Markus 3 - Intas Etipup

Nuarin-tas alupas 3.

¹ IS lep apan aien anliin neom alaigaheni; is amen eahki natimi is ethi is urauo nikman.

² Eris imyiiris yin ara, kit inyi ago cehcehe yin aien an nadiat atumop, mika erupu atijai itai iran ara.

³ Is ika aien ehele natimi urauo nikman, Aihio aiek igcaki.

⁴ Is ika ehele ra aien, Et upene nagovaig nedo upene an nadiat atumop, ka nagovaig nedo has? nimyiatamaig atimi vaig, ka nauahas ra vaig? Ja eris eti tas ara.

⁵ Is edemda vai ra aien, um aijidjid ra um arahed, is taigtaig aien va nipjin u inliinmopura, um ika ehele natimi iyehki, Namu atgeig yapidi nikmam aiek. Is um atgeig yapidi nikman aien: is um upene nikman um idivaig nahaijin nikman.

⁶ Eris um alau ijo a ilpu Farisi, um auroauro um tas ehele ilpu atimi leh imi Herot vai yin, mika eri atgei yin.

⁷ JA is um atga o un a Iesu im lep ilpu atimi atahaijeg yin, umapan u injop: eris ahes Calili atimi is ahinag, um apitac yin, im lep nupu Jutaia,

⁸ im nupu Jerusalem, im nup Itumia, im nup an nahaijin Jortan itac; im lep nupu Tairus im nupu Saiton is ahinag, eris wat atahaijeg ara va nitai iji eigki is ago aien, eris asjapicnaig pan ehelen ara.

⁹ Is um ika aien ehele ilpu atimi atahaijeg yin, eri imyiaitgai yin nalvelcau yi ethi va eri jim atamerit ehelen natimi is ahinag.

¹⁰ Is um ago cehcehe atimi is ahinag aien; va nedo ineigki eris asjapicnaig pan ehelen ara asega eris emehe ara, mika eri atcei pan yin ara.

¹¹ Eris wat ecet yin a ilpu agelo has, eris eropropsean nuhup o un ara, um ahlaig ijinies, um ika, Nai Hal o Atua aiek.

¹² Is um acaiji emda ra aien mika eri jim aniv yin ara.

¹³ Is aridjai aien an nedoon, um ahlaig va atimi iji elg, is merit vai ra aien; eris apan ehelen ara.

¹⁴ Is ehta atimi is twelv ira ra aien, mika eri amen ehelen ara, va etpu abrai ra aien mika eri apan ara, um asuptecnaig intas;

¹⁵ is alupai ra nemda aien mika eri iknipagki nemehe ira atimi ara, um ahlo ilpu agelo has:

¹⁶ is anvi nidai Saimona aien par ika Pitrus;

¹⁷ im Jakobus inhal o Sebetaius, im Joanes etoai Jakobus; is anvi nidarau aien par ika Boanerjes, nesgan tas ineigki, Ohwat hal o inmunuka:

¹⁸ im Antrius, im Filipus, im Bardolomius, im Madius, im Tomas, im Jakobus inhal o Alfius, im Datius, im Saimona natimi leh imi ilpu Selotai,

¹⁹ im Jutas nupu Karyot, aien aigki is aniv yin aien. Eris apan ara anliin neom.

²⁰ Eris lep asjapicnaig atimi is ahinag, is ehka inhagvaig vai ra.

²¹ Eris wat atahaijeg intas vai yin a ilpu atimi ehpan iran, eris apan ara mika eri leh yin; eris ika ara, Et mun ahnag aien.

²² Eris um ahes Jerusalem a ilpu atimi esege, um apan, um ika, Et amen iran a Belsebub, et ahlo ilpu agelo has aien vai natimarid o ilpu agelo has.

²³ Is asjapicnai ra aien, um ecsipece ehele ra, um ika, Et emda a Satana par ahlo Satana um uauo?

²⁴ El et ero inliinmopoi nup uran tah nelcau, inyi ti amen nelcau iyehki.

²⁵ El et ero inliinmopoi nup uran tah nimnim, inyi ti amen nimnim iyehki.

²⁶ El et auahas nelcau o un a Satana, um ero inliinmopon, inyi ti amen aien, ja etpu ti aien.

²⁷ Et elika vaig tah natimi napanvaig anliin neom o natimi emda, um tup leh inpadiag o un ehelen; ja el et upyi hup aien um arore natimi emda, etpu tup upene inleucsevaig itai anliin neom o un.

²⁸ Et inivaijec ineig ek asaig ehelemia ainyak mika, Uhpu eti aru nedo has asega ira atimi, im lep intas has ura:

²⁹ ja aien et asan tas has aien va Nesgan Upene, uhpu idim aru nedo has o un, etpu erekinman iran aien irai iji mesese.

³⁰ Is um ucce intas o un va nedo ura, nikavaig, eris ika ara, Et amen iran a nagelo has.

³¹ Eris han a ilpu etoan im risin, um aiji ijo, um abraig tah, mika yi ahlaig vai yin.

³² Eris ateuc arahed iran atimi is ahinag, um ika ehelen, Era idim amen ijo a risum im ilpu etoam, um ahilek euc.

³³ Is tas ehele ra aien, um ika, Risik im ilpu etoak di?

³⁴ Is aijidjid ra sji ehki aien eris ateuc arahed iran ara, um ika, Alum risik aijaua im ilpu etoak!

³⁵ aien et imyiaiji intas o Atua aien, et etoak aien, um atahaig irak, um risik.