Natimi Efehtas 9 - Intas Etipup

Nuarin tas alupas 9.

1 Et tup et ethi ache nitai iji igki et yetpam ehele ilpu atimi upene im ilpu atimi auatatimi. 4 Eris idim ika eri emesmas natimi asega. 7 El et eropse inliinmopoi atimi, inyi eti eteuc nitai et eche imi ra an nobohtan inigki. 11 Et aminjinaig niji itai asega a Atua. 13 Et esjilid narapakau irai nemda.

¹ IS ecen inliinmopok ainyak irai itai iji igki asega, mika ki ato upene nitai iji igki asega, nikavaig, era amen an nikmai Atua a ilpu atimi upene im ilpu atimi arapakau, im niji auritai ura; et elika vaig tah natimi par ato naiyu u inliinmopoi Atua vaig tah, ka nacen u inliinmopoi Atua vaig tah, vai nitai iji igki asega an nuhup o un.

² Et tup ethi ache nitai iji igki asega et yetpam irai atimi asega: et tup apapa nitai inig et yetpam irai ilpu atimi et atoh nedo ura, im ilpu atimi et acalacal nedo ura; irai ilpu atimi upene, im ilpu atimi has; irai ilpu atimi itap, im ilpu atimi eti itap; irai natimi inig et ahlap an nitai ahlap aien, im natimi inig et eti ahlap an nitai ahlap aien: et tup apapa nitai inig et yetpam irai natimi upene, im natimi auatatimi; irai natimi inig et tup asig aktit intas aien, im natimi inig et imtitaig aien par asig aktit intas.

³ Nitai has nigki irai iji itai asega er ago ithan nagesega, mika et tup ethi ache nitai inig et yetpam irai atimi asega: maiya, et lep ohua nedo has au liinmopoi ilpu hal u atimi; et amen nedo ahnag an liinmopora an numumoh ura; ja era par apitac ara, um apan ehele ilpu atimi emesmas.

⁴ Ja et aitgaig itai aien et ehramen aien im ilpu atimi umumoh asega: et idim esjilid kuri umoh irai laion mas.

⁵ Era idim ato a ilpu atimi umumoh, mika eri emesmas ara; ja era eti ato tah nitai a ilpu atimi emesmas; et eti lep eteuc vai ra tah neruvaig an nobohtan; er ahnag ira ra um eti lep imiehva ra.

⁶ Et mun idim tiih naiyu u inliinmopora vaig tah, im nacen u inliinmopora vaig tah, im nauatitai ura; eri eti lep ohuun tah nitai ara irai itai er ago ithan nagesega irai iji mesese.

⁷ Atga unyum aiek, um caig nitai caig unyum, um cediaig, um umnyi nide vaine unyum an liinmopom imiacitak; et idim upene ira Atua niji auritai unyum an nopan inig.

⁸ Etmu ahi napelumai unyum irai iji adiat; etmu lep jim ti nitai aspi an nipek unyum.

⁹ Namu amen upene ehele ehgam aiek, um imiacitak; etmu aiyu inliinmopom aiek vai yin irai iji adiat an numoh unyum et takitai ache, et alupai euc a Atua ithan nagesega: et idim imtam nitai iji igki an numoh unyum va nauritai unyum inig na auritai iran aiek ithan nagesega.

¹⁰ Namu emda aiek um ago niji auritai asega et tau upene iram nago vaig; et idim ti nauritai, ka naktaktai, ka nato itai, ka narapakau, an netheso inig na atga aiek alaig o un.

¹¹ Kis adumoij pam ainyak, um almoi ithan nagesega mika, era eti esjilid an nathut irai iji opan a ilpu atimi athut emda, um eti esjilid an nedoa a ilpu atimi emda, um eti eteuc nitai caig incai i ilpu atimi arapakau, um eti eteuc naga imi ilpu atimi ato itai, um eti eteuc intas upene u atimi ehele ilpu atimi amarero; ja et acheiachei jipe vai ra asega nopan ura im nuhumato ura.

¹² Et idim eti ato tah natimi nitai inig etpu yetpam iran: er idim ecen mu an nopoig, er lep asjiraig man an nitai apro itai; et idim uco, er arop ira atimi an nopan has, et wat auroauro um yetpam ira ra tah nitai has.

¹³ Kis mun almoi narapakau inigki ainyak ithan nagesega, is idim alupas ehelek:

¹⁴ is eteuc inmaliyum haklin is ethi, eris eti elpat natimi iran; is yetpan o un tah natimarid alupas is ethi, um amen, um arehed iran, um ucta eom ijinies, mika yi ati nedoa vaig aien:

¹⁵ eris ecet iran tah natimi ihkin natimi is ethi ja is arapakau aien; is imiatamaig inmaliyum iyehki aien va narapakau o un, ja is eti imiehva natimi ihkin natimi iyehki tah natimi.

¹⁶ Ja kis par ika ainyak, Et esjilid narapakau irai nemda: ja er amcel vai narapakau u natimi ilikin natimi iyehki, um eti atahaijeg intas o un.

¹⁷ Er atahaijeg intas o ilpu atimi arapakau an tup eklim amen u atimi, um esjilid irai nahlaig ijinies u natimarid irai ilpu atimi ahnag.

¹⁸ Et esjilid narapakau irai nij va atimi: ja et auahas niji itai et upene et ahinag a natimi auatatimi et ethi ache.