Natimi Efehtas 3 - Intas Etipup

Nuarin tas alupas 3.

1 Et ehcil intakitai irai auritai u atimi va niji opan acheiachei. 11 Et esjilid acen niji auritai u Atua. 16 Etpu almaijidjid niji auritai u atimi eahki a Atua, ja era idivaig niji itai eklim edo irai pece igcaki natimi.

¹ ET eteuc nopan va niji itai asega, im nadiat vai naktaktai asega ithan nohatag:

² et eteuc nopan apos itai, im nopan mas u itai; et eteuc nopan ahwaig itai, im nopan atecrei itai iji ig eris ahwaig;

³ et eteuc nopan atgei itai, im nopan imiatamaig itai; et eteuc nopan alcapdicraig itai, im nopan uctaig itai;

⁴ et eteuc nopan ehtigtaig, im nopan laav; et eteuc nopan taig, im nopan ededikjai;

⁵ et eteuc nopan imiterimterim hat, im nopan asjapicnai hat; et eteuc nopan ablaijira atimi, im nopan eti ablaijira atimi;

⁶ et eteuc nopan lucsei itai, im nopan etjose itai; et eteuc nopan aminjinaig itai, im nopan ethaigse itai;

⁷ et eteuc nopan ahpati apelumai, im nopan ijei apelumai; et eteuc nopan eucsup, im nopan tas;

⁸ et eteuc nopan aiyu inliinmopoi atimi vaig tah, im nopan acen inliinmopoi atimi vaig tah; et eteuc nopan ago nedoa, im nopan asan nigpa.

⁹ Et leh inhe natimi ago itai va nauritai oun?

¹⁰ Ek mun ecetai nauritai ehka inig ainyak, is ati a Atua imi ilpu hal u atimi, mika eri auritai iran ara.

¹¹ Et mun ago eklim upene niji itai asega aien an nopan ura; et lep ika aien eri merit ara par ahilek niji itai asega: ja et eti emda tah natimi par ato upene niji auritai u Atua, ahes an natupun iran um yetpan an nehni o un.

¹² Ek mun ecetai ainyak, nikavaig, et upene nedo inigki va natimi, mika yi imiacitak aien, um ago nedo upene an numoh vaig o un.

¹³ Ja nitai tup ahtai u Atua nigki, mika yi hag natimi, um umwig, um leh nohwaiitai is auritai vaig aien.

¹⁴ Ek ato ainyak mika etpu amen irai iji mesese niji itai asega et ago a Atua: et ehka par ehcil pan iran tah nitai iran, um lep ehka par atipagki tah nitai iran: maiya, et ago a Atua mika eri ecen vai yin natimi.

¹⁵ Et eteuc an nopan inig nitai inig is upyi eteuc; is lep eteuc an nopan iyehki nitai inig etpu eteuc; et lep imiadumoij pam a Atua nitai inig is eteuc.

¹⁶ Im lep inig, ek mun ecetai ainyak ithan nagesega inuarin eh tas alep iran, is idim eteuc nedo has eahki; im inuarin inig eh tas va neruvaig iran, is idim eteuc nedo has eahki.

¹⁷ Kis ika an liinmopok ainyak, Etpu aru nedo o ilpu atimi upene im ilpu atimi auatatimi a Atua: vaig inig nikavaig, et mun ati nopan aien va naktaktai asega im nauritai asega.

¹⁸ Kis lep ika an liinmopok ainyak va namen inigki u ilpu hal u atimi, et ehvaig ra a Atua, mika eri ecetai ara, nikavaig, era idivaig niji itai eklim edo irai pece ara.

¹⁹ Et yetpam ira atimi nitai inig et yetpam irai itai eklim edo irai pece; maiya, et tup ethi ache nitai inig et yetpam ira rau ehro: et mas inigki, et idim uco et mas iniaco; maiya, et tup ethi ache inlelesjai urau ehro; et eti esjilid tah natimi iran tah nitai eklim edo irai pece: et idim takitai niji itai asega.

²⁰ Era apan an nuarin et ethi ache niji itai asega; era ahes an nobohtan niji itai asega, era lep adumoij pan an nobohtan niji itai asega.

²¹ Di nigki et ato nesga atimi inig aien et aridjipan, im nesgai itai eklim edo nai pece inig et asuol sepan an nobohtan?

²² Va nitai inigki ek mun ecetai ainyak mika, et eti eteuc nitai inig et esjilid iran nigki, nikavaig, yi imiacitak nauritai o un a natimi; et imi yin nitai iji igki: et idim ehka vaig tah par imiapam yin igcaki, mika yi alum itai iji ehki etpu apitac iran.