Markus 9 - Intas Etipup

Nuarin-tas alupas 9.

¹ IS um ika ehele ra aien, Et inivaijec ineig ek asaig ehelemia ainyak mika, Era aiji igcaki nahaiji atimi, eri upyi hup ara um ecetai nehcohos pam emda u nelcau o Atua, ja par emesmas.

² IS wat ti pan itac nadiat is siks, is leh Pitrus a Iesu, im Jakobus, im Joanes, um imyiaridjai ehtaij an nedoon ijinies is ethi, eris echim amen ara ache: is um lep eche nohun aien an nuhup o ehtaij.

³ Is ememina napelumai iran, is idim ahi, um idivaig sno; et elika vaig tah natimi yiri apelumai an nohohtan nagovaig yi ahi, um idivaig.

⁴ Erus ehcohos pan ehele ra a Elaija im Moses: erus tas ehele Iesu arau.

⁵ Is tas a Pitrus, um ika ehele Iesu, Ak Natimi esege, et upene vai caija namenvaig igcaki: ektijmu ago neom yi eseij aijumtaij; yi ethi imi euc, um ethi imi Moses, um ethi imi Elaija.

⁶ Is eti ato intas o un aien par asaig; ehtijis um imtitaig ahtaij.

⁷ Is um etaluopni pam ehtaij nepeig: is ahes an nepeig nohran tah, um ika, Inhalav cop unyak ineigki: ahtijmu atahaijeg yin aijautaij.

⁸ Ehtijis um auroauro ahtaij um hedidai ehtaij, um yasyas, jam eti lep ecet tah natimi, is amen ache ehele ehtaij a Iesu.

⁹ Eris ahes an nedoon ara um asuol; is um acaiji ehtaij aien mika ehtiji jim asuptecnaig ahtaij nitai iji eigki ehtijis ecetai ahtaij, um uhum pan naopan ineig inyi nusjai a Inhal o natimi vai inmas o un.

¹⁰ Ehtijis eti asuptecnaig intas iyehki ahtaij, um tas jipe, um ika, Inhe ineigki, nusjai vai inmas?

¹¹ ¶ Ehtijis ahodai yin ahtaij, um ika, Era auri a ilpu atimi esege par ika, inyi uhup a Elaija um ham?

¹² Is um tas ehele ehtaij aien, um ika, Et idim uhup a Elaija um ham, um ehteduo niji itai asega; im lep ineig, eris aged vai Inhal o natimi, mika etpu ahinag nohocred o un, uhpu amcel vai yin.

¹³ Ek idim asaig ehelemitaij ainyak mika, Is mun ham a Elaija itu acen, eris ago vai yin niji itai asega eris merit ara, is idivaig eris upyi hup um aged vai yin.

¹⁴ ¶ Is apan aien ehele ilpu atimi atahaijeg yin, um alum atimi is ahinag ehele ra, im lep ilpu atimi esege nimyiisjis itai vaig ira ra.

¹⁵ Eris wat ecet yin atimi asjapicnaig asega, eris imyiali ara, um auroauro um athut pan ehelen, um aiheuc vai yin.

¹⁶ Is ahodai ilpu atimi esege aien, um ika, Inhe ineigki eka imyiisjis ira ra aijaua?

¹⁷ Is um tas natimi is ethi ira ra, um ika, Ak natimi esege, ek mun imyiapam inhalav atamaig unyak ainyak ehelum, et amen iran nagelo has pop;

¹⁸ et wat ham iran aien, um auhainse yin; et ahuya nipjineucsen aien, um ataktit neijin, et um auatialidi aien: ek mun asaig ainyak ehele ilpu atimi atahaijeg euc mika eri ahlo yin; ja era auatialidi ara.

¹⁹ Is um tas ehelen aien, um ika, Ak ilpu atimi imyiisjis nahcil, kis amen ehelemia ainyak is itu irak, um eropse inliinmopok ainyak vai caua um itu irak; imyiapam yin ehelek aijaua.

²⁰ Eris imyiapan yin ehelen ara: is wat alum yin aien, is auroauro a nagelo has um auohuoh yin; is eropse an nobohtan aien, um atcelcal, um ahuya nipjineucsen.

²¹ Is ahodai etman aien, um ika, Is leh nitai ineigki aien an nahopan? Is ika aien, An halav o un:

²² is ehcahinag ethaigjai yin aien an cop, um ethaigse yin an wai, mika yi auahas yin: el et emda aiek nagovaig tah nitai, aiheuc vai cumrau, um atau iramrau.

²³ Is ika ehelen a Iesu, El et emda aiek nimyiisjis ninivaijec vaig, el ek aiheue vai caurau ainyak: et tup upene niji itai asega vai yin et imyiisjis ninivaijec aien.

²⁴ Is auroauro a etmai inhalav iyehki um ahlaig ijinies, um taig, um ika, Ak Natimarid, ek imyiisjis ninivaijec ainyak; ago emda inliinmopok auatialidi aiek.

²⁵ Is alum atimi is ahinag a Iesu eris athut pan ara, is acaiji nagelo has iyehki aien, um ika ehelen, Ak nagelo has pop um ti intikgam, ek ika ehelum ainyak, namu atceijai yin aiek, um jim lep ham iran.

²⁶ Is um ahlaig a nagelo has, um auohuoh emda yin, um atceijai yin, um atga o un: is idivaig natimi mas aien; eris ika atimi is ahinag, Et mun mas aien.

²⁷ Ja is arapse va nikman a Iesu, um alcacse yin; is um atidai aien.

²⁸ Is wat apan aien anliin neom, eris echim ahodai yin a ilpu atimi atahaijeg yin, um ika, Ecra auatialidi aijama nahlo yin vaig vanhe?

²⁹ Is ika ehele ra aien, Er ahlo ilpu agelo has idivaig neigki, va nalaigaheni im natwakam ache.

³⁰ ERIS ahes eahki ara, um atga an pece Calili; is merit aien mika yi jim ato yin tah natimi.

³¹ Is asuptecnaig ehele ilpu atimi atahaijeg yin aien, um ika ehele ra, Eh mun ati Inhal o natimi irai ikma atimi, erupu atgei yin ara; ja uhu wit atgei yin, et wit ti pan itac nadiat inyi eseij, etpu lep nusjai aien.

³² Eris eti ato intas ineigki ara, jam imtitaig nahodai yin vaig.

³³ ¶ Is yetpan Kaperneum aien: is wat amen aien anliin neom, is ahodai ra aien, um ika, Inhe ineigki eka atga imyiisjis itai vaig aijaua an nefalaig?

³⁴ Eris eti tas ara: va nitai ineig, nikavaig, eris atga imyiisjis itai ara an nefalaig, um ika, inyi esjilid tah ra a di?

³⁵ Is um ateucse aien, um ahlaig va atimi is twelv, um ika ehele ra, El et merit tah natimi mika yi esjilid ira ra, etpu apitac ira ra asega aien, um aheca ura asega.

³⁶ Is leh inhalav is ethi aien, um ati yin an nuhup ura: is ablim pam yin aien, um ika ehele ra,

³⁷ Aien et leh inhalav et idivaig ineig aien an nidak, et leh nyak aien; aien et leh nyak aien, et eti leh nyak ache aien, ja et leh yin aien is abrai nyak aien.

³⁸ ¶ Is tas ehelen a Joanes, um ika, Ak Natimi esege, ecris ecet tah aijama is ahlo ilpu agelo has aien an nidam, jam eti ahced caija; ecris acaiji yin aijama va nedo o un, nikavaig, is eti ahced caija aien.

³⁹ Is um ika a Iesu, Jim acaiji yin aijaua: et elika vaig tah, et ago nauritai esjilid aien an nidak, par tup asan tas has vai nyak.

⁴⁰ Aien et eti tak atimi iraija aien, et apa uja aien.

⁴¹ Aien et alumamia tah inwai an nipjinitai aien an nidak, mika aki umnyi aijaua, va nitai ineig, nikavaig, eka u Kristo aijaua, et inivaijec ineig ek asaig ehelemia ainyak mika, etpu leh nimtan imi yin aien.

⁴² Aien et ago nedo oop vaig tah ilpu halav iji eigki aien era asgeig irak ara, et upene vai yin el eh athai inhat irara flaur an nauinwan, um ethaigse yin an jop.

⁴³ El et itai epihtau imi euc nikmam, anum acaldei aiek: etpu upene vai euc napanvaig an nuarin umoh, um ighin; jam has napanvaig an pece has, el et eteuc ero nikmam, an cop ineig inyi ti opos:

⁴⁴ inyi ti mas iran nimyiv ura, um eti lep opos incop.

⁴⁵ El et itai epihtau imi euc neduom, anum acaldei aiek: etpu upene vai euc napanvaig an nuarin umoh, um alkalka; jam has nethaig pan euc vaig an pece has, el et eteuc ero neduom, an cop ineig inyi ti lep opos:

⁴⁶ inyi ti mas iran nimyiv ura, um eti lep opos incop.

⁴⁷ El et itai epihtau imi euc nesganimtam, anum atipagki aiek: etpu upene vai euc napanvaig an nelcau o Atua, um ethi ache nesganimtam; jam has nethaig pan euc vaig an pece has an cop, um ero nesganimtam:

⁴⁸ inyi ti mas iran nimyiv ura, um eti lep opos incop.

⁴⁹ Uhpu ati incop ira atimi asega; uhpu ati inmohoanjop irai iji itai ahlap asega.

⁵⁰ Et upene inmohoanjop: ja el et aiyu inmohoanjop, uhpu lep leh nesgan um uauo? Etmu unyimia inmohoanjop; akumu eklim amen eigpa aijaua,