Malakai 1 - Intas Etipup

NUARIN TAS ALUPAS 1.

1 Et asan tas ehti vai nup Isreel a Malakai va nedo ura, nikavaig, era eti imiehva nedo aiheuc u Atua vai ra ara, 6 era auahas nalaigaheni ara, 12 um ago nedo maumau.

¹ INTAS is asaig a Ihova ehele nup Isreel irai Malakai nigki.

² Et ika a Ihova, Ek mun aiheuc vai caua ainyak; ja eka ika aijaua, Nai mun aiheuc vai cama aiek an he? Et ika a Ihova, Is idim etwai Jekob a Isa, ja kis aiheuc vai ilpu mapoi Jekob ainyak,

³ kis lep esjum vai ilpu mapoi Isa ainyak, um ika yi eucaeucai niji edoon ura, um lep ika yi umaruma inpece ura um idivaig namasacen.

⁴ Vaig inig nikavaig, era ika a nup Itom, Eris mun auahas caija, ja intupu lep actaig niji eom akaija eris alcapdicraig; et idim ika a Ihova esjilid acen, Erupu actaig iyum ura ara, ja ekpu alcapdicraig iyum ura ainyak; erupu anvi nidara natimi par ika, Inpece u ilpu atimi auatatimi, im lep, Nup uran pece inig et edemda vai ra a Ihova irai iji mesese.

⁵ Akupu almoi nitai iji igki an nesganimtamia aijaua, ja akupu ika aijaua, Uhmu imiahpas Ihova an pece Isreel.

⁶ Et ecen vai etman a inhal o un, et lep ecen vai natimi alupas o un a naheca o un: ek idim etmai ilpu atimi unyak ainyak, ja era eti ecen vai nyak ara; ek idim atimi alupas u ilpu aheca unyak ainyak, ja era eti imtitai nyak ara; et uce intas o Ihova ehelemia, ak ilpu atimi ahlap iji igki, eka amcel vai nidak aijaua. Ja eka ika aijaua, Ecra mun amcel vai nidam an he aijama?

⁷ Va nedo unyimia, nikavaig, eka mun ahlap nai iji itai hegaig et has u natau unyak aijaua; ja eka ika aijaua, Ecra mun auahas euc aijama an he? Van tas unyimia, eka ika aijaua, Et takitai nitai hag u Ihova.

⁸ El eka ahlap irai itai et apat nesganimtara aijaua, et idim edo has nedo inigki; el eka ahlap irai itai et atga has, im lep niji itai et emehe, et idim edo has nedo inigki: et ika a Ihova esjilid acen, El eka ahtai nitai iji igki imi natimi alupas unyimia, etpu idim eti upene inliinmopon aien vai caua, etpu idim eti ika aien et upene nedo unyimia.

⁹ Im lep inig, et ehka vai caua par ugyi itai an nuhup u Atua, mika yi aiheuc vai caija aien: et ika a Ihova esjilid acen, Et mun ahes ehelemia nedo inigki; etpu eti upene inliinmopon aien vai caua.

¹⁰ Di aigki iramia etpu atapnes irai tapnes aien, el et eti leh nimtan aien? eka eti atni incap aijaua an natau unyak, el eka eti leh nimtan aijaua. Et ika a Ihova esjilid acen, Ek esjum vai caua ainyak, et eti upene inliinmopok ainyak va niji itai ahlap unyimia.

¹¹ Erupu idim imiahpas nidak a nup urai iji pece, ahes an ridjai o un um yetpan an nete o un; uhpu ahlap irai itai auanipin upene par atnamud va nidak irai iji pece asega, im lep niji itai ahlap upene: et ika a Ihova esjilid acen, Erupu idim imiahpas nidak a nup urai iji pece.

¹² Ja eka mun auahas nidak aijaua, an tas unyimia, eka ika ai-jaua, Et has nitai hag u Ihova; et lep takitai nohwan, nitai caig o un marom.

¹³ Ek mun lep ika aijaua, Awe, er ohocred alupas va nitai inigki! et ika a Ihova esjilid acen, Eka mun amcel vaig aijaua; eka mun ahlap aijaua irai itai ahlap eris auoplecoplec, im niji itai atga has, im lep niji itai emehe; maiya, eka mun ahlap irai itai ahlap iji igki aijaua: ja, et ika a Ihova, et eti upene inliinmopok ainyak vai caua va nitai ahlap iji igki.

¹⁴ Uhmu asan tas ahlaijaig va natimi inig et ahcil aien, et wat amen tah natamaig an pak irai siip o im, ja et upyi asaig intas aien, um ahlap vai Natimarid an nitai eklim edo irai pece et has: et ika a Ihova esjilid acen; Ek Atimarid alupas ainyak, erupu imtitaig va nidak a nup urai iji pece.