Nehum 1 - Intas Etipup

NUARIN TAS ALUPAS 1.

Natimi alupas u Atua, et ago nedo upene aien vai ilpu atimi o un, im nedo ipjin vai ilpu atimi tak atimi iran.

¹ INTAS asuptecnaig vai nup u Ninevi nigki. Nitaasviitai va nitai iji igki is ahuumtidec iran a Nehum nup Elkos nigki.

² Et edemda a Ihova Atua uja, um idivaig natimi oporei; et aru ira atimi a Ihova, um edemda alupas vai ra; etpu aru irai ra sji igki a Ihova era aat iran ara, et ati nedemda o un aien vai ilpu atimi tak atimi iran.

³ Et eti fi auroauro a Ihova um edemda, ja et alupas nemda o un, inyi idim eti atcijaig ilpu atimi ago nedo has aien: et atga a Ihova an narakiraki im lep an nehio, et idivaig nobohtan adpoig u eduon niji apat an nohatag.

⁴ Et acaiji injap aien, um ika yi ame, et lep ika aien yi ame niji ofowai asega; et imlai nedoon Besan, im Karmel, et lep imlai intisiai cai Lebanon.

⁵ Et amaamai niji au vai yin, um tup updak niji edoon, et eucjeucjeucaij nobohtan an nuhup o un, nobohtan marom, im lep ra asega era amen iran ara.

⁶ Etpu aiji a di an nuhup u nedemda o un? etpu lep atidaijai a di etu wit ehcohos intavaitap ehri o un? et atladwi nedemda o un aien et idivaig incap, et ahidaig niji ij aien.

⁷ Et upene a Ihova, et eom emda aien an nopan ohocred; et ato ra sji igki aien era asgeig iran ara.

⁸ Ja etpu ika aien yi ahgarero inwai um auahas ehni inmaliyum Ninevi, etpu ahau ilpu atimi edemda vai yin aien an napat.

⁹ Eka aktaktai inhe aijaua vai Ihova? etpu auahas ehni aien: inyi eti aketo um yetpam nohocred.

¹⁰ El era apol jipe ara et idivaig nadeni, um ahnag alupas va numnyi waina ura, ja uhpu auahas ra et idivaig inceen hwiit et mese upene.

¹¹ Et mun ahes ehelemia tah um apam, et aktaktai nitai has vai Ihova aien, natimi inig et mun tas alep aien mika eri ago nedo imipalea ara.

¹² Et ika a Ihova; El era amen upene ara, um lep ahinag, ja uhpu idim atgei ra, etpu idim tiih aien. Kis atijai nohocred iramia ainyak, jai inki eti lep atijai nohocred iramia ainyak.

¹³ Ekpu idim atipagki iramia nitai ehelwei o un ainyak an nopan inig, um atgeig yi amud inwau iramia.

¹⁴ Et mun asaig intas a Ihova vai euc, ak natimarid, u nup u Ninevi, mika eri lep eteuc a ilpu mapom: ekpu auahas niji atmasimai eris wud ugnyit iran, im niji atmas-imai eris atho par ago iran, anliin neom u ilpu atmas unyum: ekpu ucji nehpanitai unyum iran ainyak; vaig inig nikavaig, nai has aiek.

¹⁵ Almoi aijaua, et atga irai au neduei natimi et imiapam intas upene aien, um asuptecnaig nigpa! ak nup u Juta, akumu apos nakaro itap unyimia aijaua, akumu ehneijid intas upyi asaig unyimia aijaua: eri eti lep ahced inpece unyimia a ilpu atimi auatatimi; era mun atiih ara.