Madius 9 - Intas Etipup

Nuarin-tas alupas 9.

¹ IS aridjai aien an nelcau, um apan an taka uarin, um apahai an nuarin-pece o un.

² Eris imyiapan ehelen natimi is ethi is emehe aien va napalse, eris atijai yin an nitai ahled: is wat ecetai nimyiisjis ninivaijec ura a Iesu, is ika aien ehele natimi emehe va napalse, Ak inhal unyak, namu imyiacitak aiek; eh mun iknipagki nedo has unyum.

³ Jais ika inliinmopoi ilpu ahaiji atimi esege, Et asan tas has esjilid a nat eigki.

⁴ Is ato naktaktai ura a Iesu, um ika, Eka auri aijaua par aktaktai has anliinmopomia?

⁵ et tup upene nikavaig, Eh mun iknipagki nedo has unyum; ka nikavaig, Atidai aiek, um atga?

⁶ ja, mika aki ato aijaua, nikavaig, et emda a Inhal o natimi an nobohtan par iknipagki nedo has, (is ika aien ehele natimi emehe va napalse,) Atidai aiek, um leh nitai ahled unyum, um atga unyum, um apan an neom unyum.

⁷ Is um atidai aien, um atga o un, um apan an neom o un.

⁸ Eris wat almoi natimi is ahinag, eris imyiali ara, um imyiahpas Atua va nedo o un, nikavaig, is ati nemda ineigki aien ehele atimi.

⁹ ¶ Is ahes eahki a Iesu um atga o un, um ecet natimi is ethi nidan Madius, is ateuc aien an neom asjapicnaig mune iran: is ika ehelen aien, Ahced nyak aiek. Is um atidai aien, um ahced yin.

¹⁰ Is wat ateuc a Iesu anliin neom um hag, eris apan ehelen a ilpu atimi akwanaham is ahinag im ilpu atimi auatatimi, um ateuc ehelen im lep ilpu atimi atahaijeg yin.

¹¹ ¶ Eris wat almoi a ilpu Farisi, eris ika ara ehele ilpu atimi atahaijeg yin, Et auri a Natimi esege unyimia par ehrihag aien im ilpu atimi akwanaham im ilpu atimi auatatimi?

¹² Is wat atahaijeg a Iesu, is um ika ehele ra aien, Er eti ika ehele natimi atipagki nemehe yi aminjinai ra era cehcehe ara, ja ara ache era emehe ara.

¹³ Akumu apan aijaua, um ato nesgan tas ineigki, nikavaig, “Ek merit ainyak va nedo aiheuc va atimi, jam eti merit va niji itai ahlap:” kis eti ham ainyak par ahlaig vai ilpu atimi upene, ja vai ilpu atimi auatatimi ache, mika eri adumoij anliinmopura ara.

¹⁴ ¶ Eris apan ehelen a ilpu atimi atahaijeg Joanes, um ika, Ecra auri aijama im ilpu Farisi par ehcahinag atwakam, ja era eti atwakam a ilpu atimi atahaijeg euc?

¹⁵ Is um ika ehele ra a Iesu, Et ehka vai ilpu laig o natimi leh ehgan nohocred vaig, an namen u natimi leh ehgan ehele ra; ja etpu yetpam nadiat iji ehki, uhu wit atipagki natimi leh ehgan ehele ra, erupu atwakam ara an naopan iyehki.

¹⁶ Et eti ijei pan inuarin napelumai mat tah natimi an mohtan napelumai; va yi jim ruhra mohtan napelumai va nuarin napelumai mat, um ahpati alupas.

¹⁷ Era eti atladoi waina mat natimi irai hubej itu acen; va yi jim atpoijej inhubej, um elel waina, um has inhubej: ja era atladoi waina mat ara irai hubej mat, et par upene ehro.

¹⁸ Is wat tas aien irai tas iji eigki ehele ra, is apan ehelen natimi alupas is ethi, um atpuse an nuhup o un, um ika, Et mun atahaig unyak: namu apan aiek, um atijai nikmam iran, etpu umoh aien.

¹⁹ Is atidai a Iesu um ahced yin, im lep ilpu atimi atahaijeg yin.

²⁰ ¶ Im lep ineig, intakata is ethi, is emehe aien va nahlamerai u inja an mesese is twelv, is apan aien an cehen, um atcei pan intid an napelumai iran:

²¹ is ika inliinmopon aien. El ek atcei pan napelumai iran ainyak, ekpu cehcehe ainyak.

²² Is um ahidai yin a Iesu, um ecet yin, um ika, Ak intakata ineigki, namu imyiacitak aiek; na mun cehcehe aiek va nimyiisjis ninivaijec unyum. Is um cehcehe a intakata an nuarin-nadiat iyehki.

²³ 5 Is wat yetpan a Iesu anliin neom o natimi alupas iyehki, um alum ilpu atimi ahlai nau, im lep ra eris ehteigtaig ara,

²⁴ is um ika ehele ra aien, Alau ijo aijaua: et eti mas natahaig ineigki, et umjeg aien. Eris um imyilav yin ara.

²⁵ Eris wat alau ijo natimi iji ehki, is apan aien, um arapse va nikman, is um atidai natahaig iyehki.

²⁶ Is apaahni intas va nedo ineigki an pece iyehki asega.

²⁷ ¶ Is ahes eahki a Iesu um atga o un, erus apitac yin natimi is ero is aupat nesganimtarau, erus ahlaig arau, um ika, Ak Mapoi Tevit, aiheuc vai cumrau aiek.

²⁸ Is wat apan aien anliin neom, erus apan ehelen natimi erahki is aupat nesganimtarau: is um ika ehele rau a Iesu, Aru imyiisjis ninivaijec nemda unyak aijaurau nagovaig nitai ineigki, ka oʼo? Erus ika ehelen arau, Maiya, ak Natimarid.

²⁹ Is atcei pan nesganimtarau aien, um ika, Uhpu ago imi caurau et idivaig nimyiisjis ninivaijec unyimirau.

³⁰ Is um asalgei nesganimtarau arau; is idim acaiji rau a Iesu, um ika, Jim asuptecnaig ehelen tah.

³¹ Ja erus wat atga urau arau, erus asuptecnaig nedo o un arau an pece iyehki asega.

³² ¶ Eris wat alau ijo ara, eris imyiapan ehelen natimi pop is ethi ara, is amen iran nagelo has.

³³ Is ahlo nagelo has ehelen aien, is um tas natimi pop: eris imyiali natimi is ahinag, um ika, Eris idim eti almoi tah nedo et idivaig ineigki an pece Isreel itu acen.

³⁴ Ja eris ika a ilpu Farisi, Et ahlo ilpu agelo has aien vai natimarid o ilpu agelo has.

³⁵ IS apan a Iesu irai iji uari-pece esjilid asega, im inuari-pece haklin, um esege irai eom alaigaheni ura, um asuptecnaig intas-upene va nelcau o Atua, um atipagki nemehe asega ira atimi im nauatialidi ira ra.

³⁶ ¶ Ja is wat alum atimi is ahinag aien, is aiheuc vai ra aien, eris auatialidi ara um tup terimterim, et idivaig siip et ti asgi.

³⁷ Is um ika ehele ilpu atimi atahaijeg yin aien, Et idim ahinag nohoai itai, ja et eti elpat natimi asjapicnaig;

³⁸ akumu ugni natimi alupas ohuun nohoai itai aijaua, mika yi abraig pan ilpu atimi asjapicnai nohoan aien.