Natimi Efehtas 5 - Intas Etipup

Nuarin tas alupas 5.

1 Et eteuc intakitai an nalaigaheni uja, 8 an tas upoupo uja va nehcerucai caija, 9 im, lep an naga uja. 18 Nitai tup ahtai u Atua nigki par imiacitak an naga uja.

¹ NAU wit apan an neom u Atua aiek, aminjinaig nedo unyum, um auroauro um atahaijeg; jam jim ahlap an nitai ahlap u ilpu atimi ahnag: era eti aktaktai ara mika era ago nedo has ara.

² Etmu jim fi auroauro nipjineucsem, um jim fi auroauro inliinmopom aiek, um asaig tah intas an nuhup u Atua: et idim amen an nohatag a Atua, ja na amen an nobohtan aiek: va nitai inigki etmu eti elpat niji tas unyum.

³ Et eteuc numjeg ahnag va nauritai et ahinag; et idim uco, er ato nohra atimi ahnag vai intas et ahinag o un.

⁴ Nau wit asan tas aktit aiek ehele Atua, namu jim tup amen aiek, um eti ehneijid; et eti upene inliinmopon aien vai ilpu atimi ahnag: va nitai inigki namu ehneijid aiek intas inig as upyi asaig aiek.

⁵ Et upene el et eti asan tas aktit aiek; jam has el et asan tas aktit aiek, jam eti ehneijid.

⁶ Namu acaiji nipjineucsem aiek, va an jim imiahnag euc vaig aiek, um ago nedo has; um jim ika ehele naheca u Atua, kis ahnag iran ainyak: et ehcamecha etpu edemda vai intas unyum a Atua, um auahas nauritai irai ikmam?

⁷ Et eteuc intakitai acheiachei irai umjeg ahnag et ahinag, im intas et ahinag: ja namu ecen vai Atua aiek.

⁸ El et ecet ilpu atimi alupas aiek an tah an pece, mika era ehcerucai ilpu ihki atimi ara, um ago nedo acalacal vai ra, im nedo maumau esjilid, namu jim imiali aiek va nitai inigki: et idim ahilek nedo o ilpu atimi alupas a natimarid; et lep eteuc tah et esjilid acen aien irai ilpu atimi esjilid asega.

⁹ Im lep inig, et eteuc nohwai itai an nobohtan va atimi asega: et leh nitai caig o un a natimarid uman.

¹⁰ Aien et merit vai silver aien, inyi eti eropse inliinmopon aien vai silver; im lep aien et merit vai itai aien, inyi eti eropse inliinmopon aien vai naga: et idim takitai nitai inigki.

¹¹ Et wat alupas nitai caig, et ahinag natimi incaig vaig: va nitai inigki inhe nitai upene inig era leh a ilpu atimi ohuun? nitai inigki ache, era alum nitai caig inigki irai esgaiimtara ara.

¹² Et idim upene irai natimi ago nauritai numjeg vaig, el et hag tintin aien, ka el et hag alupas aien: ja et ehka va natimi ikni itai numjeg vaig va naga alupas o un.

¹³ Ek mun ecetai nitai has esjilid ainyak ithan nagesega, nikavaig, naga inig eris aminjinaig va natimi ohuun, ja is leh inhas vaig imi yin aien.

¹⁴ Ja et idim tiih naga inigki vai nauritai has: et um apos inhalav atamaig aien, ja et ti tah nitai ehelen par atcijaig imi yin.

¹⁵ Is ahes an nipjinetgai risin aien an tup nohun ache; et idim uco, etpu adumoij pan an nobohtan aien, etpu apan aien et idivaig napam o un; inyi eti leh tah nitai aien an nauritai o un, mika yi imiapan aien.

¹⁶ Nitai has esjilid nigki, nikavaig, et tup apapa nedo asega an napan o un pan an napam o un: im lep neve nimtan inig et eteuc imi yin et mun ago nauritai aien vai nimtinjap?

¹⁷ Maiya, et hegaig itai an napat o un aien irai iji adiat asega o un; et lep alupas nohocred o un, im nedemda, im nemehe.

¹⁸ Ek mun idim ecetai nitai inigki ainyak: nikavaig, et upene um atoh nedo inigki vaig tah, mika yi hag aien um umwig, um imiacitak ohwai itai an nauritai asega o un et ago aien ithan nagesega ira adiat asega et umoh aien, et alupai yin a Atua: nahaiji itai imi yin an nobohtan nigki.

¹⁹ Maiya, et wat alupai tah nitai caig im naga a Atua, et ika aien ehelen yi hegaig itai aien, um lucsei nuarin o un, um imiacitak nauritai o un; nitai tup ahtai u Atua nigki.

²⁰ Inyi eti imiehva alupas niji adiat an numoh o un aien; vaig inig nikavaig, et ika a Atua yi imiacitak inliinmopon aien.