Natimi Efehtas 1 - Intas Etipup

Nuarin tas alupas 1.

1 Et asuptecnaig a Natimi efehtas mika et takitai niji auritai an nobohtan: 4 era idim eti atumop niji itai irai edo ura, 9 era eti ago tah nitai mat ara; im lep inig, er ahnag irai itai itu asega, 12 is idim ecetai aien um uce an nahilek narapakau vaig o un.

¹ NIJI tas o Natimi efehtas ji igki: is hal u Tevit aieu, um atimarid Jerusalem.

² Et ika a Natimi efehtas, Et takitai ache itai; et takitai ache; maiya, et takitai niji itai asega.

³ Et leh inhe tah va nauritai asega o un et ago aien ithan nagesega?

⁴ Er apos nahaiji atimi et ethi, era lep emesmas nahaiji atimi et eche: ja et amen ahtu nobohtan irai iji mesese.

⁵ Et aridjai nagesega, et lep ete nagesega, um auroauro um yetpan an nuarin inig is aridjai iran aien.

⁶ Et apan nagesega alaig saud; et lep adumoij pam alaig nord: et arehed nimtinjap, um arehed; et lep aketo nimtinjap um adumoij pam, et idivaig nedo an narehed jipe o un.

⁷ Era yah niji ofowai asega, um vetpan an jap; ja et eti erijai injap; et lep adumoij pan niji ofowai an nuarin iyehki eris ahes iran.

⁸ Et alupas nauritai irai iji itai asega; et ehka vaig tah nasuptecnaig vaig: et eti esvi nesganimta atimi nalum itai vaig, um eti esvi intikga atimi natahaijeg itai vaig.

⁹ Etpu eteuc nitai iyehki is upyi eteuc; eri ago nitai iyehki eris upyi ago: et idim eti eteuc tah nitai mat ithan nagesega.

¹⁰ Et idim ehka par ika vaig tah nitai, Almoi, et itai mat nigki! is eteuc itu, an nopan iyehki intis pam eti eteuc akaija.

¹¹ Er eti imiehva niji itai is eteuc an nopan iyehki; eri lep eti imiehva niji itai etpu yetpam natimi iji ig eri epitpitac iran ara.

¹² Ek atimarid u nup Isreel Jerusalem ainyak, Natimi efehtas.

¹³ Kis emda ainyak mika ki ahilek narapakau, um ahodaig vai niji itai asega er ago itlian nohatag: is ati nauritai elika inigki a Atua imi atimi, mika yi ago upoupo inliinmopora vaig.

¹⁴ Ek mun aktaktai niji auritai asega ainyak, er ago itlian nohatag; ja et takitai asega, um idivaig incaig vaig nimtinjap.

¹⁵ Et ehka par ago atoh nitai inig et idim acalacal: et ehka par esvi nitai inig et idim ti.

¹⁶ Is aktaktai itai inliinmopok ainyak, um ika, Et alupas narapakau unyak; ek esjilid ainyak ira atimi asega eris uhup irak ara Jerusalem: et idim alupas narapakau im nato itai an liinmopok ainyak.

¹⁷ Kis emda ainyak par ahilek narapakau, im lep par ato nedo ahnag im nedo maumau: ja kis ecetai ainyak mika, et auahas inliinmopoi atimi nitai inigki.

¹⁸ Vaig inig nikavaig, et wat alupas narapakau o un tah, et idim alupas nohocred o un: im lep aien et ati nato itai o un aien, et lep ati intaigtaig o un aien.