Natimi Efehtas 2 - Intas Etipup

Nuarin tas alupas 2.

1 Et takitai nedo o atimi irai auritai ura va nimiacitak. 12 Era eijilid a ilpu atimi arapakau irai ilpu atimi ahnag, ja et tup ethi ache nitai inig et yetpam ehele ra asega. 18 Et takitai nauritai u atimi, vaig inig nikavaig, era eti ato ra sji igki ara eri atcijaig imi ra. 24 Et esjilid nitai inigki mika ti imiacitak nauritai uja, ja nitai tup ahtai u Atua nigki.

¹ IS ika inliinmopok ainyak, Maiya, inki ahilek nimiacitak ainyak, um ato incediaig: ja is idim takitai nitai inigki.

² Kis ika ainyak vai inlaav, Nedo ahnag nigki: im lep vai nimiacitak, Et ago inhe nitai inig?

³ Kis merit ainyak par umnyi waina, ja etpu atau irak narapakau an liinmopok; im lep par apol an nedo ahnag, um yetpan an nopan iyehki inki ato nitai upene inig ainyak, era ago nuaritai vaig natimi ithan nohatag, ira adiat asega era umumoh iran ara.

⁴ Kis ago niji auritai alupas ainyak; nikavaig, kis uctai eom imi nyak ainyak; kis ahwaig nokoro vaine imi nyak ainyak;

⁵ kis ago acujitai im nokoro vai nohwai itai imi nyak ainyak, um ahwaig iran niji obotpot cai oho asega:

⁶ kis ucji etpeiwai ainyak, mika yi etehvan inwai iran uri niji cai ededel:

⁷ kis lucsei imi nyak ilpu aheca atamaig ainyak, im ilpu aheca atahig; eris lep apos nahaiji ilpu aheca unyak an nimnim unyak; im lep inig, kis ohuun ainyak kurimatau, im nanin, im siip, is ahinag; kis esjilid ainyak ira atimi asega eris uhup irak ara Jerusalem:

⁸ kis asjapicnaig silver im colt imi nyak ainyak, im naga esjilid irai ilpu atimarid, im lep irai uari pece: kis lucsei ilpu atamaig acesaces nohranitai ainyak, im ilpu atahig acesaces nohranitai, im niji obotpot itai ahlai esjilid asega, era imiacitak natimi vaig.

⁹ Is idim uco, kis alupas ainyak, um ohuun niji itai is ahinag; kis esjilid ainyak ira atimi asega eris uhup irak ara Jerusalem: is lep amen ehelek narapakau unyak.

¹⁰ Kis eti imiaaij vai nyak ainyak tah nitai inig is merit vaig nesganimtak; kis eti acaiji inliinmopok ainyak vaig tah nitai imiacitak vaig; is idim imiacitak inliinmopok ainyak an nauritai asega unyak: is idim unyak nitai iji igki va nauritai asega unyak.

¹¹ Ja kis wat alum niji itai asega kis ago an nikmak ainyak, im niji auritai asega kis auritai iran ainyak: is idim takitai asega, is auahas inliinmopok, is eti upene tah nitai ithan nagesega.

¹² Kis ahidaig pagki nyak ainyak, mika ki alum narapakau, im nedo ahnag, im nedo maumau: ja etpu ago inhe a natimi inig et uhup iran a natimarid? nedo inig marom eris upyi ago.

¹³ Kis idim almoi ainyak mika, et esjilid narapakau irai nedo ahnag, et idivaig et esjilid inlah irai napat.

¹⁴ Et eteuc nesganimtai atimi arapakau an nipek o un; ja et atga an napat a natimi ahnag: kis lep almoi ainyak mika, et tup ethi ache nitai inig et yetpam ira ra asega.

¹⁵ Is idim ika inliinmopok ainyak, Et tup ethi ache nitai inig et yetpam irai natimi ahnag, etpu lep yetpam irak: ek a uri ainyak um esjilid iran an narapakau unyak? Ja is idim ika inliinmopok ainyak, Et lep takitai nitai inigki.

¹⁶ Eri eti imiehva natimi arapakau im natimi ahnag irai iji mesese, eri ahnag ira rau yi tup eti ache; vaig inig nikavaig, an nopan iyehki etpu yetpam, eri ahnag irai itai asega et eteuc an nopan inig. Et tup ethi ache inmas u natimi arapakau im natimi ahnag.

¹⁷ Va nitai inigki kis esjum ainyak numoh vaig; et idim imiedohalav nyak nauritai inig er ago ithan nagesega: et idim takitai niji itai asega, et auahas inliinmopoi atimi.

¹⁸ Im lep inig, kis esjum ainyak vai nauritai asega unyak, kis ago ainyak ithan nagesega: vaig inig nikavaig, ekpu atcijaig ainyak imi natimi isjeupigmoig nyak.

¹⁹ Etpu lep ato a di, nikavaig, etpu atimi arapakau aien, ka etpu atimi ahnag? ja etpu ohuun niji auritai asega iji ig aien kis auritai iran ainyak um arapakau ithan nagesega. Et takitai nitai inigki.

²⁰ Va nitai inigki kis aktaktai ainyak, mika yi jim asgeig inliinmopok iran tah nauritai asega unyak kis auritai iran ainyak ithan nagesega.

²¹ Et idim auritai tah au narapakau im nato itai, im namarero; ja etpu atcijaig aien imin tah et eche, yi pu ohuun aien, ja is eti auritai iran aien. Et takitai nitai inigki im nitai has esjilid.

²² Et ohuun inhe a natimi va nauritai asega o un, im nohocred u inliinmopon, is auritai han aien ithan nagesega?

²³ Et idim taigtaig aien ira adiat asega o un, et lep ohocred aien va nauritai o un; maiya, et eti atumop inliinmopon aien an nepig. Et lep takitai nitai inigki.

²⁴ Et idim upene vaig tah mika yi hag aien, um umwig, um amen upene va nauritai o un. Kis ato ainyak mika is ahes an nikmai Atua nitai inigki.

²⁵ Ja et esjilid irak a di par hegaig nitai hegaig, um auroauro um ahilek itai?

²⁶ Vaig inig nikavaig, et wat upene inliinmopoi Atua vaig tah, et alupai yin narapakau aien, im nato itai, im nimiacitak; ja et ika aien ehele natimi auatatimi yi ohocred, um asjapicnaig naga, um ikni itai, par alupai natimi inig et upene inliinmopoi Atua vai yin. Et idim takitai nitai inigki, et auahas inliinmopoi atimi.