Nihemaia 13 - Intas Etipup

Nuarin tas alupas 13.

1 Eh wat esvi intas alep u Atua, era atiakoai ra im nup urai iji pece ara. 4 Et wat adumoij pam a Nihemaia, et ika aien eri yiri uari eom itap. 10 Et lep ika aien eri ago upene niji auritai an neom u Atua. 15 Era auahas nadiat atumop ara, 23 um lucsei ilpu takata irai iji taka pece ehgara.

¹ ERIS esvi an nitaasviitai u Moses an nadiat iyehki an nuhup u atimi; eris ato mika eris aged iran, nikavaig, inyi jim tup ethi ache pan irai ilpu atimi alupas va nauritai u Atua tah nup Amon, ka tah nup u Moab irai iji mesese;

² va nedo ura, nikavaig, eris eti aubilid nup Isreel ara, um alupai ra nitai caig im inwai, ja eris alupai Belam nimtan mika yi asan tas ahlaijai ra: ja is ahidaig intas ahlaijai ra a Atua uja mika yi tas acis yi alwai ra.

³ Eris wat atahaijeg intas alep ara, eris atiakoai nup Isreel im ilpu atimi is eche asega.

⁴ Ja is upyi hup um apol irai Tobaia a Elaiasib natimi ahlap, is aminjinaig niji uari eom au neom u Atua uja aien:

⁵ Is yecrei nuarin neom alupas inig imi yiu aien, eris upyi ikni iran niji itai ahlap an nitai caig, im nide libano, im nipjiitai, im nahaijin tend irai korn, im nide vaine mat,im narakei oliv, eris asaig mika eri alupai ilpu mapoi Livai, im ilpu atimi acesaces nohranitai, im ilpu atimi aminjinaig neucse neom; im niji itai tup ahtai imi ilpu atimi ahlap.

⁶ Jai kis eti amen Jerusalem ainyak an nopan iyehki: kis apan ainyak ehele natimarid, an mesese dirte sekunt irai Artakserkses natimarid Babelon, ja is wat ti pan itac hal adiat, kis ugyi emda natimarid ainyak mika ki adumoij pam:

⁷ jai kis ham Jerusalem ainyak, um ato nedo has is ago a Elaiasib vai Tobaia, nikavaig, is yecrei nuarin neom imi yin anliin nokoro an neom u Atua.

⁸ Kis ohocred alupas vaig ainyak: va nitai inigki kis erekhaig pok ijo ainyak nitai asega u Tobaia iji ig is amen anliin neom.

⁹ Kis tas alep ainyak, ja eris lep ago upene niji uari eom ara: kis lep ikni iran nipjiitai an neom u Atua, im nitai ahlap an nitai caig, im nide libano.

¹⁰ Kis lep ato ainyak mika eris eti alupai ilpu mapoi Livai nitai caig incara: eris lep ahapan irai iji uari pece ura a ilpu mapoi Livai im ilpu atimi acesaces nohranitai iji igki eris auanaheca ara.

¹¹ Kis imiisjis ainyak ehele ilpu atimi alupas, um ika, Er udei neom u Atua vanhe? Kis asjapicnai ra ainyak, um ikni ra irai iji uarin ura.

¹² Eris lep imiapam a nup u Juta asega nahaijin tend irai korn, im nide vaine mat, im narakei oliv; irai iji uarin ikni itai iran.

¹³ Kis ikni ilpu atimi aminjinai itai irai iji uarin ikni itai iran; nan, Selemaia natimi ahlap, im Setok natimi asuptecnaig nesgan tas alep, im Peteaia irai ilpu mapoi Livai: is apitac ira ra a Henan inhal u Sakkur, inhal u Mattanaia: eris ika eris inveijec ara; nauritai ura nigki, nikavaig, eris ahai itai imi ilpu etwara ara.

¹⁴ Ak Atua unyak, imiehva nyak, va nitai inigki, um jim ohpodohpod nedo upene unyak, kis ago ainyak va neom u Atua unyak im niji auritai iran.

¹⁵ Kis alum hal ainyak an nopan iyehki eris ehtaijiraig nohwai vaine an nadiat atumop, um apos nuhud irai itai, um ikni itai ahelwei irai togke; im lep nide vaine, im nohwai vaine, im nohwai ateg, im niji itai apos asega, eris imiapam Jerusalem an nadiat atumop ara: kis ated ra ainyak an nadiat eris ahtai itai iran ara.

¹⁶ Eris lep amen iran a nup u Tairus eris lucsei pam mu ara, im niji itai ahtai asega, um ahtai an nadiat atumop imi nup u Juta, im lep nup u Jerusalem.

¹⁷ Kis imiisjis ehele ilpu atimi alupas u nup u Juta ainyak, um ika ehele ra, Neve nedo has inigki eka ago aijaua, um auahas nadiat atumop?

¹⁸ Eris ago nedo inigki a ilpu retpomia, is lep imiapam iraija nohocred asega inigki, im lep an maliyum inigki; ja eka imiapam intavaitap esjilid irai up Isreel aijaua va nauahas vaig nadiat atumop.

¹⁹ Is wat jupura an nadiat asgeig pan an nadiat atumop, um apat neucse nathatahau Jerusalem, kis asaig ainyak mika eri atapnes eucse nathatahau, kis lep asaig ainyak mika etpu ti pan itac nadiat atumop ja uhpu asalgei: kis ikni hal ilpu aheca unyak ainyak u eucse nathatahau, va eri jim imiapam tah nitai apos an nadiat atumop.

²⁰ Eris lep ecethi ka ecero asjeuc itac an maliyum Jerusalem a ilpu atimi ahtai itai im ilpu atimi ahtai niji itai acheiachei asega.

²¹ Kis ated ra ainyak, um ika ehele ra, Eka a uri aijaua par asjeuc u nathatahau? el eka lep ago aijaua, ekpu arop iramia ainyak. Eris eti lep ham ara an nadiat atumop.

²² Kis asaig ehele ilpu mapoi Livai ainyak mika eri yiri ra ara, um apam um aminjinaig eucse nathatahau, um imiitap nadiat atumop. Ak Atua unyak, imiehva nyak va nitai inigki, um aiheuc vai nyak et idivaig naiheuc esjilid unyum.

²³ Kis lep alum nup u Juta ainyak an nopan iyehki eris lucsei ilpu takata Astot, im Amon, im Moab ehgara ara:

²⁴ eris lep leh nahaijin tas u nup u Astot a ilpuhal ura, ja eris eti ato intas o nup u Juta ara, ja eris ato ache ara nahaijin tas o nup Astot im nahaijin tas o nup u Juta.

²⁵ Kis imiisjis ehele ra ainyak; um atuh ra, um aredei nahaiji ra, um atecrei numri nidjinira, um ika eri asan tas aktit ura ehele Atua ara, nikavaig, Akumu jim alupai ilpu halav atamaig ura ilpu halav atahig unyimia aijaua, um jim lucsei ilpu halav atahig ura imi ilpu halav atamaig unyimia, im lep imi caua.

²⁶ Is idim ago nedo has a Solomon natimarid an pece Isreel irai itai iji igki; ja is eti eteuc tah natimarid is idivai yin irai iji pece is ahinag, is aiheuc vai yin a Atua, is lep ati yin a Atua mika yi atimarid irai up Isreel asega aien: ja eris imiahnag yin a ilpu takata irai taka pece.

²⁷ Ecrupu lep atahaijeg intas unyimia aijama um ago nedo has esjilid inigki, um imipalea intas o Atua, um lucsei ilpu takata irai taka pece ehgaija, ka oʼo?

²⁸ Is ohanig u Sanballat nup u Horoneem a inhalav atamaig is ethi u Joiata, inhal u Elaiasib natimi ahlap: va nitai inigki kis ahlo yin ehelek ainyak.

²⁹ Ak Atua unyak, imiehva ra aiek va nedo ura, nikavaig, eris auahas nauritai u ilpu atimi ahlap ara, im intas etipup vai ilpu atimi ahlap, im ilpu mapoi Livai.

³⁰ Kis imiitap ra ainyak vai ilpu atimi irai taka pece asega, kis ahaig ilpu atimi ahlap im ilpu mapoi Livai, um asaig ehele atimi asega nauritai ura;

³¹ im lep nitai ahlap irai cai an nopan eris asaig, im inhupnai itai. Ak Atua unyak, imiehva nyak aiek, um aiheuc vai nyak.