Markus 5 - Intas Etipup

NAURIN-TAS ALUPAS 5.

¹ ERIS apan ara an jop, um apahai an nahaijin eahki an pece Catara.

² Is wat ahes an nelcau aien um asuol, is aubillid yin natimi is ethi, is ahes aien irai mai ij eris ikni atimi emesmas iran, is amen iran a nagelo has;

³ is amen aien irai mai ij iji ehki; is ehka vaig tah narore yin vaig irai atau hat:

⁴ eris ehcahinag arore yin irai jaula im lep natau hat, is um atgeig yamud atau hat aien, um asjamud jaula: is elika vaig tah nacaiji yin vaig mika yi eropse:

⁵ is amen aien irai iji epeig, im lep niji adiat, irai lola edoon, im lep irai mai iji, um aunyauwaig, um atcapisji yin irai hat.

⁶ Ja is wat ecet Iesu aien itac acen, is athut aien, um atpuse an nuhup o un,

⁷ um ahlaig ijinies, um ika, Nai merit aiek vanhe ehelek, ak Iesu, Inhal o Atua esjilid? ek ugni euc ainyak vai Atua, mika an jim abli nyak aiek.

⁸ Is um ika ehelen aien, Namu atceijai natimi ineigki aiek, ak nagelo has.

⁹ Is ahodai yin aien, um ika, Nidam di? Is asuptecnaig aien, um ika, Nidak Lijon: ecra ahinag aijama.

¹⁰ Is ugni emda yin aien mika yi jim abrai ra, eri ude inpece iyehki ara.

¹¹ Eris amen picad is ahinag ubutpotet u lola edoon, um hag.

¹² Eris ugni yin a ilpu agelo has asega, um ika, Abrai cama aiek mika ecri ahei picad aijama.

¹³ Is auroauro a Iesu um abrai ra. Eris atceijai yin a ilpu agelo has um ahei picad; eris um athut picad an nohmun isas, um ehlelelse an jop, (eris tu dausant ara,) eris um atpoijej ara an jop.

¹⁴ Eris um aha a ilpu atimi aminjinaig picad, um asuptecnaig an nuarin-pece, im lep an pece iyehki asega. Eris apan ara mika eri almoi nedo ineigki.

¹⁵ Eris apan ehele Iesu ara, um almoi natimi iyehki is ahei yin a nagelo has um amen iran Lijon, is ateuc aien, um aso yin an napelumai, is mun eteuc lelen aien; eris um imtitaig ara.

¹⁶ Ara eris almoi ara, eris asuptecnaig nitai ineigki ehele ra sji ehki ara, eris ago irai natimi ineig, is amen iran a nagelo has, im lep vai picad.

¹⁷ Eris ugni yin ara mika yi atga o un aien, um ude inpece ura.

¹⁸ Is wat aridjai aien an nelcau, j is um ugni yin a natimi iyehki is amen iran a nagelo has, mika yi; ahced yin.

¹⁹ Ja is acaiji yin a Iesu, um ika ehelen, Apan aiek an nimnim unyum ehele ilpu atimi ehpan iram, um asuptecnaig ehele ra nedo emda iram et mun ago a Natimarid, im naiheuc vai euc o un.

²⁰ Is um atga o un aien, um apan Tikapolis, um asuptecnaig nedo emda o Iesu iran: eris imyiali natimi asega.

²¹ IS lep atga a Iesu an nelcau, um lep apahai an nahaijin eahki, eris asjapicnaig pan ehelen natimi is ahinag; is amen aien u injop.

²² Is um han ehelen natimi alupas an neom alaigaheni is ethi, nidan Jerus; is wat ecet yin aien, is atpuse u neduon aien,

²³ um ugni emda yin, um ika, Et mun ubutpotet o unmas o unhalav atahaig unyak: ek ugni euc ainyak mika an apam aiek, um atijai nikmam iran, mika yi cehcehe aien; etpu umoh aien.

²⁴ Is um ahced yin a Iesu; eris apitac yin natimi is ahinag, um atamerit ehelen.

²⁵ Im lep ineig, intakata is ethi, is emehe aien va nahlamerai u inja an mesese is twelv,

²⁶ is alupas nohocred o un vai ilpu atimi atipagki nemehe is ahinag, is um ahtai ehni inpadiaig o un aien, jam eti umoh, ja is esjilid nemehe iran.

²⁷ Is wat atahaijeg vai Iesu aien, is apan aien irai ibla atimi is ahinag an cehen, um atcei pan napelumai iran.

²⁸ Is ika aien, El ek atcei pan napelumai iran ainyak, el ek par umoh ainyak.

²⁹ Is eti laulau um ame nahlamerai u inja iran; is ato nohun aien, nikavaig, is mun ti nemehe has iran.

³⁰ Is auroauro a Iesu um tup ispan ato, nikavaig, is ahes iran nemda, is ahidai yin aien irai ibla atimi is ahinag, um ika, Et atcei pan napelumai irak a di?

³¹ Eris ika ehelen a ilpu atimi atahaijeg yin, Na alum atimi et ahinag aiek era atamerit ehelum ara, na auri aiek par ika, Et atcei pan napelumai irak a di?

³² Is um ahidai yin aien mika yi alum yin, is ago nedo ineigki.

³³ Ja is ato nitai iyehki eris ago i iran a intakata, is imtitaig aien, um ucjucjucaij, um apan, um atpuse an nuhup o un, um asuptecnaig inivaijec nedo o un.

³⁴ Is um ika ehelen aien, Ak intakata ineigki, na mun lep cehcehe aiek va nimyiisjis ninivaijec unyum; eklim atga unyum aiek, et mun edoaijaig iram aiek va nemehe has iram.

³⁵ Is wat cas aien, eris ahes hal an nimnim o natimi alupas an neom alaigaheni um apan, um ika, Et mun mas inhal unyum; jim imyidohalav Natimi esege aiek.

³⁶ Is wat atahaijeg intas ineigki a Iesu eris asaig ara, is ika ehele natimi alupas an neom alaigaheni aien, Jim imtitaig aiek, jam imyiisjis ninivaijec ache.

³⁷ Is acaiji atimi aien mika eri jim apitac yin, echim ahtaij ache, Pitrus, im Jakobus, im Joanes etoai Jakobus.

³⁸ Is yetpan aien an neom o natimi alupas an neom alaigaheni, um alum ra nehteigtaigvaig, eris imyitaig yin ara, um taig tas ijinies.

³⁹ Is wat apan aien anliin neom, is ika ehele ra aien, Eka auri aijaua par ehteigtaig, um imyitaig yin? et eti mas natahaig ineigki, et umjeg aien.

⁴⁰ Eris imyilav yin ara. Ja is abrai ra asega aien mika eri alau ijo, is leh etman aien im risi natahaig, im lep ra eris ahced yin ara, um apan an nuarin ineig is asjeuc iran natahaig iyehki.

⁴¹ Is arapse va nikmai natahaig aien, um ika ehelen, Talida Kumai; nesgan tas ineigki, Ak natahaig ineigki, ek asaig ehelum ainyak mika an atidai aiek.

⁴² Is auroauro natahaig iyehki um atidai, um atga; is twelv mesese iran. Eris imyiali alupas ara.

⁴³ Is acaiji emda ra aien mika eri jim asuptecnaig nedo ineigki ehele atimi; is ika aien, eri alaan tah nitai caig.