Markus 10 - Intas Etipup

Nuarin-tas alupas 10.

¹ IS atidai aien um ahes eahki, um apan irai uari pece Jutaia an nahaijin Jortan itac: eris lep aketo um asjapicnaig pan ehelen natimi is ahinag; is lep esege imi ra aien, is idivaig nupyi esege o un.

² ¶ Eris ahtag pan ehelen a ilpu. Farisi, um ahodai yin, um ika, Et itaup vaig tah natimi nabrai ehgan vaig, ka oʼo? eris oop yin ara.

³ Is tas aien, um ika ehele ra, Is asanhe ehelemia a Moses?

⁴ Eris ika ara, Is asaig a Moses mika ecri aged nitasvitai, intas va natipagki yin, um abrai yin.

⁵ Is tas a Iesu, um ika ehele ra, Is aged intas ineigki imi caua aien va nipjin u inliinmopomia.

⁶ Ja is ago natamaig is ethi a Atua im intakata is ethi, an naopan iyehki is wat ago niji itai asega aien.

⁷ “Va nitai ineigki etpu ude etman im risin natamaig, um amen aien im ehgan;

⁸ etpu ethi ache nohurau arau:” erau eti lep ero arau, ja et tup ethi ache nohurau arau.

⁹ Et itaup inlep atiakoaivaig nitai ineigki is adgai iran a Atua.

¹⁰ Eris lep ahodai yin a ilpu atimi atahaijeg yin anliin neom va nitai ineigki.

¹¹ Is um ika ehele ra aien, Aien et abrai ehgan, um leh intaka takata, et ago ingaijid vai yin aien:

¹² im lep ineig, el et ude na tamnyu un tah intakata, um ehgai intak atamaig, et ago ingaijid aien.

¹³ ERIS imyiapan ehelen ilpu halav, mika yi atcei pan ra aien; eris acaiji ra sji eigki eris imyiapan ra a ilpu atimi atahaijeg yin.

¹⁴ Is wat almoi a Iesu, is taigtaig aien, um ika ehele ra, Ude ilpu halav aijaua, eri apam ehelek ara, um jim acaija ra; era idivai ra ara era amen an nelcau o Atua ara.

¹⁵ Et inivaijec ineig ek asaig ehelemia ainyak mika, Aien et eti leh nelcau o Atua aien et idivaig inhalav, inyi ti apan iran aien.

¹⁶ Is ablim pain ra aien, um atijai nikman ira ra, um asan tas upene vai ra.

¹⁷ IS wat atga aien an nefalaig, is athut pan ehelen natimi is ethi, um atpuse an nuhup o un, um ahodai yin, um ika, Ak natimi esege upene, inki ago inhe ainyak va ekpu leh nitai umoh iran ineig inyi ti lep ti?

¹⁸ Is um ika ehelen a Iesu, Na auri aiek par aniv upene nyak? et eti upene tah, Atua ache:

¹⁹ na ato niji tas alep aiek, eris ika, Jim ago ingaijid, Jim atgei natmas, Jim ehneg itai, Jim asan tas ahcil, Jim ago nedo acalacal, Namu eccen vai etmam im risum aiek.

²⁰ Is tas aien um ika ehelen, Ak Natimi esege, kis imyiaiji nitai iji eigki asega ainyak an halav unyak um uhum pain naopan ineig.

²¹ Is wat alum yin a Iesu, is aiyu inliinmopon aien vai yin, um ika ehelen, Nai eti ago nitai et ethi aiek: apan aiek, um ahtai niji itai asega unyum, um alupai ilpu ihki atimi, napu idim leh niji itai upene an nohatag aiek: um lep apam, um apos nauincai atgeig unyum, um apitac nyak.

²² Is imlai nesganimtan aien vai intas iyehki, um taigtaig, um atga o un: is ahinag inpadiaig o un aien.

²³ ¶ Is aijidjid ilpu atimi atahaijeg yin a Iesu, um arahed, um ika ehele ra, Et ehka va atimi iji eig era ikni itai ara napanvaig an nelcau o Atua.

²⁴ Eris imyiali intas o un a ilpu atimi atahaijeg yin. Ja is lep tas a Iesu, um ika ehele ra, Ak ilpu hal unyak, et ehka va atimi iji eig era asgeig irai padiaig ura ara napanvaig an nelcau o Atua:

²⁵ et tup upene vai kamela namiliakvaig an hed an nitel, jam ehka va natimi ikni itai napanvaig an nelcau o Atua.

²⁶ Eris imyiali alupas ara, um ika jipe ehele ra, Uhpu imyiatamaig di?

²⁷ Is aijidjid ra a Iesu, um ika, Et ehka nitai ineigki va atimi, jam eti ehka vai Atua: et tup upene niji itai asega vai Atua.

²⁸ ¶ Is um ika ehelen a Pitrus, Ecris ude niji itai asega aijama, um ahced euc.

²⁹ Is tas a Iesu, um ika, Et inivaijec ineig ek asaig ehelemia ainyak mika, Natimi ineig is ude neom o un aien, ka ilpu etoan, ka ilpu atahaig iran, ka etman, ka risin, ka ehgan, ka ilpu hal o un, ka uman, vai nyak, im lep vai intas-upene,

³⁰ etpu idim leh neruvaig aien inyi wun huntret an naopan ineig, niji eom, im ilpu etoan, im ilpu atahaig iran, im ilpu risin, im ilpu hal o un, im uman, im lep edemda rai yin; im lep nitai umoh iran ineig inyi ti lep ti, an naopan iyek.

³¹ Erupu apitac natimi inyi ahinag, eris uhup ara; ja erupu uhup ara, eris apitac ara.

³² ERIS wat apan ara alaig Jerusalem, is uhup ira ra a Iesu: eris imyiali ara; eris imtitaig ara um apitac yin. Is lep leh natimi is twelv aien, um asuptecnaig ehele ra nitai iji eigki etpu yetpan iran,

³³ um ika, Intupu idim apan Jerusalem akaija; uhpu ati Inhal o natimi ehele ilpu atimi ahlap esjilid, im ilpu atimi esege; erupu asaig inmas o un ara, um ati yin ehele nup urai taka pece:

³⁴ erupu imyiafakahcil yin ara, um aredei yin, um agdei yin, um atgei yin; ja et wit ti pan itac nadiat inyi eseij, etpu lep nusjai aien.

³⁵ ERUS apan ehelen a Jakobus im Joanes, ohwat hal o Sebetaius, um ika, Ak Natimi esege, ecrau merit aijumrau, mika an ago aiek imi cumrau nitai ineig, ecrau merit vaig aijumrau.

³⁶ Is ika ehele rau aien, Erau merit aijaurau vanhe mika ki ago ainyak imi caurau?

³⁷ Erus ika ehelen arau, Asaig ehelemrau aiek mika ecru ateuc aijumrau, tah cumrau an matam, im tah an moum, an natimi alupas unyum.

³⁸ Is ika ehele rau a Iesu, Erau eti ato aijaurau nitai ineig erau ugni nyak vaig aijaurau: aru emda aijaurau par umwig an nipjinitai ineig ekpu umwig iran ainyak; um leh nabaptiso iramirau yi idivaig nabaptiso ineig ekpu leh irak ainyak, ka oʼo?

³⁹ Erus ika ehelen arau, Ecru emda aijumrau. Is ika ehele rau a Iesu, Arupu umwig aijaurau an nipjinitai ineig ekpu umwig iran ainyak; um leh nabaptiso iramirau yi idivaig nabaptiso ineig ekpu, leh irak ainyak:

⁴⁰ ja et ehka vai nyak nikavaig ehelen tah yi ateuc an matak, im lep an mouk, ja ehele ra ache eris ati imi ra.

⁴¹ Eris wat ato natimi is ten, eris edemda alupas ara vai Jakobus im Joanes.

⁴² Ja is asjapicnai ra ehelen a Iesu, um ika ehele ra, Eka ato aijaua, nikavaig, ara er ika era ilpu i atimarid irai iji pece, era esjilid irai iji pece ura ara; era lep esjilid irai, uari pece ur a ilpu atimi alupas ura:

⁴³ jam jim ago nedo ineigki aijaua: aien et merit aien mika yi esjilid iramia, etmu upoupo iramia aien:

⁴⁴ aien et merit aien mika yi atimi alupas iramia, etmu aheca unyimia asega aien.

⁴⁵ Is eti ham a Inhal o natimi mika eri aheca o un natimi, ja par aheca ura, um ahtai nitai umoh iran o un nimtan va atimi et ahinag.

⁴⁶ ERIS yetpan Jeriko ara: is wat ahes Jeriko aien, eris ahced yin a ilpu atimi atahaijeg yin, im lep atimi is ahinag; is ateuc an nahaijin nefalaig a Bartimius inhal o Timius, is aupat nesganimtan aien, um ughi itai.

⁴⁷ Is wat atahaijeg aien, nikavaig, Iesu nup an Nasared mun iyehki, is atupun aien um ahlaig ijinies, um ika, Aiheuc vai nyak, ak Iesu, Mapoi Tevit.

⁴⁸ Eris acaiji yin natimi is ahinag mika yi jim tas: ja is aketo aien um ahlaig ijinies, um ika, Aiheuc vai nyak, ak Mapoi Tevit.

⁴⁹ Is aiji a Iesu, um ika eri ahlaig vai yin. Eris ahlaig va natimi aupat nesganimtan ara, um ika ehelen, Namu imyiacitak aiek, um atidai; et ahlaig vai euc aien.

⁵⁰ Is apijadi napelumai iran aien, um atidai, um apan ehele Iesu.

⁵¹ Is tas a Iesu, um ika ehelen, Nai merit vanhe aiek mika ki ago imi euc ainyak? Is ika ehelen a natimi aupat nesganimtan, Ak Natimi esege, ek merit ainyak mika yi lah nesganimtak.

⁵² Is ika ehelen a Iesu, Atga unyum aiek; na mun cehcehe aiek va nimyiisjis ninivaijec unyum. Is um auroauro um lah nesganimtan aien, is apitac Iesu aien an nefalaig.