Natimi Efehtas 11 - Intas Etipup

Nuarin tas alupas 11.

1 Intas alep va nedo aiheuc va atimi. 7 Eris idim ika eri aktaktai nadiat inmas ura natimi an nopan umumoh ura, 9 im nadiat almaijidjid an nopan takuras ura.

¹ NAMU uhup aiek um ahwaig nupsi itai unyum, ja etpu apitac incopda um asuol; etu wit ti pan itac nadiat inyi ahinag, napu ehlek nitai caig unyum aiek.

² Namu ahtai nuarin nitai caig imi natimi et seven aiek, maiya, imi natimi et eet; na idim eti ato aiek nitai has inig etpu eteuc an nobohtan.

³ El et ohua incopda irai apat, eri atladwi se an nobohtan: el et eropse nauincai pan saud, ka nord, etpu amen nauincai an nuarin inig et eropse iran.

⁴ Aien et aminjinaig nimtinjap aien, inyi eti ahwai itai aien; im lep aien et aktaktai niji apat aien, inyi eti ehlek itai aien.

⁵ Na idim eti ato nedo o nesgai atimi aiek, um eti ato neteuc u inhalav an nipjinetgai risin: et idim uco, na eti ato aiek niji auritai u Atua inig et ago niji itai asega aien.

⁶ Namu ahwaig nupsi itai unyum aiek an nuhialeg, um jim asvahtec nikmam an jupura: na idim eti ato aiek mika, etpu esjilid inigki ka inaico, ka etpu upene ero um tup apapa.

⁷ Et idim inveijec, et aiyu inlah, et lep itai upene vai nesganimta atimi nalum vaig nagesega:

⁸ ja el et umoh tah natimi irai mesese et ahinag um imiacitak ra asega; etmu lep imiehva aien niji adiat apat; eri ahinag ara: etpu takitai niji itai asega etpu yetpam.

⁹ Ak intakuras inigki, namu imiacitak an takuras unyum aiek, etmu cediaig inliinmopom aiek irai iji adiat an takuras unyum; namu lep atga aiek an nefalaig inig et merit vaig inliinmopom, um ahilek nitai iji igki et almoi nesganimtam: ja namu ato aiek mika, etpu almaijidjid euc a Atua va nitai iji igki asega.

¹⁰ Va nitai inigki, namu atipagki intavaitap aiek an liinmopom, um atcijaig nedo has an nohum: et idim takitai nadualep vaig unyum, im intakuras vaig unyum.