Markus 12 - Intas Etipup

Nuarin-tas alupas 12.

¹ IS ecsipece ehele ra aien, um ika, Is ahoaig vaine anliin nekaro o un a natimi is ethi, um ago nirahed o un, um ucji nehpanitai par ahtaijiraig nohoai vaine iran, um acta neom par asjeucjinaig, is um atceijaig aien imi ilpu atimi ahapol, um atga o un, um apan an pece itac acen:

² is wat metto nohoan, is abrai naheca o un is ethi aien mika yi apan aien ehele ilpu atimi ahapol, um leucse ohoai vaine anliin nekaro.

³ Eris arop iran ara, um aredei yin, um lep abraig pan yin, jam eti alupai yin tah nitai.

⁴ Is lep aketo aien um abraig pan naheca o un is ethi is eche ehele ra; eris um asji yin ara irai hat, um ati inmacop iran an nidjinin; is esjilid nedo has ura vai yin, eris lep abraig pan yin ara.

⁵ Is um lep aketo aien, um abraig pan is ethi is eche; eris um atgei yin ara, im lep hal ra is ahinag; eris abli nahaiji ra ara, um lep atgei nahaiji ra.

⁶ Is eteuc inhal o un is ethi ache, is halav cop iran aien, is apitac aien um abraig pan yin ehele ra, um ika, Erupu ago nedo eccen ara vai inhal unyak.

⁷ Ja eris tas jipe ehele ra a ilpu atimi ahapol, um ika, Natimi ineigki etpu isjipigmoig etman aien; ti idim atgei yin akaija, etpu uja uman.

⁸ Eris arop iran ara, um atgei yin anliin nekaro, um ethaig pan itac

⁹ Etpu ago inhe a natimi alupas ohuun nekaro? etpu han aien, um atgei ilpu atimi ahapol iji eigki, um atceijaig nekaro imi tak atimi.

¹⁰ Akis esvi aijaua intas ineig eris aged, ka oʼo, nikavaig, “Inhat ineig eris esjum vaig a ilpu atimi acta neom, et hat esjilid ineigki an nesvi va neom:

¹¹ is ago nitai ineigki a Ihova, et itai imyiali ineig an nuhup uja”?

¹² Eris ika ara eri arop iran vaig, jam imtita atimi: eris ato ara,! nikavaig, is asan tas ecsipece iyehki aien vai ra: eris ude yin ara, um atga ura.

¹³ ERIS abraig pan ehelen nahaiji ilpu Farisi ara, im nahaiji ilpu atimi leh imi Herot, mika eri imyiiris intas o un.

¹⁴ Eris apan ehelen ara, um ika, Ak Natimi esege, ecra ato aijama, nikavaig, na inivaijec aiek, um eti imtita atimi, um eti aktaktai natimi alupas o un tah, jam esege inivaijec nedo o Atua: Et itaup nahtaivaig mune imi Sisar, ka oʼo?

¹⁵ ecri ahtai imi yin aijama, ka oʼo? Ja is ato nefaifa ura aien, um ika ehele ra, Eka auri aijaua par oop nyak? imyiapam ehelek mune yi ethi aijaua, mika ki almoi ainyak.

¹⁶ Eris imyiapan ara. Is ika ehele ra aien, Nalmui di ineigki, im nidai di eris aged? Eris um ika ehelen ara, Sisar.

¹⁷ Is tas a Iesu, ura ika ehele ra, Alupai Sisar niji itai o Sisar; jam ahtai imi Atua niji itai o Atua. Eris imyiali yin ara.

¹⁸ ¶ Eris han ehelen a ilpu Satusi, atimi iji eigki era ika ara eri eti lep anusjai atimi emesmas; eris ahodai yin ara, um ika,

¹⁹ Ak Natimi esege, is aged a Moses, um ika eheleija, El et mas tah natimi eteuc etoan um ude ehgan, um eti eteuc inhal urau, el etmu leh ehgan a etoan, um asvalav vai etoan.

²⁰ Eris amen a ilpu raimu is seven: um leh ehgan inmetto, um mas, is eti eteuc inhal urau:

²¹ is um leh yin a etoan is ethi, um mas, is eti eteuc inhal urau: is um lep leh yin a etoan is ethi:

²² eris um leh yin a ilpu raimu is seven, is eti eteuc inhal ura: is par apitac intakata, um mas:

²³ an nadiat anusjai eru wit anusjai ara, etpu ehgan tah ra sji eigki a di aien? eris um leh yin ehgara a ilpu raimu is seven.

²⁴ Is tas a Iesu, um ika ehele ra, Eka idim ahnag aijaua, um eti ato intas eris aged, im lep nemda o Atua:

²⁵ eru wit anusjai atimi vai inmas ura, eri eti lep atmehgan ara, um eti lep asanlai; ja era idivaig ilpu agelo an nohatag ara.

²⁶ Im lep ineig, erupu anusjai a ilpu atimi emesmas; akis esvi aijaua an nitasvitai o Moses, ka oʼo, mika is tas ehelen a Atua an cai, um ika, “Ek Atua o Ebraham ainyak, um Atua o Aisak, um Atua o Jekob”?

²⁷ Et eti Atua o ilpu atimi emesmas aien, ja et Atua o ilpu atimi umumoh ache aien: et esjilid nahnag unyimia aijaua.

²⁸ ¶ Is han ehelen natimi esege is ethi, um atahaijeg nimyiisjis itai ura, um ahgei nasuptecnaig upene o un; is ika ehelen aien, Et esjilid neveh tas alep?

²⁹ Is um ika ehelen a Iesu, Et esjilid neigki irai tas alep asega, “Ak nupu Israel, akumu atahaijeg aijaua; Et Atimarid ethi ache a Ihova Atua uja:

³⁰ etmu aiyu inliinmopom aiek vai Ihova Atua unyum anliinmopom asega, im lep an nesgam asega, im lep an naktaktai asega unyum, im lep an nemda asega unyum:” et esjilid intas alep ineigki.

³¹ Im lep napahvaig ineig, nikavaig, “Etmu aiyu inliinmopom aiek va atimi eblaamnem unyum et idivaig naiyu u inliinmopoin vai euc.” Et eti eteuc tah intas alep et esjilid iran raigki.

³² Is ika ehelen a natimi esege iyehki, Et idim ucco, ak Natimi esege, et inivaijec intas unyum: et ethi ache a Atua; um eti lep eteuc tah:

³³ et wat aiyu inliinmopon tah vai yin anliinmopon asega, im lep an naktaktai asega o un, im lep an nesgan asega, im lep an nemda asega o un, um aiyu inliinmopon aien va atimi eblaamnem o un, et idivaig naiyu u inliinmopon vai yin, et esjilid nedo ineigki irai iji itai ahlap er atnamud im niji itai ahlap asega.

³⁴ Is wat alum yin a Iesu nasuptecnaig upene vaig, is ika ehelen aien, Na eti itac acen aiek va nelcau o Atua. Eris imtitaig natimi inlep ahodai yin vaig vaig tah nitai.

³⁵ ¶ Is wat esege an neom ahlap a Iesu, um tas aien, um ika, Era auri a ilpu atimi esege par ika, Et mapoi Tevit a Kristo?

³⁶ Is idim tas a Tevit irai Nesgan Upene, um ika, “Is ika a Ihova ehele Natimarid unyak, Namu ateuc aiek an matak, um uhum pan naopan iyehki, ekpu ikni ilpu atimi tak atimi iram ainyak, mika eri itai atijai neduom iran.”

³⁷ Is anvi nidan a Tevit par ika Natimarid; et echamecha et pah mapon aien? Eris atahaijeg intas o un natimi is ahinag acen, um imyiacitak.

³⁸ ¶ Is ika ehele ra aien an nesege o un, Akumu aminjinai caua aijaua vai ilpu atimi esege, era merit ara naso ra vaig irai apelumai opra um imyiedo, era lep merit ara mika eri aiheuc vai ra atimi irai uarin asjapicnaig atimi iran;

³⁹ era lep merit ara va niji itai ateuc esjilid irai eom alaigaheni, im niji uarin esjilid u inhag o atimi:

⁴⁰ era atoraliak inpadiaig o ilpu takata eris emesmas a ilpu atamnyura ara, um alaigaheni opra par adahpoi nedo ura: etpu esjilid nohocred ura.

⁴¹ ¶ Is ateuc a Iesu ubutpotet u nuarin ikni mune iran, um almoi nedo o ilpu atimi eris ikni mune an nuarin ikni mune iran: eris ikni mune is ahinag a ilpu atimi ikni itai is ahinag.

⁴² Is lep han a intakata ihki natimi is ethi, is mas natamnyu un, is ati nuari-mune haklin acen is ero aien, is apapa pan irai fardig is ethi.

⁴³ Is asjapicnaig ehelen ilpu atimi atahaijeg yin aien, um ika ehele ra, Et inivaijec ineig ek asaig ehelemia ainyak mika, Et esjilid nati mune o untakata ihki natimi ineigki is mas natamnyu un, ira ra asega era han ikni mune ara an nuarin ikni mune iran:

⁴⁴ era ikni nahaiji padiaig minni ura ara asega; ja et ihki natimi aien, jam ikni itai asega o un, nitai imyiatamaig nohun asega.