Maika 2 - Intas Etipup

NUARIN TAS ALUPAS 2.

1 Intas acaiji nehcerucai atimi. 4 Intas taigtaig. 7 Intas acaiji nedo efaifa im nedo apat. 12 Intas upyi asaig par imiadumoij pam ilpu mapoi Jekob.

¹ AWE, kaiheuc vai ra era aktaktai nedo acalacal ara, um anacanac irai edo has irai tinara! et wat lahlah an nuhialeg, era ago ara, vaig inig nikavaig, et tup upene vai ra par ago.

² Et has ira ra niji ahapol, era lucsei ara an nedo ipjin ura; et lep has ira ra niji imnim, era, lep atoraliak ara: era ehtipidai atimi ara im nup urai imnim ura; era ehcerucai atimi ara um lucsei niji uari obohtan ura.

³ Va nitai inigki et ika a Ihova; Ek idim aktaktai itai has ainyak va atimi iji igki, aki eti emda aijaua par imiaha auiwamia vaig; aki lep eti atga aijaua an nedo ijinies u inliinmopomia: etpu idim opan has iyehki.

⁴ An nopan iyehki etpu acesaces nohranitai ehtigtaig vai caua tah, um imitaig alupas caua, um ika, Eh mun auahas alupas caija: Et ika a Ihova eri asjeupigmoig ilpu atirai unyak hal, um ohuun niji itai uja: et mun atipagki inpece uja aien, et mun ahaig niji uari obohtan uja aien um alupai ilpu atimi imipalea.

⁵ Va nitai inigki inyi eti amen tah ehelemia par asjaaicnaig inuarin nobohtan o un ehele ilpu atimi u Ihova.

⁶ Era ika ara ehele ilpu atimi ahidan tas, Akumu jim ahidan tas aijaua: va nitai inigki erupu eti ahidan tas ehele ra ara, va eri jim ehcamai vaig ara.

⁷ Awe, vai intas o ilpu mapoi Jekob! et auatialidi Nesgai Ihova, ka oʼo? nauritai o un ji igki, ka oʼo? erupu idim upene vai intas unyak ara era ago nedo atoh ara.

⁸ Ja eris atidai itu acen a ilpu atimi unyak is idivaig tah et edemda aien: eka atipagki napelumai itac im napelumai uhup aijaua, irai ra sji igki era eklim atga ara um adumoij pam u nedoa.

⁹ Eka mun ahlo ilpu takata irai ilpu atimi unyak aijaua irai imnim upene ura; eka mun atipagki aijaua irai iji mesese asega nitai upene iji igki ehele ilpu hal ura kis alupai ra ainyak.

¹⁰ Akumu atidai aijaua, um atga unyimia; et ti inuarin atumop iran vai caua nigki: et idim has, va nitai inigki uhpu auahas caua, uhpu auahas alupas caua.

¹¹ El et imiisjis intakitai tah natimi um asan tas ahcil par imiahnag atimi vaig, um ika, Ekpu ahidan tas ehelemia ainyak vai waina im kava; etpu ahidan tas aien ehele atimi iji igki.

¹² Ak ilpu mapoi Jekob, ekpu idim asjapicnaig caua asega ainyak; ekpu idim asjapicnaig nahri nup Isreel ainyak; ekpu ikni ra ainyak yi tup ethi ache, et idivaig inpak irai siip an pece Bosra, um idivaig inpak irai itai eklim edo irai pece anliin nokoro ura; erupu atamerit alupas ara va nahinag u atimi.

¹³ Et mun aridjipan an nuhup ura a natimi alcapdicrai itai: era mun alcapdicrai itai ara, um atga an neucse nathatahau, um lep apan itac iran: et atga a Natimarid ura an nuhup ura, et uhup ira ra a Ihova.