Markus 4 - Intas Etipup

Nuarin-tas alupas 4.

¹ IS um lep atupun aien um esege an nohmunjop: eris asjapicnaig pan ehelen natimi is ahinag, is um aiijai pok an jop aien, um ateuc an nelcau; eris amen an nimtidin natimi asega, eris ahinag ara.

² Is esege imi ra aien um ecsipece irai iji itai is ahinag, um ika ehele ra an nesege o un,

³ Akumu atahaijeg aijaua; Is apan natimi ahapol is ethi par ahoaig upsi itai:

⁴ is wat ahoaig aien, is um elel nahaiji nupsi itai an nahaijin nefa-laig,eris ahtag pan inman um hegaig.

⁵ Is um lep elel nahaijin irai uarin eteuc nilpauhat iran, ja is haklin nobohtan iran; is eti laulau um edel, is haklin nobohtan iran:

⁶ ja is wat aridjai nagesega, is um imlai, um mese, is eti eteuc necvan.

⁷ Is um lep elel nahaijin irai efelelicai has, is um ededel nefelelicai has, um atgei, is um eti oho.

⁸ Is um lep elel nahaijin an nobohtan upene, is um oho um ahinag nohoan, is eteuc nohoan is dirte iran is ethi, im sikste iran is ethi, im wun huntret iran is ethi.

⁹ Is um ika ehele ra aien, Aien et eteuc intikgan aien par ahgei itai, etmu atahaijeg aien.

¹⁰ Is wat echim amen aien, eris ahodai yin a ilpu atimi ahced yin im lep natimi is twelv va nesgan tas ecsipece ineigki.

¹¹ Is um ika ehele ra aien, Eh mun alupai caua mika aki ato aijaua niji itai adenaig an nelcau o Atua: ja eh mun asaig nitai iji egki asega irai tas ecsipece ehele tak atimi:

¹² mika eri almoi ara, jam eti ato; um atahaijeg, jam eti ahaijeg iran; va eri jim adumoij pam ara, um eti leh neruvan nedo has ura.

¹³ Is um ika ehele ra aien, El eka eti ato intas ecsipece ineigki aijaua, akupu ehvato intas ecsipece asega aijaua?

¹⁴ Et idivaig natimi ahapol a natimi ineig et ahoaig intas aien.

¹⁵ Ara era idivaig nahaijin nefalaig ara, eris ahoaig intas iran; ara aigki era atahaijeg ara, ja et auroauro a Satana um atipagki intas eris ahoaig anliinmopura.

¹⁶ Ara era idivaig nuarin eteuc nilpauhat iran ara, eris ahoaig upsi itai iran; ara aigki era atahaijeg intas ara, um auroauro um leh, um imyiacitak;

¹⁷ ja et eti eteuc necvan tas ira ra, era eti elvamen ara yi itu ira ra: et wat aridjai nohocred im nedemda vai ra vai intas, era auroauro ara um adumoij,

¹⁸ Ara era idivaig nuarin et eteuc nefelelicai has iran ara, eris ahoaig upsi itai iran; ara aigki era atahaijeg intas ara,

¹⁹ ja et asuol inliinmopura nak taktai niji itai an nohohtan ineigki, im inpadiaig efaifa, im nedo ahvig intak itai, um atgei intas, et um eti oho.

²⁰ Ara era idivaig nobohtan upene ara, eris ahoaig upsi itai iran; ara aigki era atahaijeg intas ara, um leh, um oho, et eteuc nohoan is dirte iran tah ra, im sikste iran tah ra, im wun huntret iran tah ra.

²¹ Is ika ehele ra aien, Er eti leh incop alahala, um atise ithan nipjinitai, ka ithan tinan, ja er atijai an nitai ati incop alahala iran.

²² Uhpu ecetai niji itai asega eris adenaig, um ato niji itai asega eris adahpoi.

²³ Aien et eteuc intikgan aien par ahgei itai, etmu atahaijeg aien.

²⁴ Is um ika ehele ra aien, Akumu aktaktai intas ineig aijaua eka atahaijeg: uhpu alupai caua inyi idivaig eka alupaig tah, aijaua; etpu esjilid nuarin imi caua eka atahaijeg aijaua.

²⁵ Aien et ikni itai aien, etpu lep leh itai aien; ja aien et eti ikni itai aien, uhpu iknipagki niji itai iran.

²⁶ Is ika aien, Nelcau o Atua et idivaig natimi is ethi is ahoaig upsi itai aien uman;

²⁷ is umjeg aien an nepeig, um aiji an nadiat, is um ededel upsi itai, um ujipsotan, ja is eti almoi aien nedelvaig:

²⁸ et tup edel nohoai itai an nobohtan; et uhup nerin, im lep intisian, ja par apitac um metto nohoan:

²⁹ et wat metto nohoan, era auroauro natimi um aldei an naopan ineig, er asjapicnaig nohoai itai iran.

³⁰ Is lep ika aien, Et idivanhe nelcau o Atua? inti asaig neveh tas ecsipece akaija par asuptecnaig?

³¹ Et idivaig nupsi mustart, eh wat ahoaig an nobohtan, et esjilid neklim haklin o un irai upsi itai asega an nobohtan;

³² ja eh wat ahoaig, et um ahlau ohua, um esjilid irai efelelicai asega, um atgeig jipe inran alupas; era amen inman an naiyu iran.

³³ Eris wat atahaijeg emda ara, is asuptecnaig intas ehele ra aien an tas ecsipece is ahinag is lep idivaig ji eigki;

³⁴ is tas ehele ra aien irai tas ecsipece ache: ja eris wat echim amen ara, is asuptecnaig niji itai asega ehele ilpu atimi atahaijeg yin aien.

³⁵ AN nadiat iyehki, is wat jupura, is ika ehele ra aien, Ti apan akaija an nahaijin eahki.

³⁶ Eris wat nimiterimterim atimi is ahinag ara, eris auroauro ara um leh yin an nelcau. Is ahced yin intak alvelcau.

³⁷ Is um ucjum pam nehio alupas, um auaijai nelcau va epeau, um ahga nelcau.

³⁸ Is umjeg aien an nilpun nelcau itac, um ilaig an nitai ilaig; eris ahugni yin ara, um ika ehelen, Ak Natimi esege, na eti aktaktai cama aiek: intumu emesmas akaija.

³⁹ Is um atidai aien, um acaiji nimtinjop, um ika ehele injop, Eigpa aiek, um esjaig. Is um esjaig nimtinjop, um esjilid neigpa.

⁴⁰ Is ika ehele ra aien, Eka imtitaig aijaua vanhe? eka auri aijaua par eti imyiisjis ninivaijec?

⁴¹ Eris imtitaig alupas ara, um ika sjipe ehele ra, Et echamecha natimi ineigki, et imyiaiji intas o un nimtinjop im injop?