Madius 4 - Intas Etipup

Nuarin-tas alupas 4.

¹ IS imyiapan Iesu a Nesgan Upene an namasacen mika yi oop yin a Tiapolo.

² Is eti caig tah nitai aien an nadiat is forte im nepeig is forte, um ehtele yin.

³ Is apan ehelen natimi oop yin, um ika, El et Hal o Atua aiek, namu ika aiek yi areto inhat iji eigki.

⁴ Is tas aien, um ika, Eris aged, um ika, “Eri eti umumoh natimi vai areto ache, ja vai intas asega et ahes an nipjineucse Atua.”

⁵ Is imyiapan yin a Tiapolo an nuarin-pece itaup, um atijai yin an nijintin neom ahlap,

⁶ um ika ehelen, El et Hal o Atua aiek, namu aliaujaise aiek: eris aged, um ika, “Etpu tas alep ehele ilpu agelo o un aien vai euc:” “erupu aposjai euc irai ikmara ara, va an jim atgeig yi oplec neduom aiek an hat.”

⁷ Is um ika ehelen a Iesu, Eris lep aged, um ika, “Namu jim ago nedo oop vai Ihova Atua unyum aiek.”

⁸ Is lep imyiaridjai yin a Tiapolo an nedoon ijinies acen is ethi, um ehvaig ehelen niji elcau asega an nobohtan im niji itai upene iran;

⁹ um ika ehelen, El et atpuse aiek um alaigaheni vai nyak, el ek par alupai euc nitai iji eigki asega ainyak.

¹⁰ Is ika ehelen a Iesu, Atga unyum aiek, ak Satana, eris aged, um ika, “Namu alaigaheni vai Ihova Atua unyum aiek, um aheca o un” ache.

¹¹ Is um ude yin a Tiapolo: eris idim apan ehelen a ilpu agelo, um aheca o un.

¹² IS wat atahaijeg a Iesu, nikavaig, eris ati Joanes anliin neom ipjin, is apan Calili aien:

¹³ is ude Nasared aien, um apan um amen Kaperneum, ubutpotet u injop an niblan pece Sebulon im Naftalai:

¹⁴ mika eri ehneijid intas ineig is upyi aged a Aiseya naprofeta, um ika,

¹⁵ “Inpece Sebulon im inpece Naftalai, ubutpotet u injop, an nahaijin Jortan itac, Calili inpece o ilpu atimi aupat;

¹⁶ era mun ecetai inlah alupas ara sji eigki eris amen an naupat ara; et mun aridjai inlah imi ra eris amen an nuarin o naupat ara im inmas.”

¹⁷ ¶ Is atupun a Iesu an naopan iyehki um tas, um ika, Akumu adumoij anliinmopomia aijaua: et mun ubutpotet nelcau an nohatag.

¹⁸ ¶ Is atga a Iesu u injop, Calili um ecet inraimu is ero, Saimona tak idan Pitrus, im Antrius etoan, erus anah an nopoig arau: erus atimi ahilek mu arau.

¹⁹ Is um ika ehele rau aien, Apitac nyak aijaurau, ekpu ati caurau ainyak mika aru ahilek atimi aijaurau.

²⁰ Erus auroauro arau um ude nopoig, um apitac yin.

²¹ Is ahes eahki aien um atga, um lep ecet inraimu is ero is eche, Jakobus inhal o Sebetaius im Joanes etoan, erus amen arau ehele Sebetaius etmarau an nelcau um uhpuri opoig ura; is ahlaig vai rau aien.

²² Erus auroauro arau um ude nelcau im etmarau, um apitac yin.

²³ ¶ Is arahed an pece Calili asega a Iesu, um esege irai eom alaigaheni ura, um asuptecnaig intas-upene va nelcau o Atua, um iknipagki emehe asega ira atimi im nauatialidi ira ra.

²⁴ Is apaahni intas vai yin an pece Sirya asega: eris imyiapan ehelen ilpu atimi emehe asega ara is acheiachei nemehe ira ra im nohocred, im ra eris amen ira ra a ilpu agelo has, im ra is ti lelra ara, im ra eris apalse ara; is ago cehcehe ra aien.

²⁵ Eris ahes Calili, im Tikapolis, im Jerusalem, im Jutaia, im nahaijin Jortan itac natimi is ahinag, um ahced yin.