Malakai 4 - Intas Etipup

NUARIN TAS ALUPAS 4.

1 Neruvaig u Atua irai ilpu atimi auatatimi. 2 Intas acis yi alwai o un vai ilpu atimi upene. 4 Et ated va aien mika eri ato intas alep o un. 5 Intas va napam, u Joanes Natimi baptiso im nauritai o un.

¹ ET ika a Ihova esjilid acen; Etpu idim yetpam nopan iyehki, etpu ere et idivaig nehpan uum; erupu idivaig inceen korn a ilpu atimi asega et ijinies inliinmopora, im lep ra asega era ago nedo has ara: uhpu atnamud ra an nopan iyehki etpu yetpam, inyi eti eled vai ra tah neucvara ka tah inrara.

² Ja etpu aridjai Nagesega inig et ahes nedo atoh iran vai caua eka imtitaig nidak aijaua, etpu eteuc nitai cehcehe ithai ehpan; akupu apan itac aijaua, um eliaujai, et idivaig hakli kurimatau er alaa ra upene.

³ Et ika a Ihova esjilid acen; Akupu auwihise ilpu atimi auatatimi aijaua; erupu idivaig nohpa ara ithai nugnya neduomia au nopan iyehki ek mun ati ainyak.

⁴ Akumu imiehva aijaua intas alep u Moses naheca unyak, kis asaig ehelen ainyak an nedoon Horeb vai nup Isreel asega, im lep intas alep im intas par asjaaicnaig.

⁵ Ekpu idim abraig pam ehelemia Elaija naprofeta ainyak, ja etpu ham nopan iyehki u Ihova et alupas et lep imtitaig vaig:

⁶ etpu hedaig inliinmopoi ilpu atmil ura aien pan irai ilpu hal ura, im inliinmopoi ilpu hal ura pan irai ilpu atmil ura, vai ki jim ham ainyak um auud inpece unyimia an tas ahlaijaig.