Markus 13 - Intas Etipup

Nuarin-tas alupas 13.

¹ IS wat ahes anliin neom ahlap aien um alau ijo, is ika ehelen a natimi atahaijeg yin is ethi, Ak Natimi esege, almoi inhat alupas iji eigki im lep neom esjilid iji eigki!

² Is tas a Iesu, um ika ehelen, Nai idim almoi neom alupas iji eigki aiek; inyi ti amen inhat inyi ethi an taka hat, uhpu alcapdicraig asega.

³ Is wat ateucse aien an nedoon Olivet an nuhup o neom ahlap, eris echim ahodai yin a Pitrus, im Jakobus, im Joanes, im Antrius, um ika,

⁴ Asuptecnaig ehelema aiek, inyi yetpam nitai iji eigki an nahopan? im lep nev itai asjaaicnaig u nubutpotetvaig o itai iji eigki?

⁵ Is tas ehele ra a Iesu, um atupun, um ika, Aminjinai caua aijaua va yi jim imyiahnag caua tah natimi:

⁶ erupu ehcohos pam atimi inyi ahinag an nidak, um ika, Ek Kristo ainyak; erupu imyiahnag atimi inyi ahinag ara.

⁷ Aku wit atahaijeg edoa aijaua, im lep intas vai edoa, jam jim imtitaig: inyi upyi eteuc nitai iji ehki; ja inyi ti fi auroauro um ahni itai.

⁸ Erupu ati nedoa nup uran pece inyi ethi vai nup uran pece inyi eche, im lep nup uran nelcau inyi ethi vai nup uran nelcau inyi eche: etpu eteuc nomoi irai iji uari pece inyi ahinag, im lep numlaig has, im lep nehioehio u inliinmopoi atimi: et idim ahka um eres nitai iji eigki.

⁹ ¶ Akumu aminjinai caua aijaua: erupu ikni caua ara ehele ilpu atimi tas alep, im lep ehele ilpu atimi asjapicnaig; erupu aredei caua ara: uhpu imyiapan caua an nuhup u ilpu atimi alupas im ilpu atimarid vai nyak, nitai asuptecnaig imi ra.

¹⁰ Uhpu idim uhup um asuptecnaig intas-upene ehele nup urai iji pece asega.

¹¹ Eru wit imyiapan caua ara, um ikni caua ehele ilpu atimi tas alep, akumu jim upyi hup aijaua, um ika, Inti asanhe akaija? um jim aktaktai intas: jam asaig ineigki ache uhpu alupai caua an naopan iyehki: eka eti tup ispamia tas aijaua, ja Nesgan Upene ache.

¹² Etpu alwai etoan tah mika eri atgei yin, im lep tah irai inhal o un; erupu edemda a ilpu hal ura vai ilpu atmil ura, um ika, eri atgei ra.

¹³ Erupu amcel vai caua atimi asega va nidak: ja aien inyi ti adumoij aien, uhpu imyiatamaig yin.

¹⁴ ¶ Aku wit ecetai “nitai has esjilid ineig” aijaua, “et auahas itai,” is tas vaig a Tanyel naprofeta, naijivaig an nuarin ineig et itaup, (etmu aktaktai aien et esvi itai aien,) ara eri amen Jutaia ara an naopan iyehki, erumu aha pan irai lola edoon ara:

¹⁵ aien inyi amen aien ijinies an neom o un, etmu jim asuol aien, um apan anliin neom o un mika yi leucse itai anliin neom o un:

¹⁶ aien inyi amen aien uman, etmu jim adumoij pan aien mika yi leucse napelumai o un.

¹⁷ Kaiheuc vai ra eri opouc ara, im lep ra eri alidai ilpu hal ura ara, ira adiat iji ehki!

¹⁸ Akumu ugni Atua aijaua mika aki jim aha aijaua an mesese.

¹⁹ Ira adiat iji ehki etpu eteuc nohocred, inyi esjilid irai ohocred asega an naopan iyehki is wat ago niji itai asega a Atua um uhum pam an naopan ineig, inyi ti lep eteuc nohocred inyi idivaig.

²⁰ El et eti ika a Atua yi eti elpat nadiat iji ehki, el erupu emesmas atimi asega: ja et ika aien yi eti elpat nadiat iji ehki, va atimi iji eig is ehtai ra aien.

²¹ An naopan iyehki el et ika ehelemia tah natimi, Almoi aijaua, Iesu mun eigki; ka, Iesu mun naico; jim eteuc an tas o un aijaua:

²² erupu ehcohos pam a ilpu Kristo efaifa im ilpu profeta efaifa, um ago niji auritai ehka im niji itai imyiali, mika eri imyiahnag ilpu atimi ehtai ra, ja inyi ehka.

²³ Jam aminjinai caua aijaua: ek mun idim upyi hup ainyak um asuptecnaig niji itai asega ehelemia.

²⁴ ¶ Ira adiat iji ehki et wit ti pan itac nitai ohocred vaig ineig, etpu aupat nagesega, um eti alahala vai inmohoc;

²⁵ etpu etjo inmoijeuv an nohatag, um lep ahcatina niji emda an nohatag.

²⁶ Erupu ecet Inhal o natimi ara an naopan iyehki, inyi yetpam aien an nepeig an nohatag, etpu esjilid nemda o un im natimi alupas o un.

²⁷ Etpu abrai ilpu agelo o un aien, mika eri asjapicnaig ilpu atimi ehtai ra o un ara irai iji uari pece asega, ahes an nahaijin nobohtan, um yetpan an nahaijin nohatag.

²⁸ Akumu atahaijeg aijaua intas ecsipece va nateg: Et wat ehcodaig um elegelege nerin, eka ato aijaua, nikavaig, et mun ubutpotet u inlidija:

²⁹ et idim ucco, aku wit almoi nitai iji eigki aijaua, akumu ato aijaua, nikavaig, et mun ubutpotet nelcau o Atua, an neucse neom marom.

³⁰ Et inivaijec ineig ek asaig ehelemia ainyak mika, Inyi upyi hup um ahni nitai iji eigki asega, ja erupu emesmas natimi an naopan ineig.

³¹ Etpu yetpan an tid iran nohatag im nobohtan: ja inyi ti yetpan an tid iran intas unyak.

³² ¶ Ja et eti ato nadiat iyehki im nuarin-nadiat iyehki tah natimi: um eti ato tah ilpu agelo an nohatag, um eti ato Inhal o Atua, et ato ache a Etmak.

³³ Akumu aminjinai caua aijaua, um aiji, um alaigaheni: eka eti ato aijaua naopan yetpam u nitai iji ehki.

³⁴ Et idivaig natimi et ethi a Inhal o natimi, et apan aien itac acen, um ude neom o un, um ika ehele ilpu aheca o un eri ohuun, um asuptecnaig ehele atimi asega nauritai imi ra, um tas ehele natimi aminjinaig neom mika yi aminjinaig upene aien.

³⁵ Akumu aminjinai caua aijaua: eka eti ato aijaua naopan ineig inyi adumoij pam a natimi alupas an neom, an jupura, ka an nijihgan nepeig, ka an nahlaig u injaa, ka an nuhialeg:

³⁶ va yi jim auroauro aien um ham, um ecet caua numjegvaig.

³⁷ Intas ineig ek asaig ehelemia ainyak, ek lep asaig ainyak ehele atimi asega, Akumu aminjinai caua aijaua.