Natimi Efehtas 4 - Intas Etipup

Nuarin tas alupas 4.

1 Et auata alupas intakitai ehele atimi va nehcerucai ra, 4 va nauatitai, 5 vai intup amen, 7 vai inhas ira ra itai, 9 va nechim amen, 13 va nimiisjisitai.

¹ KIS lep ahidaig pagki nyak ainyak, um aktaktai nedo ehcerucai asega er ago ithan nagesega: is idim eteuc nidiimta atimi er ehcerucai ra, ja is ti natimi atau ira ra; maiya, eris emda a ilpu atimi ehcerucai ra; ja is idim ti natimi atau ira ra.

² Va nitai inigki kis imiahpas atimi iji ig ainyak eris idim emesmas; et esjilid namen ura irai namen u atimi iji ig era umumoh ara,

³ Kis ika ainyak, Maiya, et esjilid irai ohwat raigki aien aigki et eti eteuc aien, nikavaig, is eti ecetai nauritai has inig aien eris ago ithan nagesega.

⁴ Im lep inig, kis aktaktai niji auritai ehka asega ainyak, im nedo atoh asega, ja va nitai iji igki era auatitai va atimi a ilpu atimi eblaamnem ura. Et idim takitai nitai inigki, et lep auahas inliinmopoi atimi.

⁵ Et ahtit nikman ero a natimi ahnag, um caig nohun.

⁶ Et upene vaig tah nitai caig haklin, im namen igpa; jam has nitai hegaig alupas, im nauritai ehka, im nohocred u inliinmopon.

⁷ Kis lep ahidaig pagki nyak ainyak, um ecetai intakitai ithan nagesega.

⁸ Et eteuc natimi et ethi, ja et ti napa o un; maiya, et ti inhal o un, ka natimi ehpan iran: ja et eti atiid nauritai asega o un, um eti eropse nesganimtan va naga; et eti ika aien, Ek ago nauritai ainyak vai di, um imiaaij itai upene vai nyak? Et takitai nedo inigki, maiya, et idim nauritai ehka.

⁹ Et esjilid natimi et ero irai natimi et ethi ache; vaig inig nikavaig, erau leh nimtan esjilid arau va nauritai urau.

¹⁰ El et eropse tah ira rau, etpu imiatidai yin a napa o un: ja kaiheuc vai yin et eropse aien an nechim amen o un; et ti napa o un par imiatidai yin.

¹¹ Im lep inig, el erau ehrasjeuc natimi et ero, el erau ehehtin arau: ja etpu evehehtin a natimi inig et echim asjeuc aien?

¹² El et auatialidi tah ira rau an nuhup o un tah et eche, erupu ahau natimi emda iyehki arau; et, ehka par atgeig yi amud injaula inig eh lelesgin.

¹³ Et upene intakuras inig et ilikin natimi aien jam arapakau; ja et has natimarid inig et efatimi aien um ahnag, um esjum par atahaijeg intas acaiji yin.

¹⁴ Is idim ahes an neom ipjin a intakuras iyehki, mika yi atimarid; eris idim apos yin natimi ihkin natimi an nelcau o un.

¹⁵ Kis alum atimi umumoh asega iji ig ainyak, eris atga ithan nagesega ara, eris ahced intakuras is eche ara; is ika aien yi isjeupigmoig natimarid itu iyehki aien.

¹⁶ Era eti tiih natimi asega; natimi asega iji ig marom, is atimarid ura aien: ja eri eti imiacitak intakuras inig natimi iji ig, era apitac ra sji ehki ara. Et idim takitai nitai inigki, et idim auahas inliinmopoi atimi.