Markus 15 - Intas Etipup

Nuarin-tas alupas 15.

¹ IS wat lahlah an tak apnyin, eris tas jipe a ilpu atimi ahlap esjilid, im ilpu atimi tas alep, im ilpu atimi esege, im lep ilpu atimi asega u nasjapicnaig, um arore Iesu, um imyiapan yin, um ati yin ehele Pailet.

² Is ahodai yin a Pailet, um ika, Na Atimarid u nupu Jutaia aiek, ka oʼo? Is tas aien, um ika ehelen, Na mun asaig aiek.

³ Eris atijai niji itai is ahinag iran a ilpu atimi ahlap esjilid; ja is eti tas aien.

⁴ Is lep ahodai yin a Pailet, um ika, Na auri aiek par eti tas? et ahinag intas iji eigki era asuptecnaig vai euc ara.

⁵ Ja is eti tas a Iesu; is um imyiali a Pailet.

⁶ Nedo o un ineigki irai iji asjapicnaig va napaska, is ahiyi natimi is ethi aien eris arore yin, aien aigki eris merit vai yin ara.

⁷ Is eteuc natimi is ethi, nidan Barabas, eris arore yin, im lep atimi eris ahced yin ara an nehtauo, eris atgei natmas ara an nehtauo iyehki.

⁸ Eris ahlaig ijinies natimi is ahinag, um ugni yin mika yi ago vai ra et idivaig nupyi edo o un.

⁹ Ja is tas ehele ra a Pailet, um ika, Eka merit aijaua mika ki ahiyi Natimarid u nupu Jutaia imi caua ainyak, ka oʼo?

¹⁰ Is ato aien, nikavaig, eris ati yin an nuhup o un a ilpu atimi ahlap esjilid va nauatitai ura rai yin.

¹¹ Eris ehtei tas imi atimi is ahinag a ilpu atimi ahlap esjilid, mika eri ugni yin yi ahiyi Barabas imi ra.

¹² Is lep tas a Pailet, um ika ehele ra, Eka merit aijaua mika ki ago inhe ainyak vai yin eka anvi nidan aijaua par ika Natimarid u nupu Jutaia?

¹³ Eris lep ahlaig ijinies ara, um ika, Atgei yin aiek an nauincai atgeig.

¹⁴ Is um ika ehele ra a Pailet, Auri? is ago nev edo has aien? Eris um lep ahlaig ijinies acen ara, um ika, Atgei yin aiek an nauincai atgeig.

¹⁵ ¶ Is merit a Pailet neropsevaig inliinmopoi atimi, um ahiyi Barabas imi ra, um aredei Iesu, um atceijai yin ehele ra, mika eri atgei yin an nauincai atgeig.

¹⁶ ERIS imyiapan yin a ilpu eucsupo an nimnim o Natimarid, nidan Pritoryum; eris lep asjapicnaig pan ilpu eucsupo asega ara;

¹⁷ um aso yin ara an napelumai cop, um ahod incat irai itai upunupun, um adgaig imi yin;

¹⁸ eris aiheuc vai yin ara, ika, Kaiheuc vai euc, ak Natimarid u nupu Jutaia!

¹⁹ Eris auud nidjinin ara an nauanieg, um agdei yin, um atpuse, um alaigaheni vai yin.

²⁰ Eris wat imyiafakahcil yin ara, eris atipagki napelumai cop iran ara, um lep aso yin an napelumai o un, um imyialau ijo yin mika eri atgei yin an nauincai atgeig.

²¹ Eris acaiji natimi is ethi ara, Saimona, nupu Sairini, is ahes an tah anuarin aien, um atga an nefalaig, is etmai Aleksanter im Rufus aien, mika yi ahelwei nauincai atgeig o un aien.

²² ERIS imyiapan yin ara an nuarin is ethi nidan Colcoda, nesgan tas ineigki, Nuarin o nipjinipek o atimi.

²³ Eris ati nitai auanipin a waina, um aluman: ja is eti umnyi aien.

²⁴ Eris wat atgei yin ara an nauincai atgeig, ja par ahai apelumai o un, um edaig jipe itai asjaaicnaig va apelumai, mika eri ato nitai iji eig eri leucse atimi asega.

