Maika 1 - Intas Etipup

NUARIN TAS ALUPAS 1.

1 Et asuptecnaig nedemda u Atua vai ilpu mapoi Jekob va nedo apat ura a Maika. 10 Et ahugni ra aien mika eri ehtigtaig ara.

¹ INTAS o Ihova nigki is yetpam ehele Maika nup u Morisa an nopan umoh u Jodam, im Ehas, im Hesekaia, ehtaij atimarid an pece Juta, is ahuumtidec irai itai aien vai nup u Sameria im nup u Jerusalem.

² Akumu atahaijeg aijaua, ak nup urai iji pece asega; namu atgeig pam intikgam aiek, ak nobohtan, im niji itai asega amen iran: etmu asuptecnaig nedo unyimia a Ihova Natimarid, Natimarid marom an neom itap o un.

³ Et idim ahes an nuarin o un a Ihova, etpu asuol sepam aien, um auwihi niji uarin ijinies an nobohtan.

⁴ Inyi idivaig inwai niji edoon itlian, um idivaig wai et aredse an nuarin isas; uhpu atiakoai niji iskanse, um idivaig nidincai inig et amen ubutpotet u incap.

⁵ Et yetpam nitai iji igki asega va nedo imipalea u ilpu mapoi Jekob, im lep vai nedo has u nup Isreel. Nedo imipalea u ilpu mapoi Jekob nevitai? et idivaig nedo imipalea u nup u Sameria; niji uarin ijinies u nup u Juta nevitai? et idivaig niji ualin ijinies u nup u Jerusalem.

⁶ Va nitai inigki ekpu ika ainyak yi idivaig niji ira hat an nahapol inmaliyum Sameria, im lep nuarin ahwaig vaine iran: ekpu lep atladwise hat iran ainyak an niskanse, ekpu ika ainyak yi ateucrad niji ededuon.

⁷ Uhpu auoplecoplec ehni niji atmasimai ura eris wud ugnyit iran ara, uhpu lep atnamud nimtan asega ura, ekpu lep auahas niji atmasimai asega ma ainyak: eris ikni itai vai ra ara et idivaig nimtai ilpu takata ago nedo has, etpu lep adumoij pan nitai iji igki um idivaig nimtai ilpu takata ago nedo has.

⁸ Va nitai inigki ekpu taig ainyak um aunyauwaig, ekpu edo jipe ainyak um atipagki apelumai irak um tup atga: ekpu aunyauwaig ainyak et idivaig kuri aleg, um laav et idivaig nalidmot.

⁹ Et idim alupas inmocop ira ra; et mun yetpam an pece Juta nohocred iyehki; et mun lep uhum ilpu atimi unyak an neucse nathatahau u Jerusalem.

¹⁰ Akumu jim asuptecnaig vaig aijaua an maliyum Cad, um jim taigtaig an maliyum Ako: akumu aduapilpal aijaua an nohpa an maliyum Bedafra.

¹¹ Atga unyimia aijaua, ak nup u Sefir, akupu tup atga aijaua um ehcamai: akumu jim apan itac aijaua, ak nup u Seanan; erupu eti atau iramia a nup u Bedisel.

¹² Era idim taigtaig a nup u Merod vai naga ura: vaig inig nikavaig, et mun ahes ehele Ihova um asuol nohocred an neucse nathatahau u Jerusalem.

¹³ Ak nup u Lekis, akumu athai niji hors emda irai jariot aijaua: is ahes ehelemia nedo has u nup u Saion: eris idim ecetai ehelemia nedo imipalea u nup Isreel.

¹⁴ Va nitai inigki akupu atcijaig nup u Morised-Cad aijaua: erupu ahiyek ilpu atimarid u nup Isreel a nup Aksib.

¹⁵ Ja ekpu imiapam vai caua tah ainyak par ohuun itai unyimia, ak nup u Marisa: etpu yetpam Atullam aien, inmaliyum esjilid an pece Isreel nigki.

¹⁶ Akumu ucsei numri nidjinimia aijaua, um ehped asega vai ilpu halav cap unyimia; etmu idim alupas nuarin inig er ucsei et idivaig inmeijcop alupas; er idim lucsei pan ilpu hal unyimia irai taka pece.