Markus 7 - Intas Etipup

Nuarin-tas alupas 7.

¹ ERIS asjapicnaig pan ehelen a ilpu Farisi, im nahaiji ilpu atimi esege, eris ahes Jerusalem ara.

² Eris wat alum nahaiji ilpu atimi atahaijeg yin ara inhagvaig jam eti upyi ahisjim, is mun itaup nikmara, eris acaiji ra ara.

³ Era imyiaiji intas alep o ilpu atimi tas alep a ilpu Farisi, im nupu Jutaia asega, um upyi hup um ehcahinag ahisjim, ja par hag.

⁴ Era wit ahes an tiptag ara, era upyi hup ara um ahisjim, ja par hag. Era apol an tas alep ura ara va niji itai et ahinag, nikavaig, eri yiri nipjiitai umwig, im nipjiitai uri wai, im nipjibras, im lep intinan.

⁵ Eris ahodai yin a ilpu Farisi im ilpu atimi esege, um ika, Era auri a ilpu atimi atahaijeg euc par eti imyiaiji intas alep o ilpu atimi tas alep, um eti upyi ahisjim, ja par hag?

⁶ Is tas aien, um ika ehele ra, Et idim inivaijec intas ineig is upyi aged a Aiseya vai caua, ak ilpu atimi efaifa, um ika, “Era imyiahpas nyak nup igcaki an nipjineucsera ache, ja et eteuc itac acen inliinmopura vai nyak:

⁷ um maumau nimyiahpas nyak ura, era esege intas alep o atimi ache ara.”

⁸ Eka imyipalea intas alep o Atua aijaua, um apol an tas alep o atimi, nikavaig, eri yiri nipjiitai uri wai, im nipjiitai umwig: et idim ucco niji itai et ahinag eka ago aijaua.

⁹ Is um ika ehele ra aien, Eka idim imyipalea intas alep o Atua aijaua, mika aki imyiaiji intas alep unyimia.

¹⁰ Is um ika a Moses, “Namu eccen vai etmam im risum aiek”: “aien et asan tas has aien ehele etman im risin, inyi idim mas aien.”

¹¹ Ja eka ika aijaua, El et ika tah ehele etman im risin, Et Korban, nesgan tas ineigki, et itaup vai Atua, niji itai unyak, et upene vai caurau; inyi ti mas aieu.

¹² Eka acaiji yin aijaua mika yi jim ago tah nitai aien vai etman im risin;

¹³ eka auahas intas o Atua aijaua an tas alep iji eigki unyimia, eka asaig aijaua: et idim ucco niji itai et ahinag eka ago aijaua.

¹⁴ ¶ Is ahlaig va atimi asega aien, um ika ehele ra, Akumu atahaijeg intas unyak aijaua asega, um ato:

¹⁵ et eti auahas atimi nitai iji eigki era hegaig ara: ja et auahas ra nitai iji eigki et ehlohos anliinmopura.

¹⁶ Aien et eteuc intikgan aien par ahgei itai, etmu atahaijeg aien.

¹⁷ Is wat ude atimi asjapicnaig aien um apan anliin neom, eris ahodai yin a ilpu atimi atahaijeg yin vai intas ecsipece ineigki.

¹⁸ Is um ika ehele ra aien, Et echamecha inliinmopomia aijaua? eka idim ato aijaua, nikavaig, et eti auahas inliinmopoi atimi nitai iji eigki era hegaig ara;

¹⁹ et eti asuol nitai caig anliinmopura, ja an nipjinetgara ache, er erekhaig an nuarin ikni itai has; iran, et par upene nitai caig asega.

²⁰ Is um ika aien, Et auahas atimi nitai iji eigki et ehlohos anliinmopura.

²¹ Et ehlohos anliinmopoi atimi naktaktai has, ingaijid, nedo has, natgei atmas,

²² nehneg itai, inmerit vai inpadiaig, nauatatimi, nefaifa, nahvig niji itai has, nauatitai, intas has, nedo ijinies, nedo ahnag:

²³ et ehlohos nitai iji eigki asega anliinmopoi atimi, um auahas ra.

²⁴ IS ahes eahki aien, um apan irai uari pece Tairus im Saiton, is apan aien anliin neom is ethi, um merit mika yi jim ato tah: ja is ehka vai yin nechim amenvaig.

²⁵ Is atahaijeg intas vai yin intakata is ethi, is amen nagelo has irai inhalav atahaig o un, is han aien um atpuse u neduon:

²⁶ is takata Crisi aien, ja eris apos yin Sairofinaisi; is ugni yin aien mika yi ahlo nagelo has irai inhal o un.

²⁷ Is um ika ehelen a Iesu, Erumu uhup a ilpu halav um gaije: et eti upene inlehvaig nitai caig o ilpu halav, um alayi, kuri.

²⁸ Is um tas aien, um ika ehelen, Et idim inivaijec, ak Natimarid: ja era hegaig nahri itai hegaig o ilpu halav kuri ithan nitai hag.

²⁹ Is ika ehelen aien, Atga unyum aiek, vai intas ineigki; et mun atceijai inhal unyum a nagelo has.

³⁰ Is wat apan aien anliin neom o un, is ecet inhal o un aien, is asjeuc aien an tinan, is mun atceijai yin a nagelo has.

³¹ IS lep ahes aien irai uari pece Tairus im Saiton, um atga irai iji uari pece an pece Tikapolis, um apan u injop Calili.

³² Eris imyiapan ehelen natimi is ethi ara, is ucjipines intikgan aien um pop; eris ugni yin ara mika yi atijai nikman iran.

³³ Is leh yin aien ehele atimi is ahinag um imyiapan yin an taka uarin, um ati nupsikman ero an tikgan ero, um agdei yin, um atcei pan nipjineucsen;

³⁴ um easji pan an nohatag, um adeijai yin, um ika ehelen, Effada, nesgan tas ineigki, Etmu ejose intikgam aiek.

³⁵ Is eti laulau um ejose intikgan aien, um upenc nipjineucsen, is um tas upene aien.

³⁶ Is acaiji ra aien mika eri jim asaig ehele atimi ara: ja is wat acaiji emda ra aien, is esjilid nimyiisjis ura ara um asuptecnaig;

³⁷ is esjilid acen nimyiali ura ara, um ika, Et idim ago upenc niji itai asega aien: et ika aien eri ahgei itai a ilpu atimi ucjapines intikgara, um tas a ilpu atimi pop.