Maika 3 - Intas Etipup

NUARIN TAS ALUPAS 3.

1 Nedo ipjin u ilpu atimi alupas. 5 Intas ahcil u ilpu profeta. 8 Nimiisjis nahcil ura.

¹ KIS ika ainyak, Akumu atahaijeg aijaua, ak ilpu atimi alupas u ilpu mapoi Jekob, im lep caua ilpu atimi tas alep vai nup Isreel; Eris idim ika aki ato nedo atoh aijaua.

² Eka esjum aijaua va nedo upene, um merit va nedo has: eka ahosji atimi aijaua, um atipagki nemihtara irai iji eduora:

³ eka lep caig ohui ilpu atimi unyak aijaua, um ahosji ra, um auhoig yi asvi niji eduora, um ehtoplecoplec ra et idivaig er atise an nipjiuru, um idivaig nuarin nitai caig anliin nipjinitai.

⁴ Ja eru wit ahlaig pan ehele Ihova ara, inyi eti atahaijeg ra aien: ja etpu adenaig nesganimtan vai ra aien an nopan iyehki; vaig inig nikavaig, et mun idim has nedo ura.

⁵ Intas o Ihova nigki vai ilpu profeta iji ig era imiahnag ilpu atimi unyak ara, Era ahidan tas igpa ara ehele atimi iji ig era alaa ra nitai caig ara; ja era anvaijai atimi iji ig ara era eti alaa ra nitai hegaig ara.

⁶ Va nitai inigki etpu epig iramia, ja etpu eti lep eteuc tah nitai ehvaig; etpu yetpam iramia napat, ja etpu eti ahuumtidec irai itai tah; etpu ete nagesega vai ilpu profeta iji igki, etpu apat ahtu ira ra.

⁷ Erupu ehcamai a ilpu atimi alum itai, etpu ehioehio inliinmopoi ilpu atimi ahuumtidec irai itai: erupu adahpoi ipjieucsera ara asega; vaig inig nikavaig, et eti tas pam ehele ra a Atua.

⁸ Ja et idim ohua nemda u Nesgai Ihova irak, im intas atoh, im nemda, par asuptecnaig ehele ilpu mapoi Jekob nedo imipalea ura, im lep nedo has ura ehele nup Isreel.

⁹ Akumu atahaijeg intas inigki aijaua, ak ilpu atimi alupas u ilpu mapoi Jekob, im lep caua ilpu atimi tas alep vai nup Isreel, eka amcel van tas atoh aijaua, um imiacal nedo atoh asega.

¹⁰ Eka actaig inmaliyum Saion aijaua an natgei atmas unyimia, im lep inmaliyum Jerusalem an nedo ipjin unyimia.

¹¹ Era tas alep a ilpu atimi alupas iran va nimtan, era esege imi atimi a ilpu atimi ahlap iran va naga, era ahidan tas a ilpu profeta iran vai mune: ja era lep asgeig irai Ihova ara, um ika, Et idim amen eheleija a Ihova; inyi eti yetpam iraija tah nohocred.

¹² Va nitai inigki eri acujitai inmaliyum Saion irai plau et idivaig nahapol va nedo unyimia, etpu uarin asjapicnaig hat iran inmaliyum Jerusalem, etpu idivaig nesei nedoon u neom itap.