Natimi Efehtas 10 - Intas EtipupNuarin tas alupas 10. 1 Intas va nedo arapakau im nedo ahnag: 16 vai inhag alupas nitai hegaig, vai intup eklim edo, vai mune. 20 Eris idim ika eri ecen vai ilpu atimarid natimi an naktaktai ura. 1 ET auanipin has nitai aspi u natimi ago itai auanipin upene vai lag emesmas: et idim uco, natimi inig er ecen vai yin va narapakau o un im natimi alupas o un, et auahas yin nedo ahnag tintin. 2 Et eteuc inliinmopoi natimi arapakau an matan; ja et eteuc inliinmopoi natimi ahnag an mauun. 3 Maiya, et wat atga an nefalaig a natimi ahnag, era ato natimi asega mika, et atimi ahnag aien, um eti aktaktai an liinmopon. 4 El et ehlohos intavaitap u natimarid vai euc, namu jim udei nuarin amen iran unyum aiek: et adahpoi nauatatimi esjilid nedo updak. 5 Kis mun lep ecetai nitai has inigki ainyak ithan nagesega; et ahes ehele natimarid nitai has inigki: 6 nikavaig, et atijai ilpu atimi ahnag aien irai uarin ijinies; ja era ateuc a ilpu atimi esjilid irai uarin upoupu. 7 Kis mun ecet ilpu aheca ainyak eris ateuc irai hors ara, im ilpu atimi alupas eris atga ubos ara, um idivaig ilpu aheca. 8 Aien et ucji nehpanitai aien, etpu etjose iran aien; im lep aien et attai intapin aien, etpu aces yin tah nimyeuv. 9 Aien et lucsei hat aien, etpu lucsei nohocred vaig aien; im lep aien et etuko cai aien, etpu ubutpotet nauahas yin vaig aien. 10 El et pug inpas o un tah, el et lep eti atineijin aien, et ehka vai yin par ago itai, el et eti isjis emda aien: ja et upene narapakau par asuptecnaig atoh. 11 El eh eti atapnes nimyeuv, etpu aces atimi aien; et idim uco va natimi hos tas. 12 Et idim intas aiheuc intas o natimi arapakau; ja et atleg yin nipjineucse natimi ahnag. 13 Et itai ahnag natupun u intas u nipjineucsen: et lep nedo ahnag par auahas atimi nehni u nasai itai o un. 14 Et ecahinag tas a natimi ahnag va niji itai etpu yetpam: ja et elika vaig tah natimi par ato nitai inig etpu yetpam; et lep ehka vaig tah par asuptecnaig ehelen nitai inig etpu apitac iran. 15 Et ucni natimi ahnag nauritai o un, vaig inig nikavaig, et eti ato aien nefalaig apan an maliyum iran. 16 Kaiheuc vai nup uran pece inig et halav a natimarid ura, era lep hag an nuhialeg a ilpu atimi alupas ura! 17 Era ahesmoij a nup uran pece inig et atimi arapakau a natimarid ura, era lep hag an nopan upene a ilpu atimi alupas ura, mika eri emda ara, jam eti mika eri ahnag ara vai kava! 18 Et mutit nimnim o un tah va nedo auatialidi alupas o un; et lep ate neom o un tah va nedo tup amen o un. 19 Era auanetha alupas natimi mika eri imiacitak ara; era umny nide vaine natimi mika eri cediaig ara: ja et upene mune va niji itai asega. 20 Namu jim asan tas ahlaijaig aiek vai natimarid, oʼo, an jim ago an liinmopom aiek; um jim asan tas ahlaijaig aiek vai ilpu atimi ikni itai an nuarin neom umjeg unyum: etpu idim apos pan intas unyum tah inman an nauanohatag, etpu lep asuptecnaig nitai inigki tah nitai et ae sjipe. |
Vanuatu Bible (Intas Etipup) © United Bible Societies, 1863, 2019.
United Bible Societies