Malakai 3 - Intas Etipup

NUARIN TAS ALUPAS 3.

1 Intas vai Joanes Natimi baptiso, im lep vai Kristo. 7 Nedo imipalea u nup u. Juta, 8 era auahas niji itai itap ara, 13 um imiisjis nahcil. 16 Eri leh niji itai upene a ilpu atimi ecen vai Atua.

¹ EKPU idim abrai natimi leh intas unyak ainyak, etpu ahped nefalaig an nuhup unyak aien: etpu auroauro a Natimarid inig, eka, ahilek yin aijaua, um ham anliin neom ahlap o un, Nagelo marom u intas etipup, aien aigki eka merit vai yin aijaua: et ika a Ihova esjilid acen, Etpu idim ham aien.

² Ja etpu emda a di par aitgaig nopan napam o un? etpu emda a di par atidaijai etu wit ehcohos pam aien? vaig inig nikavaig, et idivaig incap u natimi atho silver aien, um idivaig sop u natimi ahpoi apelumai;

³ etpu ateuc aien et idivaig natimi inig et atho silver aien, um ahre nohok iran: etpu ago upene ilpu mapoi Livai aien, um ahre nohok ira ra et idivaig nago irai colt im silver; erupu ahlap an nitai ahlap vai Ihova an nedo atoh ara.

⁴ Ja an nopan iyehki etpu upene irai Ihova nitai ahlap u nup u Juta im nup u Jerusalem, et idivaig au nopan iyehki itu acen, et lep idivaig irai mesese uhup.

⁵ Et ika a Ihova esjilid acen; Ekpu apam ubutpotet ehelemia ainyak par aru iramia; ekpu auroauro ainyak um asuptecnaig vai nedo o ilpu atimi araces, im ilpu atimi ago ingeijid, im ilpu atimi asig yi aktit intas jam ahcil, im lep vai ilpu atimi iji ig era ehtipidai ilpu aheca ura ara va nimtan, im ilpu takata iji ig eris emesmas a ilpu atamnyu ura, im ilpu umnij, im lep vai ra era eti ago nedo atoh vai nup urai taka pece, um eti imtitaig nyak.

⁶ Ek idim Ihova ainyak, ek eti lep eche ainyak; va nitai inigki er eti auahas caua, ak ilpu mapoi Jekob.

⁷ Akis imipalea intas alep unyak aijaua, um eti imiaiji, ahes an nopan umumoh u ilpu retpomia, um imihum pam an nopan…mig. Et ika a Ihova esjilid acen; Adumoij pam ehelek aijaua, ja ekpu adumoij pam ehelemia ainyak. Ja eka ika aijaua, Ecrupu adumoij pam aijama anhe?

⁸ Et idim eti upene vaig tah natimi par ehneg itai ehele Atua; ja eka mun ehneg itai unyak aijaua. Ja eka ika aijaua, Nev itai unyum ecra mun ahneg aijama? Niji itai ahtai im niji itai ahlap marom.

⁹ Eka mun eheshas ehni aijaua: vaig inig nikavaig, eka mun ahneg niji itai unyak aijaua, nup uran pece inigki asega.

¹⁰ Akumu imiapam niji ahaijin tend asega aijaua anliin neom ikni itai unyak, mika yi amen nitai hegaig anliin neom itap unyak; et ika a Ihova esjilid acen, Akumu ato nyak aijaua an nitai inigki, nikavaig, el ek eti asalgei niji tapnes an nohatag ainyak vai caua, ka oʼo; um atladwi niji itai upene vai caua inyi alupas acen, etpu ehka vai caua inleh vaig.

¹¹ Et ika a Ihova esjilid acen; Ekpu acaiji nitai iji ig ainyak et hegai itai vai caua, uhpu eti auahas nohwai itai umamia; etpu aho upene vaine irai ahapol unyimia.

¹² Et ika a Ihova esjilid acen; Erupu ika a nup urai iji pece asega, Eka mun ahesmoij aijaua, etpu upene asega inpece unyimia.

¹³ Et ika a Ihova, Eka mun imiisjis aijaua um tas vai nyak; ja eka mun ika aijaua, Ecra mun asaig inhe vai euc aijama?

¹⁴ Eka mun ika aijaua, Et takitai par auanaheca u Atua: inta i mun leh inhe akaija inta wat imiaiji intas asaig o un akaija, um lep i ijis jipe irai apelumai uucai au nuhup u Ihova esjilid acen?

¹⁵ Im lep inig, inta ika akaija era mun ahesmoij a ilpu atimi ijinies inliinmopora; er imiaridjai ra sji igki era ago nedo has ara; er idim imiatamai ra sji igki era oop Atua ara.

¹⁶ An nopan iyehki eris tas jipe ara sji igki eris imtitaig Ihova ara: is atgeig pam intikgan a Ihova, um atahaijeg ra, eris lep aged nitaasviitai is ethi an nuhup o un par imiehva itai vaig, vai ra sji igki eris imtitaig Ihova ara, um aktaktai nidan.

¹⁷ Et ika a Ihova esjilid acen; Erupu idivaig inpadiaig esjilid unyak ara, an nopan iyehki ek mun ati ainyak; ekpu aiheuc vai ra ainyak, et idivaig tah natimi et aiheuc vai inhal o un et ago nedo upene vai yin aien.

¹⁸ An nopan iyehki akupu aketo aijaua um ato mika, era eche a ilpu atimi upene, jam lep eche a ilpu atimi auatatimi; era lep eche a ilpu atimi iji ig era auaraheca u Atua ara, jam lep eche a ilpu atimi iji ig era eti auaraheca o un ara.