Maika 5 - Intas Etipup

NUARIN TAS ALUPAS 5.

1 Naposvaig u Kristo. 4 Nelcau o un. 8 Etpu esjilid aien.

¹ IM lep inig, akumu asjapicnaig ilpu eucsupo unyimia aijaua, ak ilpu atimi unyak era ahinag a ilpu eucsupo unyimia: era mun arehed iraija a ilpu atimi tak atimi iraija par ago nedoa vai caija: erupu auud nahpai natimi tas alep u nup Isreel an niseuc ara.

² Ak nup u Bedlehem Efrata, eka idim eti elpat aijaua irai up u Juta et ahinag acen, ja etpu ahes ehelemia um ehcohos pam vai nyak aien etpu atimarid irai up Isreel aien; is eteuc aien itu acen irai iji mesese asega.

³ Ja etpu atcijaig ra aien um yetpan an nopan iyehki, etpu apos inhal o un aien et ahgei inhal o un aien: ja erupu adumoij ehele nup Isreel nahri ilpu etwara.

⁴ Etpu aiji aien um aminjinai ra an nemda u Ihova, im lep an natimi alupas u nidai Ihova Atua o un; erupu amen aktit ara: etpu idim atupun an nopan inig aien, um esjilid ira atimi, um yetpan irai tid an nobohtan.

⁵ Etpu asan nigpa a natimi iyehki, eru wit apam a nup Asiria an pece uja, um atga irai imnim atimi uja: ja intupu ikni ilpu atimi aminjinaig caija inyi seven akaija par atapnes ra, im lep ilpu atimi alupas inyi eet.

⁶ Erupu auahas inpece Asiria an nedoa ara, im lep inpece u Nimrot irai ahaijin: uhpu imiatamaig caija vai nup Asiria, eru wit apam ara an nobohtan uja, eru wit atga ara an pece uja.

⁷ Erupu amen ehele nup urai pece inyi ahinag nahri ilpu mapoi Jekob et idivaig nopoigmul et ahes ehele Ihova, um lep idivaig incopda irai efelelicai, et eti aitgai atimi, um eti amen vai ilpu hal u atimi.

⁸ Maiya, erupu amen ehele nup urai iji pece nahri ilpu mapoi Jekob, erupu amen ehele nup urai pece inyi ahinag ara et idivaig laion ehele niji itai aleg an lelitai, um idivaig laion tupko ehele pak irai siip: el et atga ira ra aien, etpu auwihi hal aien, um ces yi oplecoplec, ja etpu eti eteuc tah par imiatamaig.

⁹ Ak Ihova, inyi ethaigjai nikmam ira atimi tak atimi iram, erupu tup tiih pan ara asega era edemda vai euc ara.

¹⁰ Et ika a Ihova, Ak ilpu atimi unyak, an nadiat iyehki etpu ika ainyak eri atiih ehelemia niji hors unyimia, ekpu lep auahas niji jariot unyimia ainyak:

¹¹ ekpu lep auahas niji maliyum an pece unyimia ainyak, ekpu lep alcapdicraig ehni ainyak niji maliyum emda unyimia:

¹² ekpu ika ainyak eri atiih a ilpu atimi araces an pece unyimia: inyi eti lep amen ehelemia tah natimi asaig yi opdicrai itai:

¹³ ekpu lep auahas niji atmasimai unyimia ainyak eris wud ugnyit iran ara, im lep niji atmasimai hat unyimia et amen ehelemia; akupu eti lep alaigaheni aijaua vai niji auritai u ikmamia.

¹⁴ Ekpu auahas niji itai itap unyimia ainyak et amen ehelemia: ekpu lep alcapdicraig niji maliyum unyimia ainyak.

¹⁵ Ekpu aru ainyak irai nup urai pece iji ig, an nedemda im intavaitap unyak, eris eti upyi atahaijeg intas unyak ara.