Natimi Efehtas 6 - Intas Etipup

Nuarin tas alupas 6.

1 Et takitai naga inig er eti ago tah nitai vaig, 3 im ilpu halav, 6 im nefatimi et wat eti eteuc naga. 9 Et takitai Mah an nesganimta atimi im inmerit ura vai itai. 11 Nehni u intakitai.

¹ EK mun almoi nitai has et ethi ainyak ithan nagesega; et idim eteuc ehele atimi et ahinag: nikavaig,

² et wat amen tah, et mun alupai yin nitai hegaig a Atua, im naga, im natimi alupas; et eti ti tah nitai et merit vaig aien; ja et eti alupai yin nemda a Atua incaig vaig, ja et caig intak atimi: et idim takitai nitai inigki, im nemehe has esjilid.

³ El et apos ilpu hal o un et wun huntret a natimi iyehki, um umoh, um itu iran; el et ahinag acen niji adiat iji ig et umoh iran aien, ja el et eti imiacitak inliiumopon aien va nitai upene; im lep, el eh eti atelmoi nohun; ek ika ainyak, et esjilid inhalav eris areuctikgan iran irai natimi iyehki.

⁴ Et apani a inhalav inigki an takitai, um apan an napat, eri adahpoi nidan an napat.

⁵ Im lep inig, et mun eti almoi nagesega aien, um eti ato tah nitai: ja et atumop aien, um esjilid irai natimi iyehki.

⁶ Maiya, el et umoh a natimi iyehki irai mesese et tu dausant, etpu eti amen upene aien: et idim inveijec, eri apan an nuarin et ethi natimi asega.

⁷ Era ago nauritai asega ura natimi va nipjineucsera, ja et eti geije inliinmopora ara.

⁸ Va nitai inigki et eteuc inhe imi natimi arapakau et eti eteuc imi natimi ahnag? et eteuc inhe imi natimi ihkin natimi inig, et ato aien par edo an nuhup u ilpu atimi umumoh?

⁹ Et upene nalum itai an nesganimta atimi, ja et has inmerit vai itai an liinmopora: et idim takitai nitai inigki, et auahas inliinmopoi atimi.

¹⁰ Aien is eteuc an nopan iyehki aien, is upyi leh nidan aien; er idim ato nidan iyehki par ika Atam: im lep inig, etmu jim aktaktai aien par auud yi aijiraig intas o un tah et emda aieu, um esjilid iran.

¹¹ Et eteuc niji itai et ahinag et ahes iran intakitai, nev itai upene inig, etpu leh tah va nauud yi aijiraig intas o Atua?

¹² Et ato a di nitai iji ig et upenc vaig tah an numoh vaig o un, ira adiat eti elpat au numoh o un et takitai ache, et eteuc imi yin, jam apau um idivaig nalmuitai? etpu asuptecnaig ehelen tah a di nitai iji igki etpu apitac iran ithan nagesega?