Natimi Efehtas 10 - Intas Etipup

Nuarin tas alupas 10.

1 Intas va nedo arapakau im nedo ahnag: 16 vai inhag alupas nitai hegaig, vai intup eklim edo, vai mune. 20 Eris idim ika eri ecen vai ilpu atimarid natimi an naktaktai ura.

¹ ET auanipin has nitai aspi u natimi ago itai auanipin upene vai lag emesmas: et idim uco, natimi inig er ecen vai yin va narapakau o un im natimi alupas o un, et auahas yin nedo ahnag tintin.

² Et eteuc inliinmopoi natimi arapakau an matan; ja et eteuc inliinmopoi natimi ahnag an mauun.

³ Maiya, et wat atga an nefalaig a natimi ahnag, era ato natimi asega mika, et atimi ahnag aien, um eti aktaktai an liinmopon.

⁴ El et ehlohos intavaitap u natimarid vai euc, namu jim udei nuarin amen iran unyum aiek: et adahpoi nauatatimi esjilid nedo updak.

⁵ Kis mun lep ecetai nitai has inigki ainyak ithan nagesega; et ahes ehele natimarid nitai has inigki:

⁶ nikavaig, et atijai ilpu atimi ahnag aien irai uarin ijinies; ja era ateuc a ilpu atimi esjilid irai uarin upoupu.

⁷ Kis mun ecet ilpu aheca ainyak eris ateuc irai hors ara, im ilpu atimi alupas eris atga ubos ara, um idivaig ilpu aheca.

⁸ Aien et ucji nehpanitai aien, etpu etjose iran aien; im lep aien et attai intapin aien, etpu aces yin tah nimyeuv.

⁹ Aien et lucsei hat aien, etpu lucsei nohocred vaig aien; im lep aien et etuko cai aien, etpu ubutpotet nauahas yin vaig aien.

¹⁰ El et pug inpas o un tah, el et lep eti atineijin aien, et ehka vai yin par ago itai, el et eti isjis emda aien: ja et upene narapakau par asuptecnaig atoh.

¹¹ El eh eti atapnes nimyeuv, etpu aces atimi aien; et idim uco va natimi hos tas.

¹² Et idim intas aiheuc intas o natimi arapakau; ja et atleg yin nipjineucse natimi ahnag.

¹³ Et itai ahnag natupun u intas u nipjineucsen: et lep nedo ahnag par auahas atimi nehni u nasai itai o un.

¹⁴ Et ecahinag tas a natimi ahnag va niji itai etpu yetpam: ja et elika vaig tah natimi par ato nitai inig etpu yetpam; et lep ehka vaig tah par asuptecnaig ehelen nitai inig etpu apitac iran.

¹⁵ Et ucni natimi ahnag nauritai o un, vaig inig nikavaig, et eti ato aien nefalaig apan an maliyum iran.

¹⁶ Kaiheuc vai nup uran pece inig et halav a natimarid ura, era lep hag an nuhialeg a ilpu atimi alupas ura!

¹⁷ Era ahesmoij a nup uran pece inig et atimi arapakau a natimarid ura, era lep hag an nopan upene a ilpu atimi alupas ura, mika eri emda ara, jam eti mika eri ahnag ara vai kava!

¹⁸ Et mutit nimnim o un tah va nedo auatialidi alupas o un; et lep ate neom o un tah va nedo tup amen o un.

¹⁹ Era auanetha alupas natimi mika eri imiacitak ara; era umny nide vaine natimi mika eri cediaig ara: ja et upene mune va niji itai asega.

²⁰ Namu jim asan tas ahlaijaig aiek vai natimarid, oʼo, an jim ago an liinmopom aiek; um jim asan tas ahlaijaig aiek vai ilpu atimi ikni itai an nuarin neom umjeg unyum: etpu idim apos pan intas unyum tah inman an nauanohatag, etpu lep asuptecnaig nitai inigki tah nitai et ae sjipe.