Markus 6 - Intas Etipup

Nuarin-tas alupas 6.

¹ IS ahes eahki aien, um atga o un, um apan an pece o un; eris ahced yin a ilpu atimi atahaijeg yin.

² Is wat yetpam nadiat atumop, is esege imi ra aien anliin neom alaigaheni: eris atahaijeg yin natimi is ahinag, um imyiali, um ika, Et leh nitai iji eigki eda a natimi ineigki? nev arapakau ineigki eris alupai yin, mika yi ago nauritai esjilid iji eigki an nikman aien?

³ Et idim atimi aredcai aien, um hal o Mere, um etoai Jakobus, im Joses, im Juta, im Saimona; era amen eheleija a ilpu atahaig iran. Eris esjum vai yin ara.

⁴ Ja is ika ehele ra a Iesu, Era eti eccen vaig tah naprofeta nup uran pece o un ache, im ilpu atimi ehpan iran, im lep ra an nimnim o un.

⁵ Is ehka vai yin nagovaig tah nauritai esjilid eahki, ja is atijai nikman aien ira atimi emehe is eti elpat, um ago cehcehe ra.

⁶ Is um imyiali aien va nimyiisjis nahcil ura. Is apan aien irai iji uari-pece marehed mihtag, um esege.

⁷ IS asjapicnaig atimi is twelv ehelen aien, um atupun um abrai ra, mika eri apan ara um aro maro ehni; is alupai ra nemda aien, mika eri esjilid irai ilpu agelo has ara;

⁸ is acaiji ra aien mika eri jim apos itai ara an nefalaig, nitai iseuc ache; jim apos nefehcat, im nitai caig, im mune an nitai ahid ura:

⁹ jam atohoaig eduora irai cedpai eduora; um jim aso ra irai apelumai yi ero.

¹⁰ Is ika ehele ra aien, Aku wit apan aijaua anliin neom an tah anuarin, um amen eahki wat uhum pan naopan ineig aki atga unyimia aijaua.

¹¹ Ara era eti leh caua ara, um eti atahaijeg intas unyimia, aku wit ahes eahki aijaua, wat ika aki atga unyimia, um ucjucjai obohtan irai eduomia, nitai asuptecnaig imi ra. Et inivaijec ineig ek asaig ehelemia ainyak mika, Inyi tintin nohocred o nupu Sotom im nupu Comora an nadiat almaijidjid, ja etpu esjilid nohocred o nup uran nuarin-pece iyehki.

¹² Eris apan ara um tas ehele atimi, mika eri adumoij anliinmopura ara.

¹³ Eris ahlo ilpu agelo has is ahinag ara, um aspi naraki ira atimi emehe is ahinag, um ago cehcehe ra.

¹⁴ Is atahaijeg intas vai yin a Herot natimarid: (is apaahni nidan:) is ika aien, Et mun lep nusjai Joanes Natimi baptiso, et ago niji auritai esjilid aien.

¹⁵ Eris ika nahaiji ra, Elaija neigki. Eris ika nahaiji ra, Naprofeta neigki, et idivaig tah irai ilpu profeta aien.

¹⁶ Ja is wat atahaijeg intas ura a Herot, is um ika aien, Joanes neigki, kis auud yamud nidjinin ainyak; et mun lep nusjai aien.

¹⁷ IS upyi abrai atimi a Herot mika eri arop irai Joanes, um arore yin, um ati yin anliin neom ipjin, va Herotyas ehgai Filipus etoan; is leh yin aien ehgan.

¹⁸ Is ika ehele Herot a Joanes, Et itaup vai euc inlehvaig ehgai etoam.

¹⁹ Is um edemda vai yin a Herotyas, um ika yi atgei yin; ja is ehka vai yin:

²⁰ is imtitai Joanes a Herot, is ato aien, nikavaig, is atimi upene aien, um atoh nedo o un, is aminjinaig yin aien, um atahaijeg yin, um ago nedo upene is ahinag, um imyiacitak vai intas o un.

²¹ An nadiat upene vaig is ethi, nadiat eris apos Herot iran, is auanetha alupas aien incai ilpu atimi alupas o un, im ilpu atimarid, im ilpu atimi ikni itai an pece Calili;

²² is apan anliin neom a inhalav atahaig o Herotyas, um adekdikjai, is um imyiacitak inliinmopoi Herot im lep ra eris ateuc ehelen ara, is ika a natimarid ehele natahaig iyehki, Ugni nyak aiek va nitai ineig nai merit vaig aiek, ekpu alupai euc ainyak.

²³ Is asig yi aktit ehelen aien, um ika, Ekpu alupai euc nitai ineig ainyak napu ugni nyak vaig aiek, inyi apapa pan an nahaiji nelcau unyak.

²⁴ Is alau ijo aien, um apan ehele risin, um ika, Inki ugni inhe ainyak? Is ika aien, Nidjini Joanes Natimi baptiso.

²⁵ Is auroauro aien um apan ehele natimarid, um ugni yin, um ika, Ek merit ainyak mika an auroauro aiek, um alupai nyak nidjini Joanes Natimi baptiso an haklin nelcau.

²⁶ Is taigtaig alupas a natimarid; ja is eti acaiji yin aien vai intas upyi asig yi aktit o un, im lep vai ra eris ateuc ehelen ara.

²⁷ Is auroauro a natimarid um abrai naheca is ethi, um ika ehelen yi leh nidjinin: is apan aien anliin neom ipjin, um auud yamud nidjinin,

²⁸ um apos nidjinin an haklin nelcau, um alupai natahaig iyehki: is um alupai risin a natahaig.

²⁹ Eris wat atahaijeg a ilpu atimi atahaijeg yin, eris apan ara um leh nohun, um atise yin an mun nij.

³⁰ ERIS asjapicnaig pan ehele Iesu a ilpu apostolo, um asuptecnaig niji itai asega eris ago ara, im lep nesege ura.

³¹ Is ika ehele ra aien, Ti echim apan akaija ache an nuarin namasacen, um atumop tintin: is ehka vai ra inhagvaig va atimi is ahinag, eris idumdumoij pan ara ehele ra.

³² Eris ateri natga ura ara an nelcau um apahai an nuarin namasacen.

³³ Eris wat almoi napan ura natimi, eris ato yin atimi is ahinag, um ahes irai iji uari-pece asega, um athut ubos, um uhup ira ra, um asjapicnaig pan ehelen.

³⁴ Is ahes an nelcau a Iesu um asuol, um alum atimi is ahinag, is aiheuc vai ra aien, eris idivaig siip et ti asgi ra ara: is esege imi ra aien niji itai is ahinag.

³⁵ Is wat jupura, eris apan ehelen a ilpu atimi atahaijeg yin, um ika, Et amasacen igcaki, um lep ubutpotet u nepeig:

³⁶ abrai ra aiek mika eri terimterim jipe ara, um apan irai iji uari-pece, im lep tup an pece iyehki asega, um auanimtan nitai caig incara: eh ti nitai caig incara ara.

³⁷ Is tas aien, um ika ehele ra, Akumu alaa ra nitai caig aijaua. Eris um ika ehelen ara, Et elika vai cama napanvaig um ahtai tollar inyi dirte, um auanimtan nitai caig incara.

³⁸ Is ika ehele ra aien, Et ehed nareto unyimia? apan aijaua um almoi. Eris wat almoi ara, um ika, Et faiv ache, um ero ache numu.

³⁹ Is um ika ehele ra aien, eri ahai atimi asega, um asaig ehele ra, eri ateucse irai efelelicai um esyei ra.

⁴⁰ Eris um ateucse ara um esyei ra, eris huntret nahaiji ra, im fifte nahaiji ra.

⁴¹ Is leh nareto is faiv aien, im numu is ero, um easji pan an nohatag, um naaurineig, um iswoplecoplec nareto iji ehki, um alupai ilpu atimi atahaijeg yin, mika eri edaig ira ra ara; is lep edaig aien numu erahki ira ra asega.

⁴² Eris hag ara asega, um gaije.

⁴³ Eris asjapicnaig nuari areto ara im nuari urau eris eti atahni ara, um atohoaig irai efehcat is twelv, is um ohua.

⁴⁴ Ara eris hag nareto iji ehki ara eris faiv dausant ara.

⁴⁵ Is auroauro aien, um ehlig ilpu atimi atahaijeg yin, mika eri aridjai an nelcau ara, um apan an nahaijin jop Bedseta um uhup iran, ja is amen aien, um abrai atimi mika eri atga ura ara.

⁴⁶ Is abrai ra aien, um aridjai an nedoon, um alaigaheni.

⁴⁷ Is wat jupura, is amen nelcau an jop, ja is echim amen aien ache ubos.

⁴⁸ Is alum ra aien eris ahelid emda ara; is has nimtinjop vai ra: is wat athut nadiat, is um apan ehele ra aien, um atga an jop, um ika yi ahtaregdei ra.

⁴⁹ Ja eris wat ecet yin ara natgavaig an jop, eris aktaktai ara, um ika natmas ineigki, eris aunyauwaig ara:

⁵⁰ eris ecet yin ara asega, um ehioehio inliinmopura. Is auroauro aien um tas ehele ra, um ika ehele ra, Etmu eropse inliinmopomia aijaua: ainyak aigki; jim imtitaig aijaua.

⁵¹ Is um aridjai ehele ra aien an nelcau; is um esjaig: eris imtitaig alupas ara, um imyiali yin.

⁵² Eris eti aktaktai ara nedo emda o un irai areto: is ipjin inliinmopura ara.

⁵³ ERIS apan ara, um apahai an pece Jenesaret.

⁵⁴ Eris wat ahes an nelcau ara um asuol, eris idim ato yin atimi,

⁵⁵ um athut an pece iyehki asega um arahed mihtag, um apos pan ra sji eigki irai itai ahled eris emehe ara, an nuarin iyehki eris atahaijeg vai yin iran.

⁵⁶ Is wat apan aien irai iji uari-pece haklin, im inuari-pece alupas, im lep tup an pece iyehki, eris um ikni atimi emehe ara irai efalaig, um ugni yin mika eri atcei pan intid an napelumai o un ara: ara eris atcei pan yin ara, eris umumoh ara.