Nihemaia 1 - Intas Etipup

Nuarin tas alupas 1.

1 Et wat asuptecnaig namen has u nup u Jerusalem ehele Nihemaia a Hananai, et taig a Nihemaia, um atwakam, um alaigaheni. 5 Intas alaigaheni o un.

¹ NITAASVIITAI u Nihemaia inhal u Hakalaia nigki; Kis wat amen ainyak an nimnim atimi u natimarid an maliyum Susan, an mohoc Kislu, an mesese twentied,

² is ham a Hananai, etwak is ethi, im hal irai up u Juta; kis ahodai ra ainyak vai nup u Juta iji ehki eris imiatamai ra, nahrei ra sji ehki eris lucsei pan ra, im lep vai Jerusalem.

³ Ens ika ehelek ara, Et esjilid nohocred im nehcamai ira ahre atimi an pece eris lucsei pan ra: et amen atiteuc nathatahau Jerusalem, um cas ehni intapnes iran.

⁴ Kis wat atahaijeg intas iji igki ainyak, kis ateucse ainyak um taig, um aclel irai hal adiat, um atwakam, um ago nalaigaheni an nuhup u Atua an nohatag,

⁵ um ika, Ek ugyi euc ainyak, ak Ihova Atua an nohatag, Atua esjilid er imtitai euc, na apos intas etipup unyum aiek, um aiheuc vai ra et aiyu inliinmopora ara vai euc um imiaiji intas alep unyum:

⁶ namu atgeig pam intikgam aiek, um asalagei nesganimtam, va apu atahaijeg nalaigaheni u naheca unyum aiek, ek asaig ainyak an nuhup unyum, irai iji adiat im niji epig, vai nup Isreel ilpu aheca unyum, um asuptecnaig nedo has u nup Isreel, ecris ago aijama vai euc: kis ago nedo has ainyak im ilpu eteuc irai etmak.

⁷ Ecris idim ago nedo acalacal aijama vai euc, ura eti apos intas alep unyum, im intas aged unyum, im nedo unyum, as asaig aiek ehele Moses naheca unyum.

⁸ Ek ugyi euc ainyak, mika an imiehva aiek intas inig as asaig aiek ehele Moses naheca unyum, nikavaig. El eka imipalea aijaua, ekpu imiterimterim caua ainyak irai iji pece:

⁹ ja el eka adumoij pam ehelek aijaua, um apos intas alep unyak, um imiaiji; ekpu lep asjapicnaig ra ainyak eahki eris imiterimterim ra an nobohtan asega, um imiapan ra an nuarin inig kis ehtai ainyak, par ati nidak iran.

¹⁰ Era ilpu aheca unyum ara sji igki, im ilpu atimi unyum, as imiatamai ra aiek an nemda esjilid unyum, im lep an nikmam emda.

¹¹ Ek ugyi euc ainyak, ak Ihova, mika an atahaijeg nalaigaheni u naheca unyum aiek, im nalaigaheni u ilpu aheca unyum, era merit ara nimtitaig vaig nidam: ek lep ugyi euc ainyak, mika an acis yi alwai naheca unyum aiek an nadiat inigki, um aiheuc vai yin an nuhup u natimi inigki. Kis atimi aminjinaig nide vaine u natimarid ainyak.