Natimi Efehtas 12 - Intas Etipup

Nuarin tas alupas 12.

1 Eris idim ika eri imiehva Natimi ago ra natimi an nopan takuras ura. 8 Et merit a Natimi efehtas par esege upene imi atimi. 13 El era ecen va Atua natimi, uhpu imiatamaig upene ra vai intakitai.

¹ IM lep inig, namu imiehva Natimi ago euc aiek, irai iji adiat an takuras unyum, etu wit eti ham niji adiat has, um eti yetpam inmesese iji ig an idim tas vaig aiek, um ika, Ek eti imiacitak ra ainyak;

² uhu wit eti apat nagesega, ka inlah an mohoc, ka niji moijeuv, um eti fi adumoij pam niji apat, is wat ti pan itac incopda:

³ an nopan iyehki, eru wit eucjeucjeucaij a ilpu atimi aminjinaig neom; eru wit avakavak a ilpu atimi emda; eru wit eti elpat a ilpu atimi asjages irai itai, um tup amen; eru wit arupoig a ilpu atimi aespan itac irai mun neom;

⁴ uhu wit atapnes tapnes an nefalaig; uhu wit eti ahgei inmotjan nasjages irai itai; etu wit aiji aien an nahlaig u injaa; uhu wit imiasuol ilpu atahig asega u nohranitai;

⁵ eru wit imtitaig niji uarin ijinies ara, im lep niji uarin upoupo an nefalaig; etu wit elwa incai et ahi intisian; etu wit itai ehtipidai yin inheled; uhu wit ti ahvig tah nitai; eru wit apan natimi an nuarin amen iran ura um itu ira ra; eru wit atga jipe irai efalaig a ilpu atimi ehtigtaig;

⁶ uhu wit eti ahiyi inya silver, um eti ahtagrei nipjicolt: uhu wit eti ahtagrei nipjinitai an netpenwai, um eti asvi nitai atpilaig an nehpanwai.

⁷ An nopan iyehki etpu adumoij pan nohui atimi an nobohtan inig is ahes iran: etpu lep adumoij pan nesgan ehele Atua inig is alupai yin.

⁸ Et ika a Natimi efehtas, Et takitai ache itai, et takitai ache; maiya, et idim takitai niji itai asega.

⁹ Im lep inig, is idim arapakau a Natimi efehtas; va nitai inigki is lep esege imi atimi aien, mika eri ato itai ara; maiya, is aktaktai upene aien, um ahilek emda, um esyei intas arapakau is ahinag.

¹⁰ Is ahilek a Natimi efehtas, mika yi ecetai intas upene ira atimi aien: is atoh intas o un eris aged; maiya, is inveijec intas o un.

¹¹ Et idivaig mopul intas o ilpu atimi arapakau; um idivaig neel eris atcijiraig a ilpu atimi alupas irai asjapicnaig u atimi; is ikni ra a natimi is ethi ache is asgi siip o un aien.

¹² Im lep inig, ak inhal unyak, namu imiaiji intas o atimi iji igki aiek: er idim eti ti naged vaig nitaasviitai et ahinag; et lep auatialidi nohui atimi an nesvi itai alupas.

¹³ Intumu atahaijeg nesgan tas iji igki asega akaija: nikavaig, Namu imtitai Atua aiek, um imiaiji niji tas alep o un: nedo upene asega nigki, eris idim ika eri ago natimi.

¹⁴ Etpu idim almaijidjid niji auritai asega a Atua, im lep niji itai adenaig asega; niji itai upene marom, im lep niji itai has.