²⁵ Is wat adiat metto, eris atgei yin ara an nauincai atgeig.

²⁶ Eris aged nitasvitai par asuptecnaig nitai ineig eris atgei yin vaig, um atijai ijinies, um ika, NATIMARID U NUPU JUTAIA.

²⁷ Eris lep atgei natimi ehneg itai is ero ehelen; is ethi an matan, im lep is ethi an moun.

²⁸ Is um ehneijid intas ineig eris upyi aged, um ika, “Eris esvi pan yin irai ilpu atimi auatatimi.”

²⁹ Ara eris atga an nefalaig ara, eris atuh yin ara, um auhohaig nidjinira, um ika, Auwi! aiek, na auahas neom ahlap aiek, um lep actaig an nadiat et eseij,

³⁰ namu imyiatamaig euc aiek, um asuol an nauincai atgeig.

³¹ Eris lep imyiafakahcil yin a ilpu atimi ahlap esjilid, im ilpu atimi esege, um ika sjipe ehele ra, Is imyiatamaig tak atimi aien; jam auatialidi par imyiatamaig yin;

³² etmu asuol an nauincai atgeig a Kristo Natimarid u nupu Isreel, mika ti ecet yin akaija, um asgeig iran. Erus lep asan tas has vai yin arau eris atgei rau an nauincai atgeig ehelen.

³³ Is wat adiatadiat, is um asuol inmehcim an pece asega um yetpan an jupki.

³⁴ Is wat jupki, is ahlaig ijinies a Iesu, um ika, “Eloi, Eloi, lema sabakdenai?” nesgan tas ineigki, “Ak Atua unyak, ak Atua unyak, na auri aiek par ude nyak?”

³⁵ Eris atahaijeg intas o un nahaiji ra eris aiji ubutpotet, um ika, Et ahlaig vai Elaija aien.

³⁶ Is um athut natimi is ethi, um leh nisa, um ahtaijuli a vinecar, um ahcai an nauanieg, um aluman, um ika, Eklim erop; intupu almoi akaija, kit etpu yetpam a Elaija par atise yin.

³⁷ Is um ahlaig ijinies a Iesu, um edekjai nesgan.

³⁸ Is ahpati natcai apelumai anliin neom ahlap, is ahes ijinies um asuol.

³⁹ ¶ Is wat ecetai nahlaig o un a natimi alupas u ilpu eucsupo, is aiji an nuhup o un aien, im nedekjai o nesgan, is ika aien, Et inivaijec ineig, nikavaig, et Hal o Atua a natimi ineigki.

⁴⁰ Eris lep aiji a ilpu takata itac acen, um almoi: ehtijis amen ehele ra a Mere nupu Mactala, im Mere risi Jakobus atiminivaijec im Joses, im Salomi;

⁴¹ is wat amen aien Calili, ehtijis lep apitac yin ahtaij, um aheca o un; im lep ilpu takata is ahinag is eche, eris ahced yin ara um yetpan Jerusalem.

⁴² IS wat jupura, va nitai ineig is adiat auaretha, nikavaig, nadiat asgeig pan nadiat atumop,

⁴³ is emda a Joseph nupu Arimadia, um apan ehele Pailet, um ugni nohui Iesu, is atimi tas alep upene aien, um aitgaig nelcau o Atua.

⁴⁴ Is imyiali a Pailet va nauroauro o unmas o un: is ahlaig va natimi alupas o ilpu eucsupo aien, um ahodai yin, um ika, Et mun mas aien itu, ka oʼo?

⁴⁵ Is wat asuptecnaig ehelen a natimi alupas o ilpu eucsupo, is alupai Josef nohun aien.

⁴⁶ Is auanimtan napelumai yilyil aien, um atise yin, um aso yin an napelumai iyehki, um ati yin an mun nij eris ahti, um atcelcaig inhat um atapanes an neucsen mun nij.

⁴⁷ Erus ecetai a Mere nupu Mactala, im Mere risi Joses, nuarin ineig eris ati yin iran.