Natimi Efehtas 7 - Intas Etipup

Nuarin tas alupas, 7.

1 Niji itai aminjinaig atimi vai intakitai ji igki, nikavaig, nidan upene, 2 natapnes itai merit ura, 7 nedo eti auatiemda, 11 narapakau. 23 Et itai ehka narapakau.

¹ ET esjilid intas upene u natimi asega vaig tah irai nitai aspi auanipin upene; et lep esjilid nadiat et mas iran tah irai nadiat eris apos yin iran.

² Et esjilid napan vaig an nimnim inig er ehtigtaig iran vai inmas o un tah, irai napan vaig an nimnim inig er imiacitak iran: vaig inig nikavaig, et tid ira atimi asega inmas ura; eri lep aktaktai vaig an liinmopora a ilpu atimi umumoh.

³ Et esjilid nehtigtaig irai inlaav: vaig inig nikavaig, et ago upene inliinmopon tah vai nimtimlai u nesganimtan.

⁴ Et amen inliinmopoi ilpu atimi arapakau an nimnim inig er ehtigtaig nan vai inmas o un tah; ja et amen inliinmopoi ilpu atimi ahnag an nimnim inig er imiacitak han.

⁵ Et upene vaig tah par atahaijeg intas acaiji yin u ilpu atimi arapakau; ja et eti upene vai yin par atahaijeg intas imiahpas yin u ilpu atimi ahnag.

⁶ Et takitai inlaav u natimi ahnag, um idivaig inmotjan cap irai itai upunupun ithan nipjiuru: et lep takitai nitai inigki.

⁷ Et idim ahnag a natimi arapakau va nedo ehcerucai yin; et lep auahas inliinmopoi atimi nitai tup ahtai.

⁸ Et esjilid nehni u itai irai natupun u itai: et lep esjilid natimi inig et eti auatiemda inliinmopon aien, irai natimi inig et auroauro inliinmopon aien.

⁹ Etmu jim fi auroauro inliinmopom aiek par atavaitap: vaig inig nikavaig, et amen intavaitap an liinmopoi ilpu atimi ahnag.

¹⁰ Namu jim ika aiek, Et echamecha is esjilid nopan iyehki irai nopan inig? nai eti ahodaig nitai inigki aiek um arapakau vaig.

¹¹ Et esjilid narapakau irai iji itai er ohuun: maiya, et itai upene narapakau va atimi iji ig er almoi nagesega ara.

¹² Et itai imialeg atimi narapakau; et lep itai imialeg atimi mune: ja et esjilid narapakau, vaig inig nikavaig, et imiatumumoh atimi iji ig era ato ara.

¹³ Namu aktaktai nauritai u Atua aiek: et emda a di mika yi ago atoh nitai inig is ago acalacal aien?

¹⁴ Namu imiacitak aiek an nopan amen upene iran, jam aktaktai aiek an nopan amen has iran: et mun atetwan nopan inigki im lep nopan iyehki a Atua, va eri jim ika natimi et maumau tah nitai is ago aien.

¹⁵ Ek mun ecetai nitai iji igki asega ainyak an nopan unyak et takitai ache: et eteuc tah natimi upene, et atoh nedo o un, ja et mas aien; et lep eteuc tah natimi auatatimi, et has nedo o un, ja et umoh aien um itu iran.

¹⁶ Namu jim ago nedo atoh esjilid aiek, um jim ago nedo arapakau esjilid aiek; na a uri aiek par auahas euc?

¹⁷ Namu jim ago nedo has esjilid aiek, um jim ago nedo ahnag: na a uri aiek par mas et wat eti fi yetpam nopan unyum?

¹⁸ Napu ahesmoij aiek, el et imiaiji intas alep inigki aiek, um eti atladwi intas alep iyehki: aien et imtita Atua aien, inyi eti auahas yin nitai has eraigki.

¹⁹ Et emda tah natimi arapakau va narapakau o un, um esjilid irai natimi alupas et ten era amen an maliyum ura ara.

²⁰ Et idim ti tah natimi an nobohtan et atoh nedo o un; et lep ago nedo upene ache aien, um eti ago tah nedo has.

²¹ Namu jim aktaktai alupas aiek intas asega er asaig, va an jim ahgei naheca unyum aiek asan tas ahlaijaig vai euc.

²² Et idim ato inliinmopom aiek mika, as ecahinag asan tas ahlaijaig aiek vai tak atimi.

²³ Ek mun asjaaicnaig irai itai iji igki asega ainyak an narapakau unyak: kis ika ainyak, Inki arapakau ainyak; ja is itac acen vai nyak.

²⁴ Et emda a di par ahilek um ato nitai inig, et itac acen um ubo acen?

²⁵ Is ecen inliinmopok ainyak par ato, um ahilek, um ecetai narapakau im nohuun itai, im lep par ato nedo has, im nedo ahnag, nedo ahnag u ilpu atimi auatatimi marom:

²⁶ kis ecetai ainyak mika, et acen um esjilid irai inmas a intakata inig, et idivaig itai apro itai im nopoi inliinmopon, um idivaig atau hat nikman et ero: natimi inig et upene irai Atua aien etpu aha vai yin aien; ja etpu arop irai natimi auatatimi a intakata iyehki.

²⁷ Et ika a Natimi efehtas, Ek mum idim ecetai nitai inigki ainyak; kis asjaaicnaig athiathi ainyak, miki ki ato nohuun nitai inigki:

²⁸ et mun ahilek nitai inigki inliinmopok ainyak, jam eti ecetai: ek mun ecet natimi arapakau et ethi ainyak irai natimi et wun dausant; ja ek mun eti ecet intakata arapakau et ethi ainyak irai ra sji igki asega.

²⁹ Ek mun idim ecetai nitai inigki ache ainyak, nikavaig, is ago atoh atimi a Atua; ja eris ahilek nedo acalacal et ahinag ara, um ago.