Maika 6 - Intas Etipup

NUARIN TAS ALUPAS 6.

1 Et imiisjis a Atua va nedo ahnag u ilpu atimi o un, 6 va neti ato itai ura, 10 va nedo acalacal ura, 16 im lep va nedo apat ura.

¹ AK ilpu atimi unyak, akumu atahaijeg aijaua intas inig et asaig a Ihova; Atidai aijaua, um asuptecnaig nedo unyimia an nu-hup u niji au, erumu lep ahgei nohramia niji edoon.

² Ak niji au iji igki, akumu atahaijeg aijaua intas imiisjis u Ihova, im lep caua, ak niji mala, niji ededuon ipjin u nobohtan marom: et eteuc nohuun nedemda ehele Ihova! vai ilpu atimi o un, etpu imiisjis ehele nup Isreel aien va nedo ura.

³ Ak ilpu atimi unyak, kis ago inhe vai caua ainyak? kis auoh ohocred caua an he ainyak? akumu asuptecnaig va nedo unyak aijaua.

⁴ Kis idim imiaridji pam caua ainyak ahes an pece Ijipt, um imiatamaig caua vai inmim u ilpu atimi auaraheca; kis lep abrai Moses, im Eron, im Miriam ainyak, mika ehtiji uhup iramia ahtaij.

⁵ Ak ilpu atimi unyak, akumu imiehva aijaua nitai iyehki is aktaktai vaig a Belak natimarid u nup u Moab, im lep intas iyehki is asaig ehelen a Belam inhal u Bior; maiya, akumu imiehva aijaua nitai iji ehki eris ago vai caua ahes an niskanse Sitim um yetpan an maliyum Cilcal, mika aki ato nedo aiheuc u Ihova vai caua aijaua.

⁶ Ekpu ehcohos ainyak an nuhup u Ihova an he? ekpu atpuse ainyak vai Atua ijinies acen an he? ekpu ehcohos ainyak an nuhup o un irai itai ahlap atnamud, im niji hakli kurimatau et eteuc inmesese et ethi ira ra, ka oʼo?

⁷ Etpu upene inliinmopoi Ihova vai siip atamaig et ahinag acen, im narakei et idivaig nofowai et ehka nesvi vaig, ka oʼo? ekpu ati inhal unyak inmeto ainyak par aru va nedo imipalea unyak, ilpu hal u nohuk marom par aru va nedo has u nesgak, ka oʼo?

⁸ Ak natimi inigki, et mun ehvaig ehelum a Atua nitai inig et upene; et idim merit a Ihova va nitai iji igki ache ehelum, mika an ago nedo atoh aiek, um merit alupas va nedo aiheuc, um apol ira Atua unyum an liinmopom upoupo.

⁹ Et yetpam nohrai Ihova ehele nup uran maliyum, etpu ato nidam aieu et arapakau aien: akumu atahaijeg aijaua va nitai aredei caua, im lep yin is ati aien.

¹⁰ Et idim amen um yetpam an nopan inig irai eom u ilpu atimi auatatimi niji padiaig eris lucsei va nedo has, im lep niji ipjiitai asjaaicnaig et ahcil er amcel vaig.

¹¹ Ekpu eti ika ainyak, Era upene ara et wat amen ehele ra niji itai asjaaicnaig et ahcil, im lep incat inig et amen iran niji hat asjaaicnaig et efaifa.

¹² Era idim ehcerucai alupas atimi a ilpu atimi ikni itai iran, era lep asan tas ahcil a ilpu atimi amen iran, et efaifa intas inig et ahes an nipjineucsera.

¹³ Va nitai inigki ekpu auud caua ainyak, etpu ehka par imiatamaig caua, um ika yi ahyuahu niji maliyum unyimia va nedo has unyimia.

¹⁴ Akupu hag aijaua, jam eti geije; etpu ohocred inliinmopomia; akupu imiaha niji itai unyimia aijaua, jam eti imicoho; ekpu lep at-cijaig pan an nedoa ainyak nitai iji igki akupu imicoho aijaua.

¹⁵ Akupu ahwaig hwiit aijaua, jam eti ucsei; akupu ahtaijiraig nohwai oliv aijaua, jam eti aspi caua an narakei iran; akupu ahtaijiraig nohwai vaine aijaua, jam eti umnyi nide vaine iran.

¹⁶ Vaig inig nikavaig, eka mun apos intas alep u Omrai aijaua, im lep nedo asega eris ago a nup uran nimnim u Ehab, eka mun lep apol irai tas ura aijaua; mika ki auahas inmaliyum unyimia ainyak, um ika eri imiafakahcil atimi amen iran: va nitai inigki akupu lep apos aijaua nitai ehcamai u ilpu atimi unyak.