Biblia Todo Logo
Bìoball air-loidhne

- Sanasan -

Nehum 3 - Intas Etipup


NUARIN TAS ALUPAS 3.
Intas vai nauhas ehni u nup u Ninevi.

1 AWE, kaiheuc vai nup uran maliyum inig era atgei atimi iran ara! et ohua intas ahcil im nedo ehcerucai atimi iran; et eti tiih iran niji itai eris tup atoraliak;

2 et eteuc inmotjan nitai aredei hois, im inmotjan niji itai arehed jipe, im inmotjan niji hors era athut jipe, im lep inmotjan niji jariot era eliaujai jipe.

3 Era eliaujai a ilpu atimi ateuc irai hors, era naunau niji auitoga, era aijoran niji mopul hat, eh atgei atimi et ahinag, era alupas niji ira atimi emesmas, et elika nesvi vaig nohui ilpu atimi emesmas, era epihtau ara irai ohui ilpu atimi emesmas,

4 vaig inig nikavaig, et idivaig nedo o intakata ago ingeijid et ahinag nedo ura, um idivaig intakata esga atimi et eklim upene aien um araces, era tup ahtai nup urai iji pece ara vai ingeijid ura, im nup urai iji elcau an tas asig yi opdicrai itai ura.

5 Et ika a Ihova esjilid acen; Ak intakata has, ek atimi tak atimi iram ainyak; ekpu atipagki inlepei unyum ainyak, ekpu ika ainyak eri alum euc a nup urai iji pece, napu ehcamai aiek an nuhup u nup urai iji elcau.

6 Ekpu ethaigjai iram niji itai has ainyak, um ika eri amcel vai euc, ekpu ika ainyak an aiji aiek mika eri alum euc natimi.

7 Ja erupu ahapan vai euc ara asega eri alum euc ara, um ika, Eh idim auahas nup u Ninevi! etpu aiheuc vai ra a di? ekpu ahilek atimi eda ainyak par ago eropse inliinmopomia?

8 Eka esjilid aijaua irai nup u Noamon, ka oʼo, eris amen u ofowai ara, is lep arehed ira ra inwai, is itai ahtaipup ura inwai alupas, is yetpan nofowai alupas an nathatahau ura?

9 Eris emda ara vai nup Idiopia im lep nup Ijipt, is ehka nesvi vaig ilpu eucsupo ura; eris atau ira ra a nup u Put im nup u Libya.

10 Ja eris imiapan ra an taka pece an nedoa, eris ilpu ohna ara: eris lep ehtoplecoplec ilpu halav haklin ura irai ehni u efalaig asega: eris ikni jipe itai asjaaicuaig irai ilpu atimi esjilid ura, eris lep arore ilpu atimi alupas asega ura irai atauhat.

11 Akupu umnyi waina aijaua um ahnag vaig: akupu atpuli aijaua, akupu lep ahilek tah nuarin emda aijaua vai ilpu atimi edemda vai caua.

12 Et idivaig niji ateg et upyi hup um meto nohwan niji eom emda asega unyimia: el eh ecreucraig iran, etpu etjose nohwan an nipjineucse atimi caig.

13 Almoi! era idivaig ilpu takata a ilpu atimi unyimia: eri asalgei upene niji tapnes an pece unyimia vai ra era edemda vai caua ara: etpu atnamud niji itai ago ipjin intapnes unyimia incap.

14 Akumu athoi wai aijaua va nedoa an maliyum unyimia; akumu ago emda niji athatahau unyimia aijaua; akumu apan u nosal aijaua, um auwihi intan apol, um ago emda nuarin inig er ahen brik iran.

15 Etpu atnamud caua incap eahki; etpu atgei caua nedoa, etpu auahas caua et idivaig niji pak irai heled iji ig era eluun itai ara: akumu ika aijaua aki ahinag um idivaig niji pak irai heled era eluun itai ara; akumu ika aijaua aki ahinag um idivaig niji pak irai heled era ahad an nobohtan ara.

16 Eka mun ika aijaua eri ahinag a ilpu atimi auarimtai itai unyimia irai moijeuv an nohatag: et apaahni niji pak irai heled era eluun itai ara, ja par aepan.

17 Era idivaig niji pak irai heled era ahad an nohohtan ara a ilpu atimi alupas unyimia, um idivaig niji pak irai heled alupas acen a ilpu atimi alupas u ilpu eucsupo unyimia, era amen irai irahed inheled iji ig ira adiat eweiyu, ja et wat aridjai nagesega era aepan ara, er eti ato nuarin inig era amen iran ara.

18 Ak natimarid u nup Asiria, era umjeg a ilpu atimi aminjinaig niji uari pece unyum: era asjeuc a ilpu atimi alupas unyum: era terimterim natimi unyum irai edoon, et lep ti tah par asjapicnai ra.

19 Inyi eti auatai tintin nohocred unyimia; et has alupas niji mocop unyimia: erupu ahpoi ikmara vai caua ara asega erupu atahaijeg intas vai caua ara: et idim ti tah is eti yetpan ijinies iran nedo ipjin unyimia um eti ti.

Vanuatu Bible (Intas Etipup) © United Bible Societies, 1863, 2019.

United Bible Societies
Lean sinn:



Sanasan