Maika 7 - Intas Etipup

NUARIN TAS ALUPAS 7.

1 Era asan tas ehti a nup an nakalasia um ika era eti elpat ara, 3 et has nedo ura, 5 era asgeig ira Atua ara, jam eti asgeig ira atimi. 8 Era esjilid irai ilpu atimi tak atimi ira ra ara. 14 Et ago eropse ra a Atua va niji tas upene o un, 16 va nauoh ohocred vaig u ilpu atimi edemda vai ra, 18 im lep va nedo aiheuc o un vai ra.

¹ AWE, kaiheuc vai nyak! ek idivaig tah ainyak eris wat aldei ehni nasau irai itai an lidija, eris wat aldei ehni nohwai vaine: et eti eteuc tah nigai vaine mika eri caig, et eti eteuc tah inhupnai ateg et merit alupas vaig aien.

² Era mun atiih natimi ago nedo upene an pece: et eti eteuc tah natimi et atoh nedo o un: era atpaijinaig atimi ara asega mika eri atgei ra ara; era ahau jipe ilpu etwara ara asega, mika eri anai ra an nopoig ura.

³ Era umjijeuc ara par ago nedo has irai ikmara, et ugyi nimtan a natimarid, im lep ilpu atimi tas alep; era lep asaig inmerit alupas ura a ilpu atimi alupas; et tup ethi ache inliinmopora par ago nedo acalacal.

⁴ Et idivaig nadeni aien et esjilid nedo upene o un ira ra: et idivaig nirahed irai itai upunupun aien et atoh alupas nedo o un: etpu yetpam nadiat u ilpu atimi aminjinaig itai unyimia, im lep nopan aru vaig iramia; etpu ehioehio inliinmopora an nopan inig.

⁵ Akumu jim asgeig nan tah irai ilpu etwamia aijaua, um jim asgeig iran tah irai ilpu apa unyimia: etmu jim tas tah ehele ehgan.

⁶ Et idim amcel vai etman a inhalav atamaig o un, et aat irai risin a inhalav atahig o un, et edemda a intakata vai risi natamnyu un; erupu edemda vaig tah a nup uran nimnim o un.

⁷ Ja ekpu aitgai Ihova ainyak; ekpu aitgai Atua inig ainyak et imiatamaig nyak aien: etpu atahaijeg nyak a Atua unyak.

⁸ Ak natimi edemda vai nyak, namu jim asaig intas imiacitak vai nyak aiek: el ek eropse ainyak, ekpu lep atidai ainyak; el ek amen an napat ainyak, etpu eteuc inlah vai nyak a Ihova.

⁹ Ekpu ago nedo erop ainyak vai nedemda u Ihova, vaig inig nikavaig, ek mun ago nedo has ainyak vai yin, um yetpan an nopan iyehki etpu asuptecnaig vai nedo unyak aien, um ago nedo atoh vai nyak: etpu imiapan nyak aien u inlah, ekpu ecetai nedo atoh o un ainyak.

¹⁰ Etpu ecetai a natimi inig et edemda vai nyak aien, etpu ataluopni yin nehcamai is ika ehelek aien, Et amen a Ihova Atua unyum eda? ekpu alum yin an nesganimtak ainyak: uhpu auwihise yin an nopan inig et idivaig nosal irai efalaig.

¹¹ Ak nup u Jerusalem, an nadiat iyehki uhu wit actaig niji athatahau Unyimia, an nadiat iyehki eri lep imiapan itac acen vai caua intas alep.

¹² An nadiat iyehki erupu apam ehelemia ara ahes an pece Asiria um yetpan an pece Ijipt, ahes an pece Ijipt um yetpan an nofowai, ahes an jap et ethi um yetpan an jap et eche, ahes an nedoon et ethi um yetpan au nedoon et eche.

¹³ Ja etpu upyi hup um umaruma inpece unyimia vai ra era amen iran ara, va neruvaig nedo ura marom.

¹⁴ Ak Ihova, namu aminjinaig ilpu atimi unyum aiek an niseuc unyum, et idivaig inpak irai siip iji ig na ohuun ra aiek, era echim amen ara an lelitai, im lep an lolan nedoon Karmel: erumu edo ara an nedoon Besan im nedoon Cileat, inyi idivaig itu.

¹⁵ Ekpu ika ainyak eri ecetai niji itai imiali vaig ara, et idivaig an nopan iyehki akis ahes an pece Ijipt aijaua.

¹⁶ Erupu ecetai a nup urai iji pece ja par ehcamai va nemda asega ura: erupu ahpopones nipjieucsera ara, etpu ucjapines intikgara ara.

¹⁷ Erupu eluun nobohtan ara et idivaig nimyeuv, erupu eucjeucjeucaij ara irai uarin atpuli iran ura, et idivaig niji itai acrac an nobohtan: erupu imtitaig ara vai Ihova Atua uja um adumoij pam ehelen; erupu lep imiimtacimtac vai caua ara.

¹⁸ Etidim ti tah Atua et idivaig euc aien, na iknipagki nedo has aiek, um eti aktaktai nedo imipalea irai ahri ilpu atimi unyum; na eti aminjinaig nedemda unyum aiek yi itu iram, vaig inig nikavaig, na imiacitak nedo aiheuc aiek.

¹⁹ Napu aketo aiek, um lep aiheuc vai cama; napu esjilid aiek an nedo acalacal unyima; napu lep erekhaigse nedo has asega unyima nai uarin ubo an jap.

²⁰ Napu ehneijid aiek ehele ilpu mapoi Jekob intas inveijec eris asaig, im lep ehele ilpu mapoi Ebraham naiheuc unyum, as asig yi aktit intas vaig aiek ehele ilpu retpoma, ahes itu acen um imihum pam an nopan inig.