Markus 2 - Intas Etipup

Nuarin-tas alupas 2.

¹ IS wat ti pan itac nadiat is eti elpat, is lep apan aien Kaperneum; eris atahaijeg, nikavaig, is amen aien anliin neom.

² Eris auroauro atimi is ahinag um asjapicnaig, is um ti nuarin ateuc imi ra anliin neom, im lep an neucse neom: is asuptecnaig intas imi ra aien.

³ ¶ Eris lep apan ehelen ara, um apos natimi is ethi, is emehe aien va napalse, eris ahlesahles yin natimi is emanohwan.

⁴ Is ehka vai ra inyetpanvaig ehelen va atimi is ahinag, ja eris um alcapdicraig nuarin neom ijinies ara, is amen iran aien, um atise nitai ahled ineig, is asjeuc iran natimi emehe va napalse, an mun neom ineig, eris ago ara.

⁵ Is wat ecetai nimyiisjis ninivaijec ura a Iesu, is um ika aien ehele natimi emehe va napalse, Ak inhal unyak, eh mun iknipagki nedo has unyum.

⁶ Eris amen eahki nahaiji ilpu atimi esege, is ika inliinmopura ara,

⁷ Et auri natimi ineigki par asan tas has esjilid? et emda ache a Atua par iknipagki nedo has.

⁸ Is um tup ispan ato a Iesu mika eris aktaktai is ucce inliinmopura, is ika ehele ra aien, Eka auri aijaua par aktaktai nitai iji eigki anliinmopomia?

⁹ et tup upene nikavaig ehele natimi emehe va napalse, Eh mun iknipagki nedo has unyum; ka nikavaig, Atidai aiek, um leh nitai ahled unyum, um atga?

¹⁰ im lep ineig, mika aki ato aijaua, nikavaig, et emda a Inhal o natimi an nobohtan par iknipagki nedo has, (is ika aien ehele natimi emehe va napalse,)

¹¹ Ek ika ehelum ainyak, Atidai aiek, um leh nitai ahled unyum, um atga unyum, um apan an neom unyum.

¹² Is um auroauro aien um atidai, um leh nitai ahled o un, um atga o un an nuhup ura asega; eris um imyiali ara asega, um imyiahpas Atua, um ika, Intis idim eti almoi nedo ineigki akaija itu acen.

¹³ Is um lep ehcohos pok aien an nohmunjop; eris asjapicnaig pan ehelen natimi asega eris ahinag ara, is esege imi ra aien.

¹⁴ Is wat atga aien, um ecet Livai inhal o Alfius nateucvaig an neom asjapicnaig mune iran, um ika ehelen, Ahced nyak aiek. Is um atidai aien, um ahced yin.

¹⁵ Is wat ateuc a Iesu anliin neom o Livai, um hag, eris lep ateuc ehele Iesu im lep ilpu atimi atahaijeg yin, a ilpu atimi akwanaham im ilpu atimi auatatimi is ahinag; eris ahinag ara um ahced yin.

¹⁶ Eris wat alum yin a ilpu atimi esege im ilpu Farisi nehrihagvaig im ilpu atimi akwanaham im ilpu atimi auatatimi, eris ika ara ehele ilpu atimi atahaijeg yin, Et auri aien par ehrihag um umwig aien im ilpu atimi akwanaham im ilpu atimi auatatimi?

¹⁷ Is wat atahaijeg intas ura a Iesu, is ika ehele ra aien, Er eti ika ehele natimi atipagki nemehe yi aminjinai ra era cehcehe ara, ja ara ache era emehe ara: kis eti ham ainyak par ahlaig vai ilpu atimi upene, ja vai ilpu atimi auatatimi ache, mika eri adumoij anliinmopura ara.

¹⁸ Eris atwakam a ilpu atimi atahaijeg Joanes im ilpu Farisi: eris asjapicnaig pan ehelen ara, um ika, Era auri a ilpu atimi atahaijeg Joanes im ilpu Farisi par atwakam, ja era eti atwakam a ilpu atimi atahaijeg euc?

¹⁹ Is ika ehele ra a Iesu, Era atwakam a ilpu alaig o natimi leh ehgan, an namen u natimi leh ehgan ehele ra, ka oʼo? et ehka vai ra natwakamvaig an namen u natimi leh ehgan ehele ra:

²⁰ ja etpu yetpam nadiat iji ehki uhu wit atipagki natimi leh ehgan ira ra, erupu atwakam ara ira adiat iji ehki.

²¹ Et eti ijei pan inuarin napelumai mat tah natimi an mohtan napelumai: va yi jim ruhra inmohtan napelumai va nuarin napelumai mat, um ahpati alupas.

²² Et eti atladwi waina mat tah natimi irai hubej itu acen; va yi jim atpoijej inhubej vai waina mat, um elel waina, um takitai inhubej: ja er idim atladwi waina mat irai hubej mat.

²³ AN nadiat atumop is ethi is atga aien irai lelahapol hwiit; eris wat atga ara, eris aldei nohoai hwiit a ilpu atimi atahaijeg yin.

²⁴ Eris um ika ehelen a ilpu Farisi, Era auri ara par ago nedo ineigki an nadiat atumop et itaup?

²⁵ Is um ika ehele ra aien, Akis idim esvi intas va nedo o Tevit aijaua, an tivaig nitai caig incan um ehtele yin, aien im lep ra eris ahced yin ara:

²⁶ is apan aien anliin neom o Atua, an naopan iyehki is atimi esjilid an nahlap a Abaiadar, um caig nareto ineig eris ahlap iran, eris caig a ilpu atimi ahlap ache, is itaup vai tup atimi, um lep alaa ra eris ahced yin ara.

²⁷ Is ika ehele ra aien, Eris ati nadiat atumop va atimi, jam eti aga atimi va nadiat atumop:

²⁸ et idim Atimarid an nadiat atumop a Inhal o natimi.