucse nathatahau iran.

⁴ Is ika ehelek a natimarid, Nai merit vanhe aiek? Kis ago nalaigaheni ainyak vai Atua an nohatag.

⁵ Kis lep ika ehele natimarid ainyak, El et upene irai natimarid, namu aiheuc vai naheca unyum aiek, um abraig pan nyak an pece Juta, an maliyum iyehki et amen iran netheso irai ilpu retpok, mika ki ehteduo ainyak.

⁶ Is ahodai nyak a natimarid, (is lep eteuc ehelen a ehgan,) um ika, Inyi itu iram namen vaig unyum, ka oʼo? napu lep adumoij pam aiek an nahopan? Kis asuptecnaig nopan ehelen ainyak; is upene irai natimarid nabraig pan nyak vaig.

⁷ Kis lep ika ehele natimarid ainyak, El et upene irai natimarid, uhmu alupai nyak itaasviitai imi ilpu atimi alupas an nahaijin nofowai igcapan, mika eri atau imi nyak ara, um imihum pan an nopan iyehki ekpu yetpan an pece Juta ainyak;

⁸ im nitaasviitai imi Esaf natimi aminjinaig nesei u natimarid, va etpu atcijaig nauicai imi nyak aien par ago niji tapnes uri neucse nathatahau an nimnim itap, im lep nathatahau an maliyum, im lep neom ekpu apan iran ainyak. Is adai intas unyak a natimarid, is idivaig is amen irak nikmai Atua.

⁹ Kis ham ainyak ehele ilpu atimi alupas an nahaijin nofowai igcapan, um alupai ra itaasviitai u natimarid. Is lep abrai ilpu atimi alupas irai ilpu eucsupo a natimarid im ilpu atimi atga irai hors mika eri ahced nyak ara.

¹⁰ Erus wat atahaijeg a Sanballat nup u Horoneem, im Tobaia naheca, nup Amon, is ohocred alupas inliinmoporau arau, mika is ham tah natimi par ahilek namen upene u nup Isreel.

¹¹ Kis ham Jerusalem ainyak, um amen eahki ira adiat is eseij.

¹² Jai kis aiji ainyak an nepig, im natimi is eti elpat ehelek; kis eti asaig ehelen tah natimi ainyak nitai inig is ati an liinmopok a Atua unyak mika ki ago ainyak Jerusalem: is lep eti amen tah hors ehelek, hors iyehki ache kis atga iran ainyak.

¹³ Kis apan itac ainyak an nepig an neucse nathatahau an niskanse, um atga an nuhup u nehpanwai u nimyeuv, um yetpan u neucse nathatahau uri nohok, um almaijidjid nathatahau Jerusalem, is atiteuc, im intapnes iran is ecescas ehni.

¹⁴ Kis lep atga ainyak um apan u neucse nathatahau u nimtanwai, im lep netpenwai u natimarid: ja is ti nefalaig vai hors kis atga iran ainyak.

¹⁵ Kis lep aridjai ainyak an nepig an nahaijin niskanwai, um almaijidjid nathatahau, um adumoij, um atga an neucse nathatahau u niskanse, um adumoij pan au maliyum.

¹⁶ Eris eti ato a ilpu atimi alupas nuarin iyehki kis apan iran ainyak, im nitai inig kis ago ainyak; kis eti fi asaig ainyak ehele nup u Juta, im ilpu atimi ahlap, im ilpu atimi esjilid, im ilpu atimi alupas, im ilpu atimi is eche eris ago nauritai ara.

¹⁷ Kis ika ehele ra ainyak, Eka almoi aijaua namen has uja inigki, nikavaig, et umaruma Jerusalem, et lep ecescas ehni intapnes an neucse nathatahau iran: intumu ehteduo nathatahau Jerusalem akaija, va uhpu eti lep imiafakahcil caija.

¹⁸ Kis lep asaig ehele ra ainyak mika is amen upene irak nikmai Atua unyak; im lep intas o natimarid ehelek. Eris ika ara, Ti atidai akaija um ehteduo itai. Eris ago emda jipe inliinmopora ara an nauritai upene inigki.

¹⁹ Jai ehtijis wat atahaijeg vaig a Sanballat nup u Horoneem, im Tobaia naheca, nup Amon, im Cisem nup Arebia, ehtijis laav ahtaij, um imiafakahcil, um amcel vai cama, um ika, Eka ago inhe aijaua? eka imipalea natimarid aijaua, ka oʼo?

²⁰ Kis tas ehele ehtaij ainyak, um ika ehele ehtaij, Etpu acis yi alwai cama a Atua an nohatag; va nitai inigki ecrupu atidai um ehteduo itai aijama ilpu aheca o un: ja et ti nuarin nobohtan, um ti nitai ohuun, um ti nitai imiehva unyimia Jerusalem